Isaiya 57 - Ngudradreadrekadhane Ka Sisiu 魯凱語聖經

Ku swa Iseraylri ngwalai ku tasukubane ki samiamiange si kikaelaela

¹ Lu pacai ku mwalecege ka umawmase, kadrwa ku umawmase ku piakidremedreme; ku kiasususu ku umawmase lu pacai, laka kadrwa ku umawmase ku kiararakete. Kwi lalasu lu pacai, lri dulru kai kimwa ki amatikurwane lubibilrili.

² Ku mapapedrenge ku kakwakudhane ku umawmase ngwalai ku tapacadhane si aseasane isadra.

³ Kunumi ka lapasalrisalriu ka umawmase naika wakela numi si kisaibange! Alau kai numi ka mathaithariri ki lataraivigi, ki latarapasalriu ki ababai, ki lapairairange.

⁴ Mwalralralrakai numi ki aneane? Kwini pawkeesa numi manunganga kwi ngudwi pwalrivalrivale numi ki aneane? Mapasaisalriu numi ka umawmase, ka matavuvulrucu.

⁵ Yakai numi tailebe ki masalese ka angatu si pasalrisalriu ki ababai si sawvalai, la iyalringa numi kai, wasukusukubu nai ki tarapatulalalake ka twaumase! Yakai numi lregelrege valrwalru ki barungulu tusapatarumarane ka waudriwdripi ki lalake numi si patarumara.

⁶ Yakai numi kwini malra ku maideelrethe ku lrenege si tutwaumase, la paralikiliki numi ku bava tusapatarumarane ka lamanemane, la papia numi liniane patarumara ku Taleke ka lrisi. Madalame amia numi nakwane kilakikai?

⁷ Wamwa numi ki abelenge ka lregelrege si patarumara, la ikai numi kwini pasalriu ki ababai si sawvalai.

⁸ Yakai numi ki lrilrikudru ki lrawlrawdru ki daane numi sukusukubu ki ngialisiane ka twaumase. Kunumi wacilringa numi nakwane. Mwalaimai numi, si mutapeapecane, la taelre apece kwini ki ara paisu dawlu ka siasilangane, pakai ku apangulwadhanane ku sawrikaikai ki kinawmasane numi.

⁹ Ngiapapadelreme numi ku sangwalreme si katwase sukubu ki twaumase ka Mulece, la pakatwase ki kiasikawlu mwadaaili silape ki twaumase, pakeela numi ku wamwa ka swadriadringi silape.

¹⁰ Kiadulrunga numi si sicaemanenga ku tasilapane numi ki latwaumase, la kainu kasulrisulri. Lri kibaaita ku puku kai ki langialisiane ka twaumase amia numi, ku kaika aru turamurane numi.

¹¹ Ku Tamatama amia kai, “Kwini pamwakuludru numiane ka latwaumase aneane, la tavuvulrucu numi nakwane, si karimurunga nakwane? La kai numi musakenenga nakwane, amani sa kawladhaku kai kawrivariva numiane?

¹² Pacengecenge nai la iyaiya numi. Lri putaluvaivadhaku ku tapasalrivane numi, ku samiamiange numi kai lri thingale paralubu.

¹³ Lu kitubi numi ku akiparalubane, ani kela si paralubu numiane kudra nisiludane ku lasamiamiange! Ku patengatengane, ku vaivalrigi lri palai liniane. Ai kudra lasatalutalu nakwane ku laumawmase lri ikai kai ki kadaengane panianiake, kwi lalasu lri ikai ki saniange ka lregelrege sukubu nakwane.”

Ku Twaumase pwakawnu ku aparalubane, si asulravane pawdringai

¹⁴ Ku Tamatama amia kai, “Ku kawkawluli ani papia nakwane kai. La mwalra kwini satelengane ki kadalranane! Si pudriadringai ki kadadalranane, pasikai liniane padulru patuelre!

¹⁵ “Kwaku ka sabebelengenga, ka saniange ka Twaumase; palralrawthaku ikai. Yakaiyaku ki abebeelengenga ka saniange, ai mialriaku ikai ki kiangeangeange ngitatasiwlriwlri si ngitatupela si ngiatatwalebe ka umawmase. Kudra ki ngiatatwalebe ku umawmase lri pasiwliwlianaku ku salrwane ku kidremedreme, ku kiangeange ngitatasiwlriwlri si ngitatupela ku umawmase lani malra ku sasiadradrama.

¹⁶ Patarwamaraku ku niake baai ki kawkawluli, kainaku lri siasilapenga ku tangilisianane lini, lai kainaku lri kapalralrawthunga papia liniane kalisi.

¹⁷ Ku kalisili liniane, amani sa karau si pasalriu, lakamani ku pathavunguli liniane, si cilri liniane. Kwi lalasu sakamiya kakelrathe, pacungucungulu katwatwase ku kadalranane lini.

¹⁸ “Wadrelenga naku ku kakwakudhane lini, ai lri suulrawana naku liniane. Lri ililukaku liniane, si palribulu liniane; lri sasaku ki watubitubi ka umawmase.”

¹⁹ Ku Tamatama amia kai, “Kasulivalivaata! Kasulivalivaata! Ku yadaili ku yadethe ku umawmase, lri patarumaraku liniane ku sulivatane; lri sulravaku pawdringai liniane.

²⁰ Ai ku manganga ka umawmase lri mia ki kai maka yadrengere ka laveke, ku bikabiki ngiabawbalrulu kai idrengedrengere; ku tapanianianiakane lini swaete ku ubulu matidingeselre.”

²¹ Ku Twaumaseli amia kai, “Ku pasalrisalriu ku umawmase kadrwa ku akasulivatane!”