Isaiya 41 - Ngudradreadrekadhane Ka Sisiu 魯凱語聖經

Ku atarapangimiane ki Twaumase ki swa Iseraylri

¹ Ku Twaumase amia kai: Ku layakabicelrakane ki laveke ka lakadaengane, isaselebana, kilalalra kai vagali! Sanaka umawmase, sarubwa kwi kidremedreme numi! Kunumi bwala kela la pelaela; tataelre mapelaela ku pacengecenge si kai pacengecenge.

² Aneane ku waililuku patwalai tali talrawane kudra ki magagemegeme, si pakakadruanga ku kiaecebe iniane? Aneane ku paakaci iniane ki taikalra ka kuni, pamakinga ki takaalra ki latalialalai? Ku lrabu ki lasu lu papacai ki umawmase, pakadwai turamuru; ku lrailini lu lraili ki umawmase, pangiamia ki sangukitalekane ka yacucubungu ki valrigi kwi lalasu.

³ Kwi lasu wasaladha liniane, la kasulialivate papucucubungu, ku ridarane mia ki kai mwacakenakena ku drapale!

⁴ Aneane ku pangiamia kikai? Aneane ku twaringaringau ku apapiane ki lrikisi? Kwaku ka Tamatama twalai ki sapathagili yakainga naaku kwini, ikai ki satwalrepenge la mialriaku ikai kwini!

⁵ Kai layakai kabicelrakane ki laveke ka lakadaengane sana drele makiwcu; adravane ka swa adaaili mialri makitu mukuludru manugiligili. Kwi lalasu wakelanga makanaelre, si irubu taelre.

⁶ Kwi ladaikusange lini maparawralubu, si mapasapukupukwane iya kai: Putaluvaivadha ku garangane!

⁷ Ku daikusange ki angatu amia kai ki taradarepe ki kingi ka daikusange: Kwi tasialrimanesu mathariri; ku taratusamiamiange ka daikusange walrigu ki tarakedrekedre ka daikusange ki angatu, la iya kai: Mathariri kwi tapianesu. Kwi lalasu arakai ku sakedrekedre kedrekedre pakakecenge ki samiamiange, la kakecenge turamuru.

⁸ Ai, swa Iseraylri ka sasiakawluli, Yakubu ka pilrili ka kawkawlu, agaganesu ki talragili ka Aberahame.

⁹ Patwaladhaku ki talikaiyane ki kadaengane malra muswane iluku kainganai; patwaladhaku adaili turamuru dawlu muswane. Amiaku kai muswane: Sasiakawluli muswane. Kainaku wacilri muswane, wapilriaku muswane.

¹⁰ Madha kakiwcu, yakaiyaku tapalra muswane; Twaumasaku muswane, lri mukuludrwananasu ki manemane? Lri pakakecengaku muswane, si paralubu muswane; lri palakebaku muswane, si palribulu muswane.

¹¹ Kwidra malisilisi muswane ku laumawmase lri kiarubwane; ku twasinalremelreme muswane ku umawmase lri pacai.

¹² Lu katwasesu silape ku kiakaruburuburu muswane, ai kaisu makakiadringai; ku badha numi lri kiamudu.

¹³ Tamatamaku ka Twaumasesu; lri patarumaraku baai muswane ku puku. Nau pelaela muswane, madha mukuludru, lri tara paraalubaku muswane.

¹⁴ Ku Tamatama amia kai: Iseraylri, ka kawkawluli, adravane ka tikianesu si turamuru, madha mukuludru! Amaniaku ku palribulu ka Tamatama ka sanianiangenga ki swa Iseraylri ka Twaumase; lri paralubaku muswane.

¹⁵ Lri malraku muswane tusavelavelatane, si pwa ku bavane si kamarangisi ku valisi; lri baburawsu ki lalregelrege, si amudu liniane; lri baburawsu ki tatitiki ki lalregelrege, lai lri athuvugu.

