Isaiya 49 - Ngudradreadrekadhane Ka Sisiu 魯凱語聖經

Iseraylri—ledra ki sanaka kuni

¹ Laumawmase ki yakai kabicelrakane ki laveke ka kadaengane, kunumi bwala kainganadha si kilalalra! Kunumi ka yadaili ka laumawmase, kunumi kilalalraili makanaelre! Sa kainaku kitulalakeana, ku Tamatama wapilriinga nakwane; sa kainaku katwaseana ki barange ki ina, swanaganeenga kawriva nakwane ku Twaumase.

² Ku Twaumase pangiamia ki dramu kai vagali; ngiakakamani ka palakebe nakwane. Ku Twaumase wabekace nakwane pangimia ki rangirangisi ka lraili, si lri dulru ngisasingikai pakaduai ku alrailane.

³ Ku Twaumase amia kai nakwane: Iseraylri, kusu sasiakawluli muswane; kai laumawmase lri ngwalai muswane si drengedrengere nakwane.

⁴ Amiaku kai: Kiasamulaku kaungu, ai kadrwa ku vai; pakaelreaku ku puku, laka kadrwana ku navaevanga ku ngiamia. Ai lri dulrwaku satalu ki Tamatama kalri pasikai nakwane pelaela ka kadrwa ku pasalrivane; ku Twaumase lri singikai ki kakwakudhaneli si pakalreva nakwane.

⁵ Sa kainaku kitulalakeana, ku Tamatama siakawlunga nakwane asasiakawlu iniane; lri ililukaku pasiwlri ki kawkawluini ka Yakubu, lri malraku pasiwlriwlri ki ngiasarade ikai ki druanga ka laumawmase ki swa Iseraylri. Ku Tamatama patarwamara baai nakwane ku lrigu; ku Tamatama amani ku tatwaladhane ku pukuli.

⁶ Ku Tamatama amia kai nakwane: Sasiakawluli, lri baadhaku muswane ku taingeane ku makucingalre ka awngane: Lri pakatwasaku muswane pangiradhekane ki lazuku ki Yakubu, la alra iluku pasiwlri ki agagane ki Iseraylri. Lai lri paaledraku muswane ki sanaka kuni, kai sapalribulaneli lani salraelre kawmasane.

⁷ Ku tarapalribulu ki swa Iseraylri ka sanianiangenga ka Twaumase amia kikai: Kudra kiasidreadrekase ki umawmase, kiakavalracevace ki sanaka kuni, kiatuduri ka umawmase ki warathudu, ku latalialalai lri ikai cucubungu muswane acegecege si sukubu, ku matiausakene ku umawmase lri mialri papia muswane sukubu. Kikai miyaiya kai lri tara ngimiya, asi lwiyane ku sanianiangenga ki swa Iseraylri ka Twaumase wapilringa muswane; ku Tamatama lri tara paluuludu ku pukawnungaini.

Tatupelane tucekele Yerusalrime

⁸ Ku Tamatama amia kai kawriva ki kawkawluini: Sana kela kudra lrika atarumarane muswane ka vai, lri kilalraku muswane; sana kela kudra apalribulane muswane ka vai, lri paralubaku muswane. Lri palakebaku muswane, lri sirapalaku muswane, ngwalai ku tamakaketeketanesu ki sanaka umawmase. Lri pasiwlriaku muswane mwa kwidra ki cinilrianenga ka taikaiyane, lasu tupela tucekele.

⁹ Lri iyaku kai ki lakiaravase: Lri ngilralrainginga numi! La iya kai ki yakadradridrimitane ka umawmase: Lri drelenga numi ku ledra! Kwi lalasu lri mia ki kiu ikai ki ububulane kanekane ku ubulu; ku abelenge ka lregelrege amani ku takanekaneane lini ka mawbubulu.

¹⁰ Kwi lalasu kai masilrasilrau kai makadhakadhame. Ku paramuru ka cengelrau kailri maka dula liniane; asi lwiyane kudra mathalrai liniane lri ililuku liniane; kwi lasu lri iluku liniane mwa ki yakai ku berai ka acilai.

¹¹ Lri ikaiyaku ki abelenge ka lregelrege sudalrane, tukadalranane ku maadrau ka kadalranane si baai ki kawkawluli.

¹² Ku kawkawluli lri twalai adaaili kainganai; lri twalai tali viri, twalai tali dradha, lai lri twalai tali lrawdru kavai Aswane kainganai.

¹³ Lasubelebelenge, senadha! Kadaengane, putariria! Lalregelrege, akwadrava drengedrengere! Asi lwiyane ku Tamatama lri sasa ki kawkawluini, lri kakalithi ki kwalrialri ka kawkawluini.

¹⁴ Ai ku laumawmase ki Yerusalrime amia kai: Ku Tamatama wacilringa mitane! Ku Tamatamaata marimurunga mitane!

¹⁵ Ngwalai kikai, ku Tamatama amia kai: Ku tina mariimuru ki wathuthuthwana ka dainini? Lri dulru kai kadalame ki lrabuthuini ka sawvalai? Kai tina adravane karimuru ki lalakeini, lri kai nau karimuru muswane!

¹⁶ Yerusalrime, lri kainaku karimuru muswane lutuumane; ku naganesu wapacasaku pikai ki satapaili.

¹⁷ Kulri tupela tuumawmase muswane lri padaalrunga si kela; kulri amudu muswane lri padaalrunga katwase.

¹⁸ Masiasirara drele pangithalringulu ku tangimiamiane: Ku sakacekelesu yaelrelrenga, kwi lalasu lri siwlringa mubalriu! Kwaku ka Tamatama lri papiaku ki niakeli kiketekete: Lri ngwlaisu ki sakacekelesu si ngilralrigu, mia ki kiarakerakete ka ababai lu ngilralrigu ku lasiluini.

¹⁹ Ku kunisu nakiaburuku kikabebetethe; kikainga kai maka masaininunga ku wakela siwlri ku laumawmase. Kudra napamaki si mucekele muswane lri katwasenga kidaili muswane.

²⁰ Lri ikai ku minaka vaalane, kudra lakiatulalake ikai ki taacaicaliane ku umawmase lri iya kai muswane: Kai kadaengane swatiki turamuru; ngwarikai nai ku swadradrau!

²¹ Lukamani kwidra lri ngiaiyasu kai: Aneane ku pasiakai nakwane tulalake kai tathathatha kai lavavalake? Ku lalalakeli wapacainga makanaelre, lalri kainaku maka tulalakenga; mwaberaku ikai ki maelane ka cekele, la mwa kidruanga acaicali, aneane ku twaadrau kikai ki lalavavalake? Tangeangeeaku kwalrialrialri; twalai inu kilakikai lalalake?

²² Ku abebeelengenga ka Tamatama amia kai ki kawkawluini: Lri papiaku ki lakuni pathingalane kai kidremedremeli, la papia ki sanaka umawmase putaluvaivai ku sapathingalane; kwi lalasu lri ibibi ki lalakesu ka sawvalai, lai aba ki lalakesu ka ababai si kainganai siwlri.

²³ Ku latalialalai ki lakuni lri sitama ki lalalakesu; ku lataelrelre lini lai lri sitina ki lalalakesu Kwi lalasu lri ikai cucubungu muswane si pidruru sukubu, la dilace ku thuvugu ki drapalesu. Lukamaninga kwidra lri thingalesu ala ka Tamatamaku; ku mwakalavalava ku aparalubaneli ku umawmase kailri kasulri lutuumane.

²⁴ Lri dulrusu patwalai ki alrima ki garagarange ribici ku niravasane ku lamanemane? Lri dulrusu patwalai ki alrima ki magagemegeme ribici si palribulu ki kiaravase ka umawmase?

²⁵ Ku Tamatama amia kai tubalre: Ku ngimiyaiya kai lri padaalrunga si ngimia. Ku yakai ki garagarange ku kiaravase ku umawmase lri kipalribulu; ku yakai ki alrima ki ngiakarakacane ka talialalai ku niravasane ku lawbubulu lri kiribici kimalra. Lri kiecebaku ki badhasu; lri palribulaku ki lalalakesu.

²⁶ Kudra wadredredrepete muswane lri pamapapacapacadhaku liniane; kwi lalasu lri ngwalai ku taungulane ku erai lini si kabusuku tubakebake. Lukamani kwidra kai kiacaebe ki belenge lri thingale, amaniaku ku palribulu muswane ka Tamatama; amaniaku ku tarapalribulu muswane, ka sapupukuanenga ka Twaumase ki swa Iseraylri.