Isaiya 55 - Ngudradreadrekadhane Ka Sisiu 魯凱語聖經

Ku Twaumase lri kakalithi

¹ Ku Tamatama amia kai: Ku makadhame ku umawmase, bwala! Kawvai acilai ungula! Ku kadrwa ku paisu ku umawmase, bwala! Kela si langai ku akaneane si kane! Kai lri ara paisu, kai lri baai ku salangadhane, bwala langadha ku bava si mireke la ungulu!

² Asi ara paisu langai si kane ku kaika amaka kabucukane? Asi pasawlrawlra ku vai madu ku paisu, la kasilrasilrau? Kilalra kai vagali, singikaiya ku tapelaelaneli pia, lri dulru numi kisupilri ku mathaithariringa ku akaneane, lai lri kabucuku kwi abake numi.

³ Kawkawluli, kilalra kai vagali, bwala mwaili kai. Kicacaligira kilalra kai vagali, lanu dulru malra ku niake! Lri cegecegaku ku palralrawthu ka samakaketeketane numiane, kudra nipukawnanenga baai ki Davidi ku thalradhane lri patarumaraku baai numiane.

⁴ Lri paatarasangililukaku lai lri ka abebeelengenga ki sanaka kuni iniane, la pangukai iniane, si papia liniane pathingalane ku pukuli.

⁵ Kaiasasane lri sarubusu ki lakuni; kwi lalasu kunadruma kai wathingale muswane, kikainga lri satalu muswane makanaelre. Kwaku ka Tamatama, ka Twaumase numi lri pangimiaku kikai; ku saniange ki swa Iseraylri ka Twaumase lri patarumara baai muswane ku lrigu.

⁶ Saka adulrudulrwaneana kidringai ki Tamatama, kunumi silapa iniane; saka adulrudulrwaneana kidethe ki Tamatama, kunumi kitubia iniane.

⁷ Ku manganga ku umawmase cilria si katwase ku kadalranane ki ngialisiane; ku pasalriu ku umawmase ngibangula siwlri kwi kidremedreme. Kwi lalasu nai ngibangulu papia ki Tamatama, lanai tarumara ku kalithaneini. Kwi lalasu lri papia ki Twaumase, lani kipacepe iniane.

⁸ Ku Tamatama amia kai: Ku gathimili kaika gathimi numi; ku kadalrananeli kaika kadalranane numi.

⁹ Mia subelebelenge ka abebelenge ki kadaengane, ku kadalrananeli silrialribate ki kadalranane numi; ku gathimili silrialribate ki gathimi numi.

¹⁰ Kai vagali mia ki pasabu si udale ka twalai belenge mulebe, la kai siwlringa, ai pakalreke ki kadaengane, la cebe ku lataleke, ala ikai ku sapaivai ki wasabulu, ku wakanekane ku umawmase lri ikai ku taleke.

¹¹ Kai pukawnuli ka vaga ngiamia kikai. Kai vagali kai lri kawlrau lutuumane, lai lri pangimia ku nau pia iyaiyali, si pia ku takidremedremaneli.

¹² Lri kiraragai numi katwase Babilunia, si kasulivalivate siwlri mubalriu. Ku madrau ku tikiane ku lregelrege lri masiasilange senai; ku laangatu lri carecare kiraragai.

¹³ Ku tacebeane ki cecenekane ka angatu ku kadaengane lri ikai ku alrenge ka angatu; ku tacebeane bala ka ubulu ku kadaengane lri ikai ku navate. Kikai yai palralrawthu ka sapatuthingalane, ngulringavaili, si ku takaunganeli ka Tamatama.