Isaiya 54 - Ngudradreadrekadhane Ka Sisiu 魯凱語聖經

Sakialibake ki Tamatama ki swa Iseraylri

¹ Swa Yerusalrime, miasu ki amani kudra kailri tulalake ka ababai, ai kaiasasane wadulrusu senai si akwadrau kiraragai. Kwidra kai kiapulrialrialringau ku lalabaibai lri takaalra ku lamwabaibalrithi, lrika ngukakalra tulalake kwidra ki tamaikaiyane ki taelrelre ka ababai! Kwaku ka Tamatama amiaku kai pelaela.

² Paruswadrava kwi taikaiyanesu kwi balrawbau, la aru tulragi kwi calrisi ki balrawbau, la arakai ku makecenge ku sakedrekedre.

³ Papia viri vanale paruswadrau kwi kadaenganesu. Adravane kimalranga ki maelane ka zuku kwi kadaengane, kwi laumawmasesu lri siwlri mubalriu; ku tawlrakavane ku lacekele lri suetenga ku yakaikai ku laumawmase.

⁴ Madha kakiwcu, kaisu lri kiarubwanenga; kaisu lri kai kitumanemanenga. Karimura ku kaika takitulrepenganesu ku takaababadhanesu sa icengecengeananasu. Si la kai ngulringawnga ku sepelane ku taalibakanane.

⁵ Ku wabekace muswane ka Tamatama yai taelrelresu ka sawvalai; ku naganeini yai Tamatama ka abebeelengenga ki sanaka kwapingi. Ku saniange ka Twaumase ki swa Iseraylri yai amani ku palribulu muswane; warathudu sanaka yakawmasane.

⁶ Iseraylri, miasu ki yacengecenge ka taelrelre ka ababai, ka kiacilri ki taelrelre, si ka tatubitubiane ku kidremedreme. Ai ku Tamatama wamalramalra muswane pasiwlri kainganai. Ku Tamatama amia kai muswane:

⁷ Lri katwaseana naku muswane padaalru, ai madalamaku muswane turamuru, lri malramalraku muswane pasiwlri

⁸ Lu kalisiaku si kai pulringalringau muswane yai padawdaalru; ku dalamaneli muswane yai palralrawthu. Ku Tamatama ka palribulu muswane amia kikai pelaela.

⁹ Ikai ki saka Nua, pwakawnunga naku kai arakainga ku lriau si patelebe kawmasane. Kaiasasane lri pukawnunga naku ku kaika apapiane muswane kalisi, ku kaika apathavungane muswane.

¹⁰ Ku madrau ku lregelrege adulrwane velevele, ku tikiane ku lregelrege adulrwane patalula; ku thalradhaneli muswane lri kai ngivelevele palralrawthu, ku samakaketeketaneli ka sulivatane mialri ka palralrawthu kai akabalrithi. Ku makalithi muswane ka Tamatama amia kikai pelaela.

Ku lrika angimiane lukabibilrili ki swa Yerusalrime

¹¹ Ku Tamatama amia kai: Yerusalrime, kusu ka kwalrialrialri ku kidremedreme ka kadrwa ku paralubu ka cekele, kadrwa ku umawmase kulri kela sasa muswane. Lri arakaiyaku ku papacasane ku lrenege cegecege ku karwalaisu, si arakai ku tinukucingalrane ka lrenege tupela tukarwalai.

¹² Lri arakaiyaku ku duduli ka tinukucingalrane ka lrenege tudaane ku masasabebelenge, la arakai ku walikalikathe ku lrenege tulrawlrawdru ki cekele; ngithalringulu ki balingibingi la padakipi pasuete ku lasilu.

¹³ Kwaku ka Tamatama lri ngikakamaniaku bulru ki laumawmasesu, si patarumara baai liniane ku angiradhekanane si sulivatane.

¹⁴ Ku dringelresane lri pakagarange tuadrau muswane, lai lrika kadrwanga ku umawmase kulri kela mucekele muswane, si mukuludrusu; kaisu lri kitusinalremenga, si kiamudu.

¹⁵ Kainaku lri paralubu ku kiakaruburu muswane ku umawmase; ku makakaruburu muswane lri tara amaaki.

¹⁶ Wabekacaku ki taradarepe ku adreme; kwi lalasu twapwi ki talabwane, la darepe tuadreme. Wabekacaku ku kwapingi; kwi lalasu la malra ku adreme si katwase papacai.

¹⁷ Ai kadrwa ku navaevanga ku adreme kulri dulru dula muswane; sanaka wakukusu muswane ku umawmase, lri dulrusu tubalre kidrikisi. Lri palakebaku ki sasiakawluli, lalri akaci ku takisaibangane. Ku Tamatama amia kikai pelaela.