Isaiya 56 - Ngudradreadrekadhane Ka Sisiu 魯凱語聖經

Ku Twaumase pwakawnu ku akawkawlane iniane ki maelane ka zuku ka umawmase

¹ Ku Tamatama amia kai ki kawkawluini, “Kunumi arakaiya ku dringelresane, asi lwiyane lri kelanga naku si palribulu numiane.

² Lri subulrubulrwaku baai kudra tengatengane ka paluludu ku Taisadrasadrane ka vai ku umawmase; lri subulrubulrwaku baai ki kiadaili ki manganga ka umawmase.”

³ Ku twapapalra ki Tamatama ku maelane ka zuku madha iyaiya kai, “Ku Tamatama kai lri palraingi nakwane lutumane taelre ki kawkawluini sukubu.” Ku kiatinumwalranga ku umawmase madha iyaiya kai, “Amaniaku kudra rudawdame ka angatu.”

⁴ Ku Tamatama amia kai liniane, “Alaiyasi paluludu numi ki Taisadrasadrane ka vai, si pia ku kadalameli ku awngane, la paluludu ku kiketeketeli,

⁵ ku nagane numi lri ikai ki daaneli ka Twaumase si kawkawluli kingulringalringau, silrialribate kudra ki takalra ku lalalake. Lri kai numi kikarimuru palralrawthu.”

⁶ Yakai kudra lamaelane ka zuku ku twapapalranga ki Tamatama, kwi lalasu madalame iniane, pasikaikai iniane, si kapatengatengane paluludu ki Taisadrasadrane ka vai, si pangimiamia ku takiketeketane ki Tamatama; ku Tamatama amia kai liniane,

⁷ “Lri ililukaku numiane mwa ki saniange ka lregelregeli ka Ziyungu, lanu ikai ki tainulrinulriane ki daaneli ikai ku sakiararagai, si tarumara ku patarumara numi pikai ki tapatarumaramarane ku Lama ka lrisi si waudriwdripi ka sapatarumarane. Ku daaneli lrika tainulrinulriane ki sanaka umawmase.”

⁸ Kudra waililuku pasiaulri mubalriu ki acaicali ki swa Iseraylri ka abebeelengenga ka Tamatama napwakawnunga kudra ki drumane ka laumawmase kalri mialri kidrarulu kiredelane liniane.

Ku tarasangililuku ki swa Iseraylri kiakaelaela

⁹ Ku Tamatama nawadrekasenga ki lasakamaelanane, ku angimiane lini ki waudriwdripi kainganai si lrede ki kawkawluini.

¹⁰ Ku Tamatama amia kai, “Ku lataradrangalrungalru mamukici makanaelre; kwi lalasu naika pakiapapawlringau ki kawkawluli, ai kwi lalasu kadrwa ku thingale. Kwi lalasu amani kudra twaredededele ka kai wathingale aleale ka latawpungu, kathane ku apecane kasipelrenge sipisipi sikakathane!

¹¹ Kwi lalasu miyaiya ki mapikaekane ka latawpungu, maraau kai pakamiamia; kwi lalasu nataraagwagu, ai kai wathingale ku manemanemane, makanaelre ngisasingikaai capange, silasilape ku amusadhaneini sikakathane.

¹² Kwini lamabubusuku amia kai, ‘Baadhaili ku bava! Takisamula ungulu, lwiya lrika mathaithariri ku akivavangane!’ ”