Isaiya 46 - Ngudradreadrekadhane Ka Sisiu 魯凱語聖經

Samiamiange ki swa Babilunia

¹ Ku alikaiyane ku vai ki twaumase ki swa Babilunia wakelanga! Ku Bile si Nibu nakiasukubu ki umawmase, kikainga kiasiamecenga ikai ki drelreke ki ruba, aamecenga pakwalrialrialri ki nilapulapwane.

² Ku lasamiamiange kai lri maka ngipapalribulu; ki lakikwini aniravasanenga ka lamanemane, ka kiailuku. Kikai amaninga ku alikaiyane ki twaumase ki swa Babilunia ka vai.

³ Lamwabaibalrithi ki Yakubu, kilalra kai vagali! Abalu ka laumawmase ki swa Iseraylri, kilalra makanaelre. Sakitulalake numi, si utaluvaivai twalai ki tina, makaalithaku numiane.

⁴ Twaumasaku numiane, lri sirapalaku numiane, pakela ku takawdrasane ki isiu numi. Wabekacaku numiane, lai lri lapwaku numiane; lri paralubaku numiane, lri palribulaku numiane.

⁵ Ku Tamatama amia kai: Lri pakiramau numi ki aneane nakwane? Kai kawmasane yakai ku ngiamia nakwane?

⁶ Yakai ku umawmase ku wapaipai ku labace ka lrangici, si malra ku bekeelane ku kingi, la tintingi ku bekeelane ku gingi; kwi lalasu la dawlu ki taradarepe ki kingi si tuvaeva tusamiamiange, ala papia iniane pidruru si sukubu.

⁷ Kwi lalasu wabulri iniane, si angeale, la pasutelrai iniane, si pacegecege iniane pikai kwini, kwi samiamiange la kai ngivelevelevelenga. Yakai ku umawmase ku papia iniane inulri, ai kai maka wadulru tubalre; la kai maka dulru palribulu ki umawmase pakidaili ki akwalriane.

⁸ Yakai ku pasalrivane ka laumawmase, pulringaava, ala kidremedreema ku piapiali patuelre.

⁹ Pulringava ku natangimiane kunadruma; Twaumasaku, kadrwa ku drumane; kadrwa kulri dulru kiramau nakwane.

¹⁰ Twalai sa tau pathagili wayuginginga naaku ku apalikaiyane; la pelaelanga naaku ku lrika angimiane lukabibilrili. Amiaku kai, lutumane kainaku lri tupela ku nau pia iyaiyali; ku takidremedremaneli, lri tara pangimiaku.

¹¹ Lri patwaladhaku tali talrawane dawlu ku tangeea ku umawmase; kwi lasu lri mia ki takanga ka papwalelebe ciwgailri, si tulrepenge ku kikakeli. Amianga naku kikai pelaela, lri tara pangimiaku.

¹² Kilalraili, ka makelrathe ku kidremedreme ka umawmase, Lu kidremedreme numi kadrwanga kwini apamalebeane;

¹³ Lri ngikakamaniaku ka wailuku kwini apamalebeane, kwi vai kwini kai lri tarathainunga. Lri kainaku pwadailane ku akelane ki apamalebeane. Lri palribulaku ki Yerusalrime, ku lrika amalrane ku lrigu ki swa Iseraylri.