Isaiya 44 - Ngudradreadrekadhane Ka Sisiu 魯凱語聖經

Ku Tamatama kathane ka Twaumase

¹ Ku Tamatama amia kai, Kilalra, lamwabaibalrithi ki sasiakawluli ka Yakubu; kilalra, pilrili ka laumawmase, ka lamwabaibalrithi ki Iseraylri.

² Amaniaku ka wabekace muswane ka Tamatama, twalai ki takitulalakanesu, paralubaku muswane. Madha mukuludru, sasiakawluli muswane; amanisu ku kadalameli ka pinilriane ka umawmase.

³ Lri pulebeaku ku sapacebeane ki lasupungu ka udale baai ki meameale ka kadaengane, ku aenaenai lri berai ku acilai si mwalwaludru. Lri patarumaraku ku puku baai ki lalalakesu, si subulrubulru baai ki lamwabaibalrithi muswane.

⁴ Kwini lalasu lri kadrau mia ki laubulu ka yakai thili ki acilai, ngiesaadhane mia ki yanagi ka yababiabiala ki drakerale.

⁵ Sanaka umawmase lri iya kai: Tamatamaneaku; kwi lalasu lri mwa kiredelane ki Yakubu. Sanaka umawmase lri pacase pikai ki tabalangane ku nagane ki Tamatama, kwi lalasu lri kipaelre kiredele ki swa Iseraylri.

⁶ Ku Tamatama ka talialalai ki swa Iseraylri, abebeelengenga ki sanaka kwapingi ka Takipalribulribulane amia kikai: Amaniaku ku sapathagili, amaniaku ku satwalrepenge; kathanaku kadrwanga ku drumane ku twaumase.

⁷ Aneane kulri kiramau nakwane, kwi lasu ani malra ku siwmi! Aneane kulri dulru pia ku piangali? Aneane kulri dulru yugingi ku angimiane lukabibilrili? Papelaela ki lasu ku lrika angimiane!

⁸ Kawkawluli, madha ngituluku si mukuludru! Kainaku ka wayugingiinga twalai kunadruma ku angimiane? Amani numi ku siwmili. Kathanaku, yakaiyana ku drumane ku twaumase? Yakaiyana ku drumane ku madrau ku puku ka twaumase ku kaika kilalranali?

Kadrwa ku paluludane ka samiamiange

⁹ Ku twasamiamiange ku umawmase kadrwa ku paluludane makanaelre; kwini tinukucingalrane iyaiya lini kwi samiamiange kadrwa ku paluludane. Kwidra wasukubu ki latwaumase ku laumawmase mukimukici ka kadrwa ku thingale; kwi lalasu lri tara kiarubuane.

¹⁰ Ku arakai ku kingi tusamiamiange si sukubu yai kadrwa ku paluludane!

¹¹ Ku wasukubu ki samiamiange ku umawmase lri tara ikaai ku akiarubwanane lini. Ku twasamiamiange mialri ka umawmase, kaika sanianiange ki palrapalra. Kwi lalasu ani kela makanaelre, si maicubungu nakwane nai matatubalre; kwi lalasu lri ngituluku kathathiburu si kainu.

¹² Ku daikusange ki adreme wamalra ku vaeva ku kingi si pwa ki apwi drunguru, ala arakai ku sapukwane ka tabalangane pangepange, la paalawbubulu kwini ki kingi. Ku taradarepe lu kasilraunga laka kadrwa ku puku; lu kai ungulu ku acilai, makadhame si kidulru sicaemane.

¹³ Ku daikusange ki angatu lu leketenga ku zailriu, la arakai ku sumicubu sege patuthingale, si arakai ku lamakaelaeela ku rarukudrane papacase, la tuumawmase, pangimia turamuru, si pikai ki biu adringi.

¹⁴ Kwi lasu alau waridraidri ku cedare ka angatu, luka arakai ku twalai angatungatu ka tharialupu ka angatu si hinuki ka angatu. Kwi lasu alau walredreke ku segi, la ukalava ku akipakadravane ki udale.

¹⁵ Kai umawmase wadulru malra ki angatu tusatwapudhane ku drumane, la tusamiamiange ku drumane. Kwi lasu wamalra kivala si arakai twapwi ididiu akame ku pange, ku drumane la tutwaumase, si pasukusukubu ki laumawmase.

¹⁶ Kwi lasu lri dulru malra ku angatu tusatwapudhane, la pibelenge akame ku beate si kane, la kane kabucuku. Kwi lasu lai lri mialri twapwi si ididiu, la iya kai, “Matharirilringa kai apwi, maculu madu!”

¹⁷ Kwi lasu arakai ku drumane si tusamiamiange, la papia kikai ki angatu pidruru sukubu, si inulri iya kai, “twaumaseli muswane, palribulaili!”

¹⁸ Kwi lalasu lu pia kwini makulrungu turamuru! Kwi lalasu wamemecane kai drele, kai arakai ku lusu, la kai thingale.

¹⁹ Kwini taratusamiamiange sana velevele ku awlru, si kidremedremeana, lri iya kai, “Arakaiyaku ku vaeva ka angatu, ku drumane twangatu, si arakai akame ku pange, akame ku beate; ku drumane arakai tusamiamiange, la sukusukubwana naku kai ki angatu!”

²⁰ Kikai yai kaika patengane ka kadrwa ku paluludane? Ku kulrungane ki lasu pamama iniane, kadrwanga ku sasulravane kulri pawdringai; kwi lasu kiathungu unu iya ka kaika twaumase kwi tapaini kwi samiamiange.

Ku Tamatama , magagemegeme ka wabekace

²¹ Ku Tamatama amia kai: Yakubu, pulringaava kikai; Iseraylri, amanisu ku sasiakawluli. Wabekacaku muswane, lri asasiakawlusu nakwane; kainaku lri karimuru muswane palralrawthu.

²² Pacepaku ku pasalrivanesu, mia ki ememe kawlrau; bwala siwlriwlria, palribulunga naku muswane.

²³ Lasubelebelenge, putariria! Adringi ki kadaengane, akwadrava senai! Laangatungatu lalregelrege, bwala kainganadha makanaelre si putariri! Ikai angatungatu ka laangatu, bwala kainganadha makanaelre si senai! Ku Tamatama palribulunga ki Yakubu; kwi lasu ngwakainga ki swa Iseraylri pathingalane ku madrau ku pukuini.

²⁴ Ku Tamatama ka takipalribulribulanesu amia kai; ku wabekace muswane ka Twaumase amia kai pelaela: Tamatamaku, ka wabekace sanaka manemane ka magagemegeme. Tangeangeeaku paipai ku make subelebelenge; ngiakakamaniaku ka wasapa kai ki kadaengane.

²⁵ Pakakulrungaku ki taratulrisilrisi ku angimiane lukabibilrili, kai maka ngiamia ku yugingi ki taraivigi. Sabelengaku ku vaga ki malrigili ka umawmase, si putaluvaivai ku lrigilane lini ala ka makulrungu makanaelre.

²⁶ Ai, ku sasiakawluli lu yugingi, lu pakatwasaku ki kiasikawlu pelaela ku lrika apianeli, pangiamiaku kwini laapiane si yugingi patuelre. Peaelaelaku ki Yerusalrime, ku laumawmase lri pelana ikaikai kwini; peaelaelaku ki Yuda, lri tupelaku tucekele ki Yuda, patwalai ki tawlrakavane pangiradhekane liniane.

²⁷ Wadrekasaku ki laveke pakadrekare; wadrekasaku ki laveke paakameamealane.

²⁸ Amiaku kai ki Sairuse: Atalingikaiyanaili lapu, si pia kaungu ku takidremedremaneli. Kusu drekasa ku atupelane tucekele Yerusalrime, drekase ku acegecegane ku karwalai ki daane ki Twaumase.