Isaiya 40 - Ngudradreadrekadhane Ka Sisiu 魯凱語聖經

Sasiadradrama ka vaga

¹ Ku Twaumase numi amia kai, “Kunumi sasa ki kawkawluli, sasa liniane.

² Pasapukwana ki laumawmase ki swa Yerusalrime, pelaela liniane: Ku sakwalrialri lini makakelretenga; ku pasalrivane lini kiapacepenga. Kunaku ka Tamatama pakiatulrepengenga naku pathavungu ku pasalrivane lini.”

³ Yakai ku lingau ku watawtau iya kai, “Ikaiya ubulane pasikai ki Tamatama padulru ku kadalranane; ikaiya ki aenaenai pasikai ki Twaumaseta tukadalranane ku ngwaadrau ka kadalranane.

⁴ Sanaka valrwalru lregelrege selrepa pasuete; ku madrau si tikiane ku lalregelrege alra sadrarate. Ku apatuvalrwalru ku kadaengane alra padratane; ku matwapiyaiya cakena padratana.

⁵ Lukamaninga kwidra, ku lrigu ki Tamatama lri mutaluvaivai; sanaka umawmase lri drele makanaelre. Ku Tamatama amia kikai pelaela.”

⁶ Yakai ku lingau ku watawtau iya kai, “Lu katwasa pelaela kikai matiakiragai!” La kivagaku, “Lri pelaelaku ku manemane?” “Pelaela pasalraelre sanaka umawmase mia ki ubulu makanaelre ka kadrwa ku paluludane; ku tharirane lini mia ki bengelrai ubulane;

⁷ Ku Tamatama sana ipi vaivalrigi, ku ubulu marudame, ku bengelrai malraici. Kai umawmase si bengelrai ubulu kadrwa ku tamakakaelane.

⁸ Kai ubulu lri karudame, kai bengelrai lri kalraici, ai ku vaga ki Twaumaseta palralrawthu kai lri kaela!”

⁹ Yerusalrime, mubelenga ki abelenge ka lregelrege; si pelaela ku matiakiragai ka vaga! Ziyungu, akwadrava tawtau; pelaela ku matiakiragai ku vaga! Akwadrava tawtau, madha mukuludru. Pelaela ki tadradrau ki tatitiki ki lacekele ki swa Yuda: Ku Twaumase numi lri kelanga!

¹⁰ Ku abebeelengenga ka Tamatama lri iluku ku lrekeme kainganai; ku Twaumase lri arakai ku puku rathudu kawmasane. Ku Twaumase lri pakalreva liniane