Isaiya 58 - Ngudradreadrekadhane Ka Sisiu 魯凱語聖經

Patengatengane ka walaisi

¹ Ku Tamatama amia kai, “Kusu akwadrava tawtau, mia ki rapa paelraelrange, madha idrengere; papia ki kawkawluli ka swa Iseraylri pelaela ku pasalrivane lini.

² Kwi lalasu wasukusukubu nakwane lukakaiyaiyaiya, kwi lalasu miakau madalame thingale ku kadalrananeli, ku kuni lini la miakau pangiamiamiya ku dringelresane, si pasalalaladha ku hulriceli ka kuni. Kwi lalasu kiatubi nakwane ku abaadhaneli liniane ku paramaramavane ku hulrice, ka sapelaelane lini ala ka madalame sukubu nakwane.”

³ Ku swa Iseraylri kiavaga, “Alaiyasi kai kirarakete naiane ku Tamatama, lri tumane nai laisi? Alaiyasi la kai drele naiane, lri tuumane nai ngipapakwalrialrialri?” Ku Tamatama la iya kai liniane, “Walailaisi numi, si piapia ku apipia numi, la dredredrepete numi ki tarakawaungu.

⁴ Ku talaisane numi arwa ngikarakacane numi, la rivurivu, si malrumalrumalrumai. Lu kidremedreme numi lu pia numi kai laisi lri kilalra amia numi nakwane ku inulri numi?

⁵ Lu laisi numi, ngiapapakwalri numi, si lukwane katadadaangane, mia ki lri padalrunga si kalraici ka bengelrai. Yakai numi cakena sapa ku kaimadhane, la sabulu ku thuvugu, ala apece ikai belenge. Amani kai kudra walaisi? Madalame amia numi nakwane ku miyaiya kai ku talaisane?

⁶ “Ku urikaili ku walaisi yai: Mwalra kudra sadredrepetane ku kicikici si kadrwa ku aparamaramavane ka tikungu; la pulatadre ki kiadredredrepete ku umawmase.

⁷ Alra kwi akaneane numi si baai ki masilrasilrau ki umawmase; kwi daane numi la paikaiya ki kadrwa ku daane ku amwane ka matiakukuru ka umawmase; malra ku laimai si baai ki vialralrakane ka umawmase; madha pakaicilri ki kadrwa ku amwane si la kela kitubi ku akiparalubane ku retesane.

⁸ “Lukamiyaiya kai lri kadalamaku numiane, mia ki lrau ki mialrealre paledra numiane; ku takadulane numi lri makakaai kipawdringai. Lai lri kainaku telrai ku apalribulane numiane.

⁹ Lu inulri numi, lri tara palraingaku numiane; lu kitubi numi, lri tara palraingaku. “Alaiyasi idrengere numi ku adredrepetane ki umawmase, ku akaelaelane ki umawmase, ku atulilisiane ki umawmase;

¹⁰ Alaiyasi pakane numi ki masilrasilrau ka umawmase, la ngulwadhane ku matiakukuru ku umawmase, kwini ngiathalringulu numiane kwi dradrimitane lri aledra, ku maungu lri avaiyane.

¹¹ Lri pacungulaku arake numiane, la arakai ku mathariri ku lamanemane pangulwadhane numiane, lai lri sapukwane numi si kagarange, ikai ki kalacengelravane lri kipakalreke numi, mia ki madrau ku berai ka acilai pangulwadhane ki mauivaivai, mia ki kai madrekadrekare palralrawthu ka tacebeane.

¹² Lri ikai numi ki tawlrakavane tupela tudaane, si ikai ki sakwa ka karwalai belenge ngiradhekane. Ku nagane numi lri kimapelaela pakela ki mwabaibalrithi, asi lwiyane yakai numi ki tawlrakavane tupela raedre ku kepale ki cekele, la tupela tudaane.”

Ku pakalreva ki paluludu ku Taisadrasadrane ka vai

¹³ Ku Tamatama amia kai, “Alaiyasi paluludu numi ki Taisadrasadrane ka vai si tusaniange ka vai, ikai kwini ki vai kai pia ku awnganeini; alaiyasi tukucingalre numi kikai saniange ka vai, la kai ikai kwini ki vai katwase mubabadhane, kaungu, kawriariva cacapange,

¹⁴ Lri patwalai numi nakwane malra ku akiragadhane. Lri paikaiyaku numiane kai kawmasane belenge mwakidruanga kiusakene, lai lri ikai numi kudra patarumarali ki cucungulane numi ka Yakubu ku kadaengane kisupisupilri ku akiragadhane. Tamatamaku; amiaku kikai pelaela.”