¹⁶ Lri malrasu liniane pavalrigi, ku valrigi lai lri pasarau, ku madrau ku valrigi lai lri palai liniane. Ai lri kiraragaisu, asi lwiyane Tamatamaku muswane; lri drengedrengeresu nakwane ka sanianiangenga ki swa Iseraylri ka Twaumase.

¹⁷ Ku matiakukuru kwalrialri ku kawkawluli lu silasilape ku aungulane ku acilai, lu kamealenga ku lrulrungu lini, kwaku ka Tamatama lri kilalraku ku inulri lini; kwaku ka Twaumase ki swa Iseraylri kainaku lri cilri liniane lutuumane.

¹⁸ Lri ikaiyaku ki kadrwa ku manemanemane ka lregelrege putaluvaivai ku kadravane, ikai ki valrwalru ki lregelrege pacebe ku acilai mwalwalwaludru. Lri paikaiyaku ku baiyu ki aenaenai, lai lri ikai ku berai ka acilai ki meameale ka kadaengane.

¹⁹ Lri ikaiyaku ki aenaenai lredreke ku cedare ka angatu si bwaburavane ka paela ka angatu, la lredreke ku navate si ulrive ka angatu. Ikai ki calragulragu lri ikainga ku alrenge ka angatu, ku segi ka angatu, si hwanyange ka angatu.

²⁰ Ku laumawmase sana drele lri thingale, Tamatamaku; amaniaku ka pangimia kikai patuelre. Kwi lalasu lri pulringawnga, ku sanianiangenga ka Twaumase ki swa Iseraylri ka pangiamia kilakikai.

Ku Tamatama kiaecebe ki kaika patengane ka twaumase

²¹ Ku Tamatama amia kai: Latwaumase ki sanaka kuni, bwala kela si pelaela! Ku talialalai ki swa Iseraylri amia kai pelaela: Putaluvaivadha kudra sapupukuanenga ku saiyaiya numi!

²² Bwala si yuginga ku lrika angimiane lubibilrili, swacenga ku pacugane kudra ki ngialribatenga. Bwala pelaela naiane, la nai thingale ku angimiane kilakikai, si thingale ku angimiane lukabibilrili.

²³ Pathingala naiane lulri ka ngitwatumane lukabibilrili, la nai thingale ala ka latwaumase numi. Pia ku lamathariri ku awngane pulebea ku laamatikurwane, la nai ngituluku, si mukuludru.

²⁴ Kainu ka apasiasipane; ku piapia numi kadrwa ku paluludane patuelre; ku wasukusukubu numiane ku umawmase latanganganga turamuru!

²⁵ Yakainga naku tali talrawane pilri ku tangeea ku umawmase; lri patwaladhaku tali dradha pakainganai iniane kikaruburu numiane. Kwi lasu lu dredre ki latalialalai, mia ki wadredredre ki dulrailraki, mia ki taratudilrudilrungu ka wadredredre thalre ki dae.

²⁶ Ikai numiane aneane ku wayugingi ku tangimiane kikai, si la dulruta kai pasalriu iya iniane? Ikai numiane kadrwa ku matiakai kikai miyaiya kikai; laka kadrwa ku umawmase ku kialalra lu iyanga numi kikai vaga!

²⁷ Kwaku ka Tamatama lri paswalaku pelaela kikai mathariri ka vaga ki Ziyungu; siakawlaku ki sasiakawlu mu Yerusalrime kawriva: Wakelakelanga kai sakacekele numi!

²⁸ Lu dredrelaku sanaka latwaumase, kadrwa ku navaevanga ku yakai ku vaga si lri kawriva; kadrwa ku navaevanga ku wathingale tubalre ku kivagali.

²⁹ Ku latwaumase patuelre kadrwa ku navaevanga ku thingale; sanaka samiamiange twaraamuru ka kadrwa ku puku!