Isaiya 47 - Ngudradreadrekadhane Ka Sisiu 魯凱語聖經

Ku Babilunia kiasaibange

¹ Ku Tamatama amia kai: Swa Babilunia, mulebea; twaladha ki taetalanesu mulebe, nenea ikai cakena belenge ki thuvugu. Kunadruma miasu ki tawvailekete ka kaiyana marudrange, ka kadrwana ku umawmase ku pamalebe ka cekele. Ai, kaisu lri kamaninga kudra thaithaariri kasulrapele; aduringasu.

² Lri pasilribusu, paalamenge ku mugi! Lri mwalrasu ku sangitatamengane! La mwalra ku kunu, si padrelane ku tulungu! La talubalre ki kadravane.

³ Ku laumawmase lri drele ku tavilralrakananesu, lri drele ku tangilisiananesu. Lri bilriaku muswane; kadrwa ku umawmase kulri maka ruthuku nakwane.

⁴ Ku saniange ka Twaumase ki swa Iseraylri pwalatadrenga naiane; ku naganeini yai Tamatama ka abebeelengenga ki sanaka kwapingi.

⁵ Ku Tamatama amia kai ki swa Babilunia: Madha avavagavaga, lu nenea ikai ki kadradridrimitane! Kadrwanga ku umawmase kulri pasudalepe muswane ka “Tinatina ki sanaka kuni.”

⁶ Namalisinga naku ki kawkawluli, si kai ngitatu kawkawlunga liniane. Napamakinga naku liniane pikai tailebe ki pukusu; papia liniane kadrwa ku sulrapelanesu, papia ki latarudrawdrange laka kadrwa ku kalithanesu.

⁷ Lu kidremedremesu miakau lrika taneneanengasu ikai ki taetalane ki taelrelre ki talialalai, si kai tumanemane kilakikai, la kai kidremedremedreme ku lrika angimiane kilakikai.

⁸ Kusu ka ngialralrailrailraaingi ki akiragadhane ka umawmase, kilalra! Swatelrai kai taetalaneli amiasu; ngiapapasudalepesu ka saniange mia ki Twaumase, ka kadrwa ku umawmase ku kialekete muswane. Mia kau kaisu lri awalibakane, miakau kaisu lri kawlrase ku lalalake lu kidremedremesu.

⁹ Kai ka athingathingalane, yasasane, la ngimia kikai taidrusane. Adravane arakaisu ku manemane tulrisi, subulrubulrusu ku sapuswane, lri tara kawlrasesu ki tawanesu si lalake ka sawvalai!

¹⁰ Ngiakagagaranganesu ku apiane; lu kidremedremesu miakau kadrwa ku umawmase ku wadredredrele ku nganganesu. Pamamanga muswane kwi lrigilanesu. Ngiapapasudalepesu ka saniange mararaamau ki Twaumase, ka kadrwa ku umawmase kulri kiramau muswane.

¹¹ Ai, ku amatikurwane lri mulebenga mwa ki kinawmasanesu, ku taratulrisi kai lri maka palribulu muswane; ku amatikurwane lri mulebenga mwa ki awlrusu, kaisu lri maka tulrisi pusu si pakawlrau. Kwidra kaika maka pulringawsu kulri amudu lri pangitutuluku kela.

¹² Pacungucungula arakai ku lrisi! Pacungucungula arakai ku pusu tulrisi! Sa icengecengeananasu kiatwalrawngasu arakai, kilakikai alau lri arakaaiyanasu, lri dulrwana kukuludru ki badhasu.

¹³ Ku pasikai muswane ki palrapalra kikake kadrwa ku paluludane; ani kamani kudra latarakinkinkiu ki latariau ku wakela palribulu muswane! Kwi lalasu wakinkiu ki latariau, la apagiagisi subelebelenge, si singi dramare pelaela muswane ku lrika angimiane lukabibilrili.

¹⁴ Drela, kwi lalasu lri mia ki sangukimugiane, ku apwi walama utu liniane. Kwi lalasu kai maka ngiasasirapalenga; kai wabeserenga ku dralrangedrangane ki kelrabe; kikai apwi kaika ngiamia ki saididivane ka apwi.

¹⁵ Ku tapanianianiakanesu satalutalusu ku tapadrekadrekasane ki tarakinkinkiu ki latariau; kwi lalasu pangwakakai muswane ki mamudu ka kadalranane. Kwi lalasu ngiasasilasilape ku angukaiyane lini katwase ku kadalranane, kadrwa ku natangeeanga ku asuru si palribulu muswane.