Isaiya 48 - Ngudradreadrekadhane Ka Sisiu 魯凱語聖經

Ku Twaumase magagemegeme ki lukabibilrili

¹ Laumawmase ki daane ki Yakubu, kilalra kikai vaga! Swa Iseraylri numi, ka mwabaibalrithi ki Yuda. Papia numi ku nagane ki Tamatama kiketekete, wasukusukubu nai ki Twaumase ki swa Iseraylri amia numi; ku patengatengane kathane kwi ngudwi numi kadrwa ku kidremedreme, vaga sikakathane ka kawarivariva.

² Lu kidremedreme numi umawmase nai ki saniange ka cekele, ku satalutalu nai yai Twaumase ki swa Iseraylri, ku naganeini yai Tamatama ka abebeelengenga ki sanaka kwapingi.

³ Ku Tamatama amia kai ki swa Iseraylri: Paswalanga naaku yugingi ku lrika angimiane; lri pangitutulukaku pangimia kilakikai.

⁴ Wathingalaku ka makelrathesu kai singikaikai ki palrapalra, ku kelrathane mia ki adreme, ku kawlukulane mia ki lriwlu.

⁵ Wayuginginga naaku ku angimianesu lukabibilrili, sakaiyana ngimia nipelaelaneenga, ku kaika adulrwanesu kilakikai yai taiyane ki kaika patengane ka twaumase iya, ka twalai ki tusamiamiangesu.

⁶ Ku yugingingali ngiamianga patuelre; lri tara tarumaarasu ku yugingili ka patengatengane. Kikainga lri pelaelaku muswane ku bavane ku angimiane lukabibilrili ka niseketane ka kaika thingalesu ku paswalala.

⁷ Sa keelanga kaiasasane pangiamiyaku kilakikai; kilakikai kaika kilalrananasu; ngwalai kikai kaisu lri maka kawriva, wathingalengaasu.

⁸ Unu, kaisu kialalrana; unu, kaisu wathingale; unu, wacelrepesu kwi calringasu. Wathingalenga naaku kwi tavuvulrucanesu; sa ngibwalesu ki barange ki tinasu amanisu ku tarabaebalre.

⁹ Kulri ka adrengedrengerane ki umawmase ki naganeli, lri kiadiliana naku kai lisianeli; lri apapelaelana naku kiadili, kai amudu muswane.

¹⁰ Kialrialringavaku muswane, ai kai ngiamia ki nidrungurane ka gingi; arakaiyaku ku akwalriane ka apwi kilrialringau muswane.

¹¹ Ku piali kai ngiapapasikaiyaku. Kainaku lri pakiarubwane kai naganeli; kainaku lri pakisupilri ki drumane ka latwaumase kai lriguli.

Sairuse, ka pilri ki Tamatama ka tarasangililuku

¹² Yakubu, kilalra kai aiyaneli! Pilrili ka swa Iseraylri, kilalra! Twaumasaku, ka sapathagili, ka satwalrepenge; kathanaku ka Twaumase!

¹³ Ngiakakamaniaku ka wacegecege ku karwalai ki kadaengane; arakaiyaku kai vanaleli paipai kai make subelebelenge. Wasarubwaku ki subelebelenge si kadaengane, kai subelebelenge si kadaengane la makakaai acegecege ikai cucubungu nakwane.

¹⁴ Kunumi bwala yelrelrea makanaelre, si kilalalra kai akawrivaneli! Kadrwa ku natangeeanga ku twaumase ku wayuginginga, ku pilrili ku umawmase lri kikaruburu ki swa Babilunia; kwi lasu lri singikai ki takidremedremaneli pia ku awngane.

¹⁵ Amaniaku ka papia iniane kawriva, ka wadawlu iniane; waililukaku iniane kainganai, la pangiradhekane iniane.

¹⁶ Bwala mucucubungaili, si kilalra kai taiyaneli! Singipathaagilaku pitaluvaivai kawriva numiane, si kai vagali tengatengane patuelre. Kaiasasane ku abebeelengenga ka Tamatama wabaainga ku Rini nakwane, siakawlunga nakwane.

Ku apangimiane ki Tamatama ki kawkawluini

¹⁷ Saniange ki swa Iseraylri ka Twaumase, ka palribulu muswane ka Tamatama amia kai: Amaniaku ku Tamatama ka Twaumasesu; pakai ku amusadhanesu, wabulrwaku muswane; peaelaelaku ku lrika angukaiyanesu ku kadalranane.

¹⁸ “Anatumane la kilalrasu kai drekaseli amiaku! Alaiyasi kilalrasu kai drekaseli, ku sulivatane lri mia ki kadravane mwalwaludru kai kareteretege; ku dringelresane la mia ki bikabiki ngibawbawbalrulu kainganai.

¹⁹ Ku mwabaibalrithi muswane lri mia ki enai ku kalrane; kainaku lri pakiamudu liniane palralrawthu.”

²⁰ Bwala twaladha Babilunia mubere! Ngilralrainga katwase! Akwadrava pelaela kikai mathariri ka vaga; mwa kidrwadrwadruanga salraelre pelaela: Ku Tamatama palribulunga ki sasiakawluini ka swa Iseraylri!

²¹ Ku Tamatama sa ililuku ki kawkawluini ngukakai ki aenaenai, kwi lalasu kai makadhame; ku Twaumase patwalai ki alrisapesape pangibwale ku acilai; Ku Tamatama wasititi ki alrisapesape, ku acilai la ngiburaburaburainga kainganai.

²² Ku Tamatama amia kai ki manganganga ka umawmase: Kai numi lri ikai ku sulivatane.