Isaiya 45 - Ngudradreadrekadhane Ka Sisiu 魯凱語聖經

Baai ki Tamatama ka atarapiane ki Sairuse

¹ Ku Tamatama pwalawlau si cegecege ki Sairuse, wapilri iniane tutinuhika. Ku Tamatama siakawlu iniane pamalebe si rathudu sanaka kuni, siakawlu iniane katwase kivala ku puku ki latalialalai. Ku Tamatama pasiakai ki Sairuse pamuelebe ku lrawlrawdru ki sanaka cekele, si kai elebenga. Ku Tamatama amia kai iniane:

² Lri ngikakamaniaku sudalrane muswane, pasikai muswane sadrarate ki madrau tikiane ka lalregelrege. Lri kikaruburaku si lutu ki lriwlu ka saelelebane, la ngetele ku sadrukurane ka adreme.

³ Ku niseketane ku takuciacingalre ku lawbubulu, ku yakai ki drawsulu ku tacekecekelane lri patarumaraku baai muswane patuelre; lri pathingalaku muswane ala ka Tamatamaku, ka Twaumase ki swa Iseraylri ka kawariva sunagane muswane.

⁴ Pakamaniaku muswane kulri paralubu ki sasiakawluli ka Yakubu, paralubu ki pilrili ka swa Iseraylri. Swanaganaku kawriva muswane; kaisu wathingale nakwane, ai patarwamaraku baai muswane ku nagane.

⁵ Tamatamaku, kadrwanga ku drumane; kathanaku kadrwanga ku drumane ka Twaumase. Adravane kaisu thingale nakwane, lri patarumaraku baai muswane ku puku.

⁶ Ku piali kikai, pakaiyaku ku athingalane makanaelre sanaka umawmase, ki kiacaebe ki belenge, twalai talrawane pakela ki talriwgane ki vai ala ka kathanaku kadrwanga ku drumane; Tamatamaku, kadrwanga ku drumane ku twaumase.

⁷ Wabekacaku ki ledra, la bekacaku ki dradrimitane; pwalebeaku ku akaesadhane, la pulebeaku ku amatikurwane. Tamatamaku; paiyaku kilakikai patuelre.

⁸ Paakaciaku ki umawmase, mia ki subelebelenge pulebe ku saparigarigane ki lasupungu ka udale; kai kadaengane lri taale ku alrima tarumara, si lai lri pumadru ku madru ki ngilralraingane si dringelresane. Tamatamaku; lri pangimiaku kikai.

Wabekace si magagemegeme ki lrikisi ka Twaumase

⁹ Ku kiaecebe ki wabekace ka Tamatama ku umawmase lri kipadradresenge ku amatikurwane! Ku ladilrungu lri dulru madradrikisi ku vaga ki twadilrungu iniane ka taratudilrudilrungu? Ku dae lri dulru kivaga ki taratudilrudilrungu la watumatumanesu iya? Lri dulru kalisi ki taratudilrudilrungu kaisu wathingale iya?

¹⁰ Aneane kulri thuru kalisi ki marudrawdrange iya kai: Asu tulalake nakwane tungimiyaiya kai?

¹¹ Ku Tamatama ka sanianiangenga ki swa Iseraylri ka Twaumase, ka magagemegeme ku angimiane lukabibilrili ka wabekace ka Tamatama amia kikai: Kadrwa ku kindrisu kivavaga ku ngwakai ki lalalakeli, kadrwa ku kindrisu pelaela nakwane, ku lrika laapianeli.

¹² Amaniaku ku wabekace kai ki kadaengane ka Tamatama; wabekacaku ki umawmase. Arakaiyaku ku pukuli paipai ku make subelebelenge, waruthukaku ki vai, dramare, si latariau.

¹³ Paakaciaku ki Sairuse, pia ku madringelrese ka awngane; lri sadrarataku ku tadadavacaneini ku kadalranane. Lri tupelaku tucekele ku cekeleli Yerusalrime, lani ngilralrainginga ku kiaravase ku kawkawluli. Kadrwa ku umawmase kulri arakai kulri pavangalre lu pia kikai. Ku Tamatama ka abebeelengenga ki sanaka kwapingi amia kikai pelaela.

¹⁴ Ku Tamatama amia kai ki swa Iseraylri: Ku tacekecekelane ki swa Izipiti si swa Kuse lrika muswanenga patuelre; kwi tadradradrau ka swa Seba lri aduri muswane, lrika kikekerenge sikicikici si ilrilrikudru kabibibilrili muswane. Kwi lalasu lri pidruru icucubungu muswane pelaela iya kai: Ku Twaumase tapalra muswane, kadrwa ku drumane; kathaneini kadrwa ku druma ku Twaumase.

¹⁵ Kudra palribulu ki laumawmase ki swa Iseraylri ka Twaumase, ngiapapaidringi ka Twaumase.

¹⁶ Ku twasamiamiange ku umawmase lri matikuru kai thingale ku apiane; kwi lalasu lri kiarubwane kitusinalreme.

¹⁷ Ai ku swa Iseraylri lri kipalribulu ki Tamatama. Lri kapalralrawthunga akaci; ku laumawmaseini kai lri kitusinalremenga.

¹⁸ Ku Tamatama wabekace subelebelenge; kathaneini ka Twaumase. Ku Twaumase wabekace ki kadaengane, la pakakecenge ku karwalaini. Kai pacinilriane ki kadaengane, ataikaikaiyanenga ki umawmase. Ku Twaumase amia kai: Amaniaku ku Tamatama, kadrwanga ku drumane.

¹⁹ Kainaku yakaiyana ki takapaidridringane kawriva, la kainaku sekete ku takidremedremaneli. Kainaku kiatubi ki laumawmase ki swa Iseraylri ikai ki kaika patengane ka amaka kidringadhane silape nakwane. Amaniaku ku Tamatama; peaelaelaku kai patengane ka sabulrwane; pwataluvaivadhaku ku dringelresane.

Tamatama ki kawmasane si samiamiange ki swa Babilunia

²⁰ Ku Tamatama amia kai: Karededela kainganai sanaka kuni sanaka umawmase, kudra sakamudunga ku kuni la abalu panianiake ku laumawmase bwala makanaelrea kisaibange! Kudra wabulri ku angatu ka samiamiange ikai ki kadalranane ki cekele dadadavace, si inulri papia ki kai lri dulru palribulu liniane ka samiamiange yadrepele ka kadrwa ku thingale ka laumawmase!

²¹ Bwala, mwa tasaibaibangane si kukusu! Pamadrekadrekasana ki kiahukuku. Aneane ku paswalanga yugingi ku lrika angimiane? Kainaku ka amani ka Tamatama? Kathanaku kadrwa ku drumane ku Twaumase; aparamaramavaku, ka palribulu ka Twaumase, kathanaku kadrwa ku drumane.

²² Yakawmasane ka laumawmase, lu papia numi nakwane lri kipalribulu numi. Twaumasaku, kadrwanga ku drumane.

²³ Kawarivaku ku patengane ka sabulrwane, ku pukawnuli kai lri akabalrithi palralrawthu. Lri papiaku ki niakeli kiketekete: Sanaka umawmase lri papia nakwane guruthungane sukubu; ku ngudwi ki laumawmase lai lri kiketekete papia nakwane ku lri kaika akaelane ku kidremedreme.

²⁴ Kwi lalasu lri iya kai, kathane lu sakai nakwane kalri dulru akaci si malra ku puku; ku mavalracevace nakwane ku umawmase lri kiarubwane makanaelre.

²⁵ Kwaku ka Tamatama lri palribulaku patuelre ki lamwabaibalrithi ki swa Iseraylri; kwi lalasu lri drengedrengere nakwane.