Isaiya 53 - Ngudradreadrekadhane Ka Sisiu 魯凱語聖經

¹ Ku kawkawluini twabalre: Aneane kulri kasalru kai pelaelaela nai? Ku puku ki Tamatama lri papia ki aneane paathingalane?

² Kikai yai takidremedremane ki Tamatama: Ku sasiakawluini lri mia ki saduduku ka warigarigarigi, mia ki bengelrai si ubulu ka yakai ki meameale ka kadaengane balace. Kai mathariri, la kai ngiesadhane, kadrwa ku takaiyane madu si kirarakete; ku tatulringavane tangivelevelane kaika ngitwatumane, kadrwa ku aukaiyane madu si pusamalra.

³ Kiatudrekase, kiacilri; la kiadili ki akwalriane, si ngilribate ku akwalriane ki kidremedreme. Ku laumawmase ngiatatamenge ku lringau makanaelre, kai papia iniane drele; kwi lasu kiatudrekase, kaita mwasakene tukucingalre iniane.

⁴ Ai, kwi lasu siamece ku akipakwalrianeta; kwi lasu la tukudrunga ku naika akwalrianeta. La ngibaalrelringata ka lasu lri kipathavungu iya, lri kilrumai ki Twaumase, si kipakwalri iya.

⁵ Pasiakai ki pasalrivaneta, kwi lasu kiaculrulu kadula; pasiakai ki tapasalrivaneta, kwi lasu kialrumai. Ngwalai ku takipathavunganeini la udringaita; ngwalai ku takilrumadhaneini la kisulrawta si udringai.

⁶ Miata ki lakiu ka amuli, la makitu katwatwasenga ku kadalrananeini. Ai ku tapasalrivaneta patuelre, ku Tamatama patalingikaiyane iniane patuelre.

⁷ Kwi lasu kiahakegai si kitusinalreme, kwi lasu kai avavaga. Kwi lasu mia ki lrulai ka kiu ka mwakalavalava ku akiculwane, mia ki nikiubawbalane ka kiu, kai avavagavaga.

⁸ Kwi lasu kiaemenge si kisaibange la kipapacai, kadrwa ku umawmase ku makalithi iniane. Kwi lasu ngwalai ku pasalrivane ki kawkawluli si katwase kawmasane, ngwalai ku tapasalrivane ki kawkawluli la kipikai ki apacadhane.

⁹ Unu kwi lasu kadrwana ku tangikarakacanane ku kakwakudhane, la kakadrwa ku tavuvulrucane, ai taelre ki manganga ka umawmase kidralreke; kwi lasu ku takidralrekane mwaridrusa ki satacekecekelanane.

¹⁰ Ku Tamatama amia kai: Kwi lasu ku takilrumadhane kwalri yai takidremedremaneli; ku pacaini yai sapatarumarane ki mwapasalriu. Kwi lasu lri drele ki mwabaibalrithi iniane; lri kalragi ku niake. Ngukai iniane, lri pangimiaku ku nau pia iyaiyali.

¹¹ Ku tapanianianiakane ngialribate ku akwalriane, ku sasiakawluli lri tupela malra ku akiragadhane; kwi lasu lri tara thingale ku takwalriane kai avutha. Ku madringelrese ka sasiakawluli lri ngwalai ku tathingalane nakwane lai takaalra ku umawmase kulri kadringelrese; ngwalai iniane lri pacepaku ku pasalrivane lini.

¹² Lakamani, lri paikaiyaku iniane ku taetalane ikai ki tasanianiange ka laumawmase, ikai ki marakace ngiradhekane ki umawmase pamalra ku lrigu. Kwi lasu ngiakakamani ngicacilri ku niake, si siamece ku angimiane ki pasalriu ka umawmase; kwi lasu siamece ku pasalrivane ki laumawmase, la pasikai ki tapasalrivane lini kitubi.