Isaiya 51 - Ngudradreadrekadhane Ka Sisiu 魯凱語聖經

Sasasane ka vaga ki swa Yerusalrime

¹ Ku Tamatama amia kai: Kudra apia kipalribulribulu kiparalubu, si kitubitubi ku aparalubaneli, kilalra makanaelre kai vagali. Kidremedreema ku tatwaladhane numi; kidremedreema ku tangimiamiane numi.

² Kidremedreema ki cucungulane numi ka Aberahame; kidremedreema ki twalalake numiane ka Sara. Sa dawlaku ki Aberahame, kadrwa ku lalakeini; ai swabulrubulrwaku si baai iniane, ala ikainga ku kaika amaka asiasipane ku lagagane.

³ Lri kakalithaku ki Yerusalrime, si sasa kudra yakai ki tawlrakavane ku laumawmase. Kudra aubulanenga ku kadaengane lri mianga ki Idingi ka mawivaivai; ku tawlrakavane lri paababengelradhane ki Tamatama. Ikai kwini lri tara ikaai ku sakiararagai, yakai ku kiarararagai, yakai ku lingau ku wadrengedrengedrengere, kiaseaseasene ku waseasenai.

⁴ Kawkawluli, kilalra; kunili, kicacaligira kilalalra: Kai hulriceli lri baadhaku ki sanaka kuni; ku dringelresaneli lri mailuku baai liniane ku ledra.

⁵ Lri makakaaiyaku palribulu liniane; ku apamalebeaneli lri kelanga. Lri ngikakamaniaku rathudu ki sanaka kuni; ku yadaili turamuru ku lakadaengane ka yakai kabicelrakane ki laveke mwakalavalava nakwane, sidramadrama ku amwaneli palribulu liniane.

⁶ Kwi lalasu lri paswabelenge, lai masiasirare ki kadaengane. Kai subelebelenge lri mia ki ebelre kawlrau, kai kadaengane lri mia ki laimai kapapurici; kai yakai ki kadaengane kai umawmase lri mia ki alralregele pacai. Ai ku sapalribulaneli kai lri idrengere apalralrawthu; ku tapamalebeaneli lri ikai palralrawthu.

⁷ Kudra wathingale ku aparamaramavane, ku kidremedreme laka tapikaiyane ku sabulrwaneli ka umawmase, kunumi kilalra kai vagali. Madha mukulukuludru ku tusinalremeane si saulralrakadhane ki palrapalra;

⁸ kwi lalasu lri mia ki puripurici ka laimai ka kiakane ki lubalubai. Ai ku sapalribulaneli kai lri idrengere apalralrawthu; ku tapamalebeaneli lri ikai palralrawthu.

⁹ Tamatama, pacuna si paralubu nakwane! Mia kunadruuma, arakaiya ku pukusu palribulu nakwane! Amanisu ka wamalra burau pawtatiki ki maelaelane ka waudriwdripi ikai laveke ka Rahabe, amanisu ka waculrulu ki baralebale.

¹⁰ Amanisu ka pakameale ki laveke, ki mwaadringi ka acilai la akameamealane. Yakaisu ki mwaadringi ki laveke sudalrane ku madrau ka kadalranane, la pangukakai lribate ki kiapalribulu muswane ku laumawmase.

¹¹ Kudra la kiapalribulu muswane ku laumawmase lri kainganai siwlri, kiraragai kela Yerusalrime, la kiraragai senasenai, si akwadradradrau karariau. Kwi lalasu lri palralrawthunga kiraragai, kai lri tubinga kwalri ku kidremedreme.

¹² Ku Tamatama amia kai: Amaniaku, amaniaku ka wasasa muswane. Asu kakiwcu ki lri tara paacai ka umawmase? Kwi lalasu ku niake lini lau kaika malrailragi ki ubulu.

¹³ Marimurungasu ki wabekace muswane ka Tamatama? Aneane ku wapaipai ku make subelebelenge? Aneane ku wacegecege ku karwalai ki kadaengane? Asu ka takakiwcane ki wahakegai muswane? Mukuludru ku lisiane ki kiasanu amwamudu muswane ka umawmase? Kwi lisiane ki lalasu kai lri kabebetethe dula muswane.

¹⁴ Ku kiakerenge ku umawmase lri padaalrunga si ngilralrainginga; kwi lalasu lri kisupilringa ku akalragiane ku niake, lai lri kabucuku si kai lri kawrawrame.

¹⁵ Tamatamaku, ka Twaumasesu; ku naganeli yai Tamatama ka abebeelengenga ki sanaka kwapingi. Lu velevelaku ki laveke, mababikabiki kai laveke.

¹⁶ Amaniaku ka wapaipai ku make subelebelenge, la cegecege ku karwalai ki kadaengane. Amiaku kai ki Yerusalrime: Amanisu ku kawkawluli! Lri papiaku muswane bulru; lri arakaiyaku kai alrima palakebe muswane.

Aliakainga ku sakwalrialri ki Yerusalrime

¹⁷ Yerusalrime, pacuna si ngidrakale! Ngidrakala, si acegecege! Sa pathavuthavungu ku Tamatama, waungulusu ku lisiane ka kupu, sa ungulungasu la lridrawdrawdrawnga.

¹⁸ Ikai ki sakacekelesu, kadrwa ku umawmase ku waililuku muswane; ikai ki sakacekelesu, laka kadrwa ku waarake muswane.

¹⁹ Sa kipadradresengesu ku masasilange ku amatikurwane: Ku kadaenganesu kiakabebetethe ki tamakakaruburane ki apwi; ku laumawmasesu kiakabebetethe ki silravane si lrabu. Kadrua ku natangeeanga ku umawmase ku kaiyanganai sasa muswane.

²⁰ Ku sakacekelesu yakai ki lakadalranane ki cekele retese tubakebake; kwi lalasu mia ki salawngane ka kiapuamiane ki taraalupu. Kwi lalasu wathingale ka lisiane ki Tamatama, la tarumara ku sakaelaelane ki Twaumase.

²¹ Kwalrialrialri ka laumawmase ki Yerusalrime, mabusukunga numi, ai kaika ngwalai ki bava si kabusuku.

²² Ku abebeelengenga ka Tamatama pasiakai numiane kidrikisi ku vaga, amia kai: Lri pakatwasaku numiane kwini palridrawdrau numiane ka kupu; kwini kupu amani sa kalisilisiaku wabaadhaku numiane; kai numi lri pelanga ungulu.

²³ Kikai kupu lri baadhaku ki wadredredrepete numiane ka laumawmase, lri baadhaku kudra ki patwabakebake numiane ikai ki kadalranane ki cekele, si ngubabelenge ki kinawmasane numi kudra laumawmase.