Isaiya 43 - Ngudradreadrekadhane Ka Sisiu 魯凱語聖經

Ku Twaumase palribulu ki kawkawluini

¹ Yakubu, ku wabekace muswane ka Tamatama amia kai; swa Iseraylri, ku wadarepe muswane ka Tamatama amia kai pelaela: Madha mukuludru, lri palakebaku muswane; lri sunaganaku muswane, nakwane muswane.

² Lu ikaisu ki sapapacai, lri ikaiyaku taelre muswane; lu talubalrebalresu ku acilai kailri lrenepe muswane. Lu dredresu ki apwi ka lrangele, kaisu lri ngithabucu; lu ikaisu ki wakelrakelrabe ki apwi, kaisu lri kadula.

³ Asi lwiyane Tamatamaku ka Twaumasesu; sanianiangenga naku ki swa Iseraylri ka takipalribulribulanesu. Lri malraku ki swa Izipiti tusabalrithane sawlri ki angilralrainganesu; lri patalingikaiyanaku ki swa Kuse si swa Seba pasikai muswane kwalri.

⁴ Ikai ki macali, nitukucingalranesu turamuru; madalamaku muswane, twakucingalraku muswane. Lri dulrwaku cilri kamani ki maelane ka kuni pakai ku apalribulane muswane, cilri kamani ki palrapalra si balrithi ki niakesu.

⁵ Madha kakiwcu, asi lwiyane yakaiyaku taelre muswane! Twalai adaili kavai talrawane, kavai sapakalriwgu, lri ililukaku ki sakacekelesu siwlri mubalriu.

⁶ Lri drekasaku ki swa tali dradha pakatwase liniane; lai lri pelaelaku ki swa tali lrawdru ku kaika aruthukane liniane. Ku kawkawluli lani twalai adaidaidaaili, twalai ki talikaiyane ki kawmasane kainganai siwlri mwa ki kuni lini.

⁷ Kwi lalasu kawkawluli, ngwaladhaku ki lriguli si bekace liniane.

Ku swa Iseraylri amani ku siwmi ki Tamatama

⁸ Ku Twaumase amia kai: Dawla pwa ki tasaibaibangane ki kawkawluli, kwi lalasu yakai ku maca, ai kai maka wadrele; Kwi lalasu yakai ku calringa ai kai wadulru kilalra.

⁹ Dawla pwa ki tasaibaibangane ki sanaka kuni kai kawmasane. Swainu ka kuni ku twaumase lini ku wadulru thingale lukabibilrili? Aneane ku wadulru yugingi ku angimiane lukabibilrili? Dawla kwini ki latwaumase lani iluku ku siwmi lini ku umawmase kainganai, si pelaela ka kadrwa ku tapamamane lini, pelaela ka asudralrwalrwane ku vaga lini.

¹⁰ Iseraylri, amani numi kulri siwmi nakwane; wapilriaku numiane ka sasiakawluli, ku lrika athingalane numi nakwane, kipawtenga nakwane, thingale nakwane ka vaeva ka Twaumase. Kathanaku, kadrwa ku drumane ku Twaumase; ku ngialribatenga kadrwa, lukabibilrili la mialri kai lri ikai.

¹¹ Kathanaku ka Tamatama; kathanaku ka Takipalribulribulane numi.

¹² Nau pelaela numiane ku lrika angimiane lukabibilrili; lri kelaku paralubu numiane. Kadrwana ku twaumase ki vaeva ka kuni ku paiyanga kikai; amaninga numi ku siwmili.

¹³ Twaumasaku, ka palralrawthu ka Twaumase. Kadrwa ku umawmase kulri dulru mubere ki alrimali; kadrwa ku umawmase kulri dulru tupela ku takaunganeli.

Twalai Babilunia mubere

¹⁴ Tamatama ka sanianiangenga ka Twaumase ki swa Iseraylri, ka amani ku tarapalribulu numiane amia kai: Ngwalai ku apalribulane numiane, lri sikawlaku ki kwapingi si kikaruburu ki swa Babilunia; lri kikaruburaku si buruku ki lrawlrawdru ki cekele; ku taputarirane ki swa Babilunia lri akabalrithi tubi karaleale.

¹⁵ Tamatamaku ka sanianiangenga ka Twaumase numi, ka amani ku wabekace ki swa Iseraylri ka talialalai numi.

¹⁶ Kunadruma, ku Tamatama yakai ki laveke sudalrane ku vaeva ka kadalranane, ikai ki bikabiki tukadalranane ku madrau ka kadalranane.

¹⁷ Ku Twaumase waamudu patuelre kudra ki madrau ka kwapingi, sakikaruburane ka palridingi si tarakikaruburuburu ka rigi. Kwi lalasu kiasalrunga kasuburu, kai lri maka ngidrakalenga; kwi lalasu kiamudu, mia ki calrisi ki tinaki ka kiakacianenga.

¹⁸ Ai ku Tamatama amia kai: Madha katangulringaavane ku sidrumane; si kabusuku ikai ki angulrialringavane.

¹⁹ Drela, mwarikaiyaku ku tapiane ku bavane, ku angimiane ngiamianga, laka wadrelenga numi! Lri ikaiyaku ubulane tukadadalranane, ikai enaenai lruku ku kadravane.

²⁰ Adravane ka waudriwdripi lri mialri musakene nakwane, ku tawpungu ubulane si tuniau lri drengedrengere nakwane; asi lwiyane yakaiyaku ki aenaenai pasutelrai ki kadravane, la ikai ki calragulragu paberai ku acilai, lai lri ikai ku acilai ku awngulane ki pilrili ka lakawkawlu.

²¹ Kwi lalasu yai ngipapasikaili bekace ka lakawkawlu; kwi lalasu lri papia nakwane senai ku sadrengedrengerane ka senai!

Pasalrivane ki swa Iseraylri

²² Ku Tamatama amia kai: Ai Yakubu, kaisu wasukubu nakwane; Iseraylri, la cilrisu nakwane.

²³ Kaisu patarwamara nakwane ku Lama ka lrisi ka kiu, la kaisu patarumara ku usakenane nakwane ku sapatarumarane. Kainaku kiatubi ku sapatarumarane ku waudriwdripi, si padrima ku amecesu, la kainaku kitubi ku akibaadhane ku sangwalreme, si kaisu maka pangimia.

²⁴ Kaisu pasiakai nakwane langai ku sapatarumarane ku sangwalreme, la kaisu patarumara ku sima ki sapatarumarane ka waudriwdripi. Ngiabalrelringa, ku pasalrivanesu amecengali; ku tapasalrivanesu pakwalri nakwane turamuru.

²⁵ Ai, kathanaku ka Twaumase. Pacepaku ku tapasalrivanesu; kainaku ngwalai ki pasalrivanesu si bilri muswane.

²⁶ Ala takaredele mutasaibaibangane; lri dulrusu kukusu. Kusu palrainga putaluvaivai ku nitupasalrivane, ka sapelaelane ka pacengecengesu!

²⁷ Ku cucungulanesu pasalriu, kudra latarasangililuku muswane wabaebalre nakwane;

²⁸ Ku tabebelengesu wakudrulrunga ki Alrivilrivi ka taikaikaiyaneli. Ngwalai kikai, lri pakisaalrwaku amudu ki Yakubu; lri pakitusinalrelremeaku ki swa Iseraylri.