Isaiya 52 - Ngudradreadrekadhane Ka Sisiu 魯凱語聖經

Ku Twaumase lri palribulu ki swa Yerusalrime

¹ Swa Yerusalrime, pacuna si ngidrakale! Aru sapukwana! Saniange ka cekele ka Ziyungu, sipalimemelra kwi lrigu ka laimai! Ku maelane ka zuku kai lri ngisasingikainga capange mudaane ki lrawlrawdru ki cekelesu.

² Swa Yerusalrime, kalrabutha ki saruthukane patuelre! Twaladha ki thuvugu ngidrakale, si mubelenge ki taetalanesu! Kudra kiaravase ku swa Ziyungu ku laumawmase, kalrabutha ki sakikerenganesu kwi kicikici!

³ Ku Tamatama amia kai ki kawkawluini, “Sakikilangai numi tuduri, kadrwa ku umawmase ku wabaai ku salangadhane; laka thadaalrane, sangilralrainginga numi la kai baai ku paisu.

⁴ Samwa numi ka Izipiti ikaikai ngiakakamani numi; ai ku swa Asiria arakai ku adreme malra numiane ravase, kadrwa ku navaevanga ku paisu ku baai.

⁵ Kaiasasane, ikai Babilunia thadalrane ku tangimiane. Kiaravase numi; ka kadrwa ku baai numiane ku manemane. Kudra warathudu numiane ku kidremedreme ngiakalrilrigu turamuru, si kai telrai tudreadrekase nakwane.

⁶ Lri ikai ku vai, lri thingale numi nakwane ka Twaumasaku numiane, si thingale ala ka kawarivanga naku numiane.”

⁷ Kudra ngwalralregelrege kainganai ka nisikawlane, ku tapudrapalaneini ala mathariri turamuru! Kwi lasu walailai pelaela ku mathariri ku vaga, ka rathudane ka mathariri ka vaga, ka akaci ka mathariri ka vaga. Kwi lasu amia kai ki swa Ziyungu: Ku Twaumasesu magagemegemenga ku puku!

⁸ Drela, ku taradrangalrungalru ki cekele akwadradradrau tawtau; kwi lalasu masiasiasilange kiraragai! Kwi lalasu lri patakamacamaaca drele, ku Tamatama siaulringa mu Ziyungu.

⁹ Tawlrakavane ka Yerusalrime, akwadrava senai kiraragai! Ku Tamatama lri palribulu ki cekeleini, lri sasa ki kawkawluini.

¹⁰ Ku Tamatama lri arakai ku saniange ka puku palribulu ki kawkawluini; kai kiacaebe ki belenge kai umawmase lri drele makanaelre ku sapalribulane ki Twaumase.

¹¹ Katwasa, kirarimwa katwase Babilunia! Ku wangeale ku lalawbubulu ki daane ki Tamatama ku laumawmase, madha pungupungupungu ki kaika mabula ku lamanemane; lu katwase numi katakabulana.

¹² Madha karacange mawbebere; kai numi ka mwabebere. Ku Tamatama lri ikai cucubungu ililuku numiane; ku Twaumase ki swa Iseraylri lri singi lrilrikudru palakebe numiane.

Kiapakwalri ka sasiakawlu

¹³ Ku Tamatama amia kai: Ku sasiakawluli lri tulrepenge ku kibaaini ku awngane; kwi lasu lri kidrengedrengere, si malra ku madradraunga ku lrigu.

¹⁴ Takaalra ku wadrele iniane la makitu kasamali makanaelre, asi lwiyane kwi lringauini marilai, kai ngiamianga ki umawmase.

¹⁵ Kaiasasane, takalra ku kuni kulri ngwalai iniane si ngituluku; takalra ku latalialalai kulri nguvagane. Kwi lalasu lri thingalenga kudra makucingalre thingale kunadruma, si kilalra ku kaika matikaiyana ki umawmase.