Isaiya 59 - Ngudradreadrekadhane Ka Sisiu 魯凱語聖經

Ku yuginsia maelaela ku pasalrivane ki mapapangale

¹ Madha iyaiya kai, ku Tamatama kai lri dulru palribulu numiane, ka macele si kailri maka kilalra ku kitubi numi iya.

² Ku kaika kilalraini, amani kwi pasalrivane numi; kwi pasalrivane numi pakiadaili numiane ki Twaumase, lu sukubu numi laka kadrwa ku paluludane.

³ Kwi drusa kwi alrima numi swaete ku erai, ku lagalawgau swaete ku pasalrivane; kwi bibiane numi watavuvulrucu, kwi lridame la kawriva ku ngialisiane.

⁴ Lu mwa numi tasaibaibangane kai numi kawariva aparamaramau, la kai kawariva ku patengatengane. Arakai numi ku tavuvulrucane hukuku; la arakai numi ku tavuvulrucane tulisi ki umawmase.

⁵ Mararamau numi ki siduduku ka sulrau ka wakubukubu, ki vawvaluku ka twalralralravathe. Ku umawmase lu kane kikai batuku wapacai; lu cwake ki batuku, ku duku ka sulrau la kainganai ituku.

⁶ Ku tavuvulrucane lini kai maka wasekete ku ngilisianane lini, mia ki lralravathe ki vawvaluku ka kaika adulrwane silaimai; ku kakwakudhane lini ngialisiane, matiangeange lu pwalrima.

⁷ Takikaikaakane numi ku ngialisiane, la karacange numi ku apiane. Wavutha numi papacai ki kadrwa ku pasalrivane, ka kadrwa ku taapapiyaiyane numi. Sanaka tamwane numi kathane ku akabebetethane si aburukane.

⁸ Sanaka taikaiyane numi, kwini kadrwa ku babitingane. Ku tapiane numi kadrwa ku aparamaramavane; twa kadalranane numi ku ngialisiane, ku ngwakai kai ki kadalranane ku umawmase kadrwa ku sulivatane.

Ngiatatupela ku mapapangale

⁹ Ku swa Iseraylri amia kai, “Kikai tau thingale nai ku takatwasane daili naiane ki dringelresane, ku kaika tadethane naiane ki aparamaramavane. Wasilape nai ki ledra, ai kathane ku dradrimitane; siadrama nai ki thelare, ai kathane ku dradrimitane.

¹⁰ Mia nai ki mukimukici sakerakerape; yakai nai ki vaiyane mucucusu tubakebake, mia ki yakaai ki maungu, mararaamau ki yakai swadriadringi.

¹¹ Mia nai ki cumai kawkau, mia ki tavagu dadange, sidrama ki aparamaramavane, ai kai maka wamalra; ku sapalribulane wadailinga naiane.

¹² “Tamatama, makalra kai tapasalrivane nai; kai pasalrivane nai wakukusu naiane; ngiathathingale nai ka mangangace nai turamuru.

¹³ Kiaecebe nai muswane, wacilri nai muswane, si kai tupapalra muswane. Wadredrepete nai ki palrapalra, si katwasenga muswane. Pamama kai takidremedremane nai, ku takawrivane ku vaga madraedrangelre patuelre.

¹⁴ Ku dringelresane kiapakatwase; ku mwalecege ka sabulrwane kai kiadethenga. Ikai ki rarubwane kadrwanga ku patengane ka sabulrwane, laka kadrwa ku aparamaramavane.

¹⁵ Kadrwa ku natikianenga ku patengane ka sabulrwane; ku kai paiyaiya ku ngialisiane ku umawmase kiasicecelregelringa ki manganga ka umawmase.” Ku Tamatama wadrelenga kikai patuelre; ngwalai ku takamudane ki dringelresane la kai kiragai.

Ku Tamatama padulrudulru ku apalribulane ki kawkawluini

¹⁶ Ku Twaumase masamali, ani ka kadruaini ku umawmase ku paralubu ki kiadredredrepete ka umawmase. Ngwalai kikai, ku Twaumase lri arakai ku pukuini palribulu liniane, lai lri paakaci liniane.

¹⁷ Ku Twaumase lri arakai ku dringelresane tulaimai ka adreme, lri arakai ku tapamalebeane tutalrupunu. Ku Twaumase lri arakai ku sabilriane tulaimai, lri arakai ku kisamulane tusapakabelengane ka laimai.

¹⁸ Ku Twaumase lri singikai ku tapiane ki badha bilri liniane, adravane ka yakaai kabicelrakane ki laveke ka kadaengane ku laumawmase mialri kai kilragau.

¹⁹ Twalai talrawane mwa talriwgane, sanaka umawmase lri kakiwcu ki Tamatama si madrau ka pukuini. Lri mia ki telebe, lri mia ki alrilrawgu kainganai.

²⁰ Ku Tamatama amia kai ki kawkawluini, “Lri kelaku si palribulu ki Yerusalrime, palribulu ki sanaka kiadaili si cilri ki pasalrivane ka umawmase.

²¹ Lri ngikakamaniaku makaketekete numiane: Lri patarumaraku baai numiane ku puku si sabulrwane. Twalai kaiasasane, lri pasalaladha numi nakwane, lai lri bulru numi ki lagagane numi ku mwabaibalrithi lani pasalaladha nakwane makanaelre.”