Isaiya 5 - Ngudradreadrekadhane Ka Sisiu 魯凱語聖經

Senai ki babududu

¹ Kilalra kai pasikaili numiane senai kai vaeva ka senai, vaeva ka senai ka ngwakai ki talragili si babududuini: Ikai ki twalrange ka lrelrelrege, ku talragili twaumawma tutalu vale ku babudwane.

² Kwi lasu walruku ki dae, si mulrenege. Kwi lasu la lredreke ku mathariri ku salredredreke ka budu. Kwi lasu la tudaane tuabeelenge ku palralramathane; kwi lasu la lruku ku tapepeane ki budu ka tanke. Kwi lasu siadramadrama ku akalremane ki budu, la kai thingathingale, kwi budu patuelre ala ka maalriu kakedepalre.

³ Lakamani, kwi talragili amia kai, “Swa Yerusalrime si swa Yuda ka laumawmase, ala cubunga ki babududuli si awnganeli mapelaela.

⁴ Kainaku pwadriadriadringai sirapale? Ani pumadru kai maalriu ka budu, ani kai pumadru ku malimeme ka budu ka sidramadramali?

⁵ “Drela! Lri tungimiyaiyaku kai marasikai ki babududuli; lri akucaku mwalra kai ngiathalringulu kai saravadrane, si buruku kai ngiathalringulu kai apalribulane kai raedre, lani kela ku lawaudriwdripi si kane kai ki lamadru ki ivai, si lralrangadre pakalisi.

⁶ Lri pacebeaku kai ki kadaengane pasuete ku laubulu; kainaku lri kaciane pudriadringai ki cebe ki budu, lai kainaku mamelre ki dae; lri pacebeaku kai ki dae ku bala ka ubulu si cecenekane ka angatu. Lri pakeelaku ku payadrengere ki ememe ku apaudalane.”

⁷ Kai swa Iseraylri amani ku babududu ki Tamatama ka abebeelengenga ki sanaka kwapingi; kai laumawmase ki swa Yuda amani ku lredrekeini si marasikaikai ka babududu. Kwi lasu siadrama ku apangimiane lini ku madringelrese, ai nipatakamacamacane drele ku papacai si patueraerai ki umawmase! Kai lasu siadrama liniane ku akapapedrengane ku tangivelevelane, ai ku lingau ki nisidrurudrurwane kialalra madu ikai ki druanga!

Malisi ka tangivelevelane ki umawmase

⁸ Lri kipadradresenge numi ku amatikurwane! Yakainga kwi kadaengane numi si daane, la kararaauana numi ku kadaengane si daane. Ku palrapalra adravane ka aikaiyane kadrwa, la maalrana numi saelrelre kilakikai.

⁹ Kialalraku ku taiyane kai ki Tamatama ka abebeelengenga ki sanaka kwapingi, “Kikai la tathaithariri ka tadradrau si laabeelenge ka daane lri akinaburukane, kadrwa ku umawmase ku lri ikaikai.

¹⁰ Ku mangeale ka umane ku babududu lrika mangeangeale ka kunsenge ku nipeane ku bava; ku akumangeale ki cepenge ku sapaivai ku mugi lu kitalekenga kai lri maka akuvaeva ki cepenge.”

¹¹ Lri kipadradresenge numi ku amatikurwane! Twasangidrakalane numi ungulu ku sapukwane ka bava, la taleare numi ungulu ku bava ka takabusukane kai pulringalringalringau.

¹² Ikai ki wararukurukudrane, la kadalame numi kilalalra ki lapatungutungu, ki lakilrikilringi, ki lakulralru, si pingiadradrau ungulu ku bava, kai pulringalringau ku tatumatumanane ki Tamatama.

¹³ Ngwalai kikai, lri kipaacaicali numi; ku tara sangilililuku numiane lri kiara silravane pacai, ku laumawmase lai lri kiara kadhamane pacai.

¹⁴ Kai swadriadringi manwanganganga lri kane lrungulrungu liniane, kudra yakai Yerusalrime kirararagai ku kiamatikaikai si mapeapeaperau kudra laumawmase lri karededele kalrungulrungu kamudu.

¹⁵ Lri kiarubwane makanaelre; ku ngiakalrilrigu lri kitwalebe.

¹⁶ Ku Tamatama ka abebeelengenga ki sanaka kwapingi lri arakai ku dringelresane pathingalane ku sanianganeini; ku sanianiangenga ka Twaumase lri arakai ku asaibangane ki kawkawluini pelaela ku sanianganeini.

¹⁷ Ku atawlrakavanenga ku cekele wacebecebenga suete ku laubulu, ku la lrulai ku kiu yakai kwini kanekane ku ubulu, ku la tatitiki ku lakiu la mialri ikai kwini kidringai ku laakaneane.

¹⁸ Lri kipadradresenge numi ku amatikurwane! Kiaruthukunga numi ki apasalrivane.

¹⁹ Amia numi kai, “Pakirarimwa ki Tamatama pia ku apianeini; lata dredrele ku tapianeini. Ku saniange ka Twaumase ki swa Iseraylri ani pangimia ku kikaikakeini; lata thingale ku takidremedremaneini.”

²⁰ Lri kipadradresenge numi ku amatikurwane! Kai numi wathingale drele ku pacengecenge si pasalriu, la apabaebalre numi ku ledra si dradrimitane, ku malimeme si mapalili la kai numi apathathingale.

²¹ Lri kipadradresenge numi ku amatikurwane! La ngitatu malrigilrigiliana numi!

²² Lri kipadradresenge numi ku amatikurwane! Kunumi yai bava si akaneane sikakathane; ku garangane numi si garangane ki kidremedreme numi kathane lu ungulu numi ku bava si makalilisi lakathane.

²³ Kudra wabaai numiane ku pavangalre la paubere numi ki hulrice, la tu kakadrwa numi ku kindri ki kadrwa ku pasalrivane ku umawmase.

²⁴ Lakamani, mararamau ki marudame ka ubulu ka yakai ki madrareeange ki apwi kudaladalai, ku balace numi lri karudame, ku bengelrai numi lri kalraici; asi lwiyane wabaebalrenga numi ku hulrice ki saniange ka Twaumase ki swa Iseraylri, la pasiwlri numi ku sabulrwane ki Tamatama ka abebeelengenga ki sanaka kwapingi.

²⁵ Lakamani, ku Tamatama lri papia ki kawkawluini kalisi; lai ara alrima lrumai liniane. Kai lregelrege lri ngivelevele, ku kinawmasane ki lawapacai lri kaabate ikai thili ki kadadalranane, mia ki talrangeane. Lu kelanga kwidra, ku lisiane ki Tamatama kaina lri kawlrau, lri ara alrimana lrumai liniane.

²⁶ Ku Tamatama lri pakatwase ku sapatuthingalane si dawlu ki swa adaaili ka vaeva ka kuni; kwi lasu lri thethevece, lri patwalai ki talikaiyane ki kadaengane dawlu liniane; kwini lalasu lai lri kirariimu kainganai kela.

²⁷ Ikai liniane kadrwa ku kiadulru, laka kadrwa ku twabakebake; kwi lalasu kai ngiakatatutudru kai masipelrepelrenge. Kwi lalasu walrithethe ku lakete lini, la pudriadringai erece ku sawculrungane ki kece lini.

²⁸ Marangisi ku lraili lini; la tiberethenga ku bu lini. Ku lrubungu ki rigi lini makawlukulukulu ki lrenege; ku palridingi ki sakikaruburuburane lini mia ki alrilrawgu lu ngipalridingi.

²⁹ Ku kwapingi lini makakaraleale, mia ki raiyungu lu giringi, la mia ki lrulai ka raiyungu ka wapana, kadrwa ku umawmase ku lri dulru palribulu.

³⁰ Lu kelanga kwini vai, kwini lalasu lri papia ki swa Iseraylri giringi, mia ki lingau ki bikabiki ki laveke. Drela kai ki kuni! Yainu kidruanga ku dradrimitane si kiapakwalrialri! Ku ledra kiakabungunga ki dradrimitane.