Isaiya 50 - Ngudradreadrekadhane Ka Sisiu 魯凱語聖經

¹ Ku Tamatama amia kai: Lu kidremedreme numi pakatwasaku ki tina numi? Luka ngimiyaiya kwini, ainu ku baaili ku sapisadrane ku pacase? Lu kidremedreme numi kialangadhaku numiane baai ki taakiamaneli, wabaadhaku ki aneane kilangai? Ku kikilangai numi ngwalai ki pasalrivane numi; ku kicilri ki tina numi ngwalai ki ngangane numi.

² Lu kelaku palribulu, ani kakadrua ku umawmase? Lu dawlaku, ani kakadrua ku twabalrebalre? Twaramuraku si kai maka dulru palribulu? Lu drekasaku, mameale kai laveke; paaenaenadhaku ki kadravane, ku kange la ngwalai ku takakadrwane ku acilai si pacai.

³ Wadulrwaku pakadradrimiti kai belenge, mia ki watubitubi ki wapacai ka umawmase.

Ku sasiakawlu ki Tamatama pasalaladha

⁴ Ku abebeelengenga ka Tamatama wabulru ku lrika akawrivaneli, ku lrika adulrwaneli sasa ku kwalrialri ku kidremedreme ku umawmase. Luka mialrealre, waceace nakwane, la urikaiyaku sidrama ku sabulrwaneini.

⁵ Ku abebeelengenga ka Tamatama pathingale nakwane; kainaku kiaecebe, si baebalre.

⁶ Singiakaaiaku ki umawmase lu lrumai ki drelrekeli, lu lrubace ki ngisingisili, lu sungalrai pikai ki lringauli; kiadilaku ku tusinalremeane ki umawmase.

⁷ Ku tusinalremeane lini kai lri dulru kabebetethe nakwane, asi lwiyane ku abebeelengenga ka Tamatama paralubu nakwane. Magaarangaku kiadili patuelre. Wathingalaku ka kaika akiarubwanane.

⁸ Asi lwiyane ku Twaumase yakai thili nakwane, si pusakaikai nakwane kawriva, aneane kulri thuru kukusu nakwane? Nai karededele mwa ki tasaibaibangane! Ngisasingikaiya ku akukusuaneini!

⁹ Ku abebeelengenga ka Tamatama lri ngikakamani pasikai nakwane kidrikisi ku vaga; aneane kulri dulru putaluvaivai tupasalriu nakwane? Ku wakukusu nakwane lri kawlrau makanaelre, mia ki supilri ka laimai ka kiakane ki lubalubai.

¹⁰ Sanaka mwasakene ki Tamatama, si kilalra pasalaladha ku sabulrwane ki sasiakawluini ku umawmase, adravane ngukakaikai ki dradrimitane, lrika thadaalrane kasalru ki Tamatama, si satalu ki Twaumase.

¹¹ Sanaka mabebetethenga ki umawmase, lri kitulisi ki apianeini ku ngialisiane. Ku Tamatama paiya kikai kelrete: Ku ngimiyaiya kai ku umawmase lri tara kisacepe ki amatikurwane!