Isaiya 42 - Ngudradreadrekadhane Ka Sisiu 魯凱語聖經

Sasiakawlu ki Tamatama

¹ Ku Tamatama amia kai, “Drela, ki sasiakawluli, warakaku iniane; wapilriaku iniane, madalamaku iniane. Lri arakaiyaku kai Rili suete iniane; kai lasu lri pasikai ki sanaka kuni mailuku ku dringelresane.

² Kai wakaralealeale, la kai kangariangiangi; kwi lasu kai yakai ki kadalranane ki cekele akwadradrau kawriva.

³ Ku kiadrepete ku tirivu, kwi lasu kai wacelra ngetele; ku maedredrepe ku apwi ki tinaki, kwi lasu kai waipi edrepe. Kwi lasu lri mailuku si baai ki umawmase ku akawlaadhane ku dringelresane.

⁴ Kwi lasu kai masulri la kai masalivalrau; kwi lasu lri ikai kawmasane si paruswadrau ku dringelresane; ku umawmase ku yakai kabicelrakane ki laveke ka lakadaengane lri satalu ki padradrekaseini.”

⁵ Ku Twaumase wabekace subelebelenge, la aru paswadrau subelebelenge; wabekace ki kadaengane si yakai belenge ki kadaengane sanaka panianianiake; patarwamara baai ki umawmase ku niake. Ku Tamatama ka Twaumase amia kikai pelaela ki sasiakawluini,

⁶ “Kwaku ka Tamatama wadawlaku muswane, la patarumaraku baai muswane ku puku, ku lrika aikaiyanesu kai kawmasane marasikai ku aparamaramavane. Lri pangukaiyaku muswane si makaketekete ki umawmase kawmasane; lri paaledraku muswane ki sanaka kuni.

⁷ Lri muelebesu ku maca ki mukimukici, lai lri ililukusu pulatadre ki taememengane ki kiaemenge ka umawmase, ku yakai kadradridrimitane ku umawmase lri drele ku ledra.

⁸ “Tamatamaku, amani kai ku naganeli. Kainaku lri pakisupilri ki drumane ka twaumase ku lriguli, lai kai maka tupapalra sanaka samiamiange kidrengedrengere.

⁹ Ku layugingili ngiamianga. Kikai asasane lri pelaelaku numiane ku labavane ku lamanemane, sakaiyana ngimia lri paswalaku pelaela numiane.”

Sadrengedrengerane ka senai

¹⁰ Senadha papia ki Tamatama ku bavane ka senai; kai kawmasane lri drengedrengere iniane makanaelre! Kai laveke si yakai adringi sanaka panianianiake lri drengedrengere makanaelre iniane; ku yakai kabicelrakane ki laveke ku kadaengane si yakai belenge ka laumawmase lri drengedrengere makanaelre iniane!

¹¹ Ku aenaenai si yakai kwini ku cekele lri akwadrau senai makanaelre; ku laumawmase ki swa Kidare lri drengedrengere iniane; ku yakai Sila ku umawmase lri kiraragai makanaelre, lri twalai belenge lregelrege elraelrange.

¹² Ku yakai kabicelrakane ki laveke ku kadaengane ku laumawmase lri lrigu ki Tamatama makanaelre; kwi lalasu lri drengedrengere iniane.

¹³ Ku Tamatama maru garagarangenga ka matwase kikaruburu; ngiararukudru ukalavalava ku akatwasane, padulrudulru ku akikaruburane. Akwadrau karaleale, si mwa ciwru ki takikaruburububane, papia ki badha daidai si magaguruguru.

Ku Twaumase pwakawnu ku apalribulane ki kawkawluini

¹⁴ Ku Twaumase amia kai: Maulainga naku ka taicelrebane, si kai kirarakerakete ki kawkawluli. Kaiasasane lri pathagilinga naku, mia ki lri tulalake kiangeangeange ka ababai akwadrau karaleale.

¹⁵ Lri amudaku ki madrau si tikiane ka lalregelrege, la pakarudame ki laubulu si laangatu. Lri paenaenadhaku ki kadravane, lai lri pakamealaku ki labaibaiyu.

¹⁶ Lri ililukaku ki mukimukici ka lakawkawluli mukadalranane, ngukakai kudra kaika thingale lini ka kadalranane; lri paaledraku ki dradrimitane, ku matwapiyaiya ka tikiyane ka kadalranane lri swadrawnga ka madrau ka kadalranane. Lri pangimiaku kikai, kainaku lri tavuvulrucu.

¹⁷ Kudra lakiapawtenga ki kaika patengane ka twaumase ka laumawmase lri tara amaki; ku satalutalu ki samiamiange lri tara kiarubwane.

Ku swa Iseraylri kai tarwamara kibulru

¹⁸ Ku Tamatama amia kai: Kunumi ka lacelecele ka umawmase, kilalalra! Kunumi ka lamukimukici ka umawmase, drela!

¹⁹ Kai kawmasane aneane ku silrialribate kamukici ki sasiakawluli? Aneane ku silrialribate ka macecele ki tarakisikawkawlu nakwane?

²⁰ Swa Iseraylri, makalranga ku drelesu, laka kadrwa ku takidremedremanesu; makalranga ku kilalralalrasu laka kadrwa ku tapulringavanesu.

²¹ Ku Tamatama vaeva ku kidremedreme ku aparuswadravane ku dringelresane; ku lrika aru salraelreane ki hulrice.

²² Ai, ku kawkawluini kiadredrepete; kwi lalasu kiaelebe pikai taememengane, kiaemenge ikai taememengane. Kwi lalasu kiaravase ku lawbubulu, la kikabebetethe, kadrwa ku umawmase ku wakela palribulu liniane.

²³ Ikai numiane yakai kulri kilalra kikai vaga? Twalainga kikai lri kicacaligiri kilalra?

²⁴ Aneane ku wamalra ki Yakubu si baai ki wakela mucekele? Aneane ku wamalra ki swa Iseraylri si baai ki waravase? Tamatama ka ngiakakamani, asi lwiyane pasalriwta iniane makanaelre. Kai kakwakudhaneta kai mamamwa ki leketeini; kaita paluludu ku hulriceini.

²⁵ Ngwalai kikai, ku elathane ki Twaumase la papia mitane, alakamani kai kipadradresengeta kai amakaruruburane si kwalrialrialri. Kai lrithavulane ki amakaruruburane waruthuku mitane, la kathadaalraneanata kai patwalalai kibulru; kai madrareange ka apwi walama mitane, la ka sakamiyata kai pulringalringalringau mia ki masalregesege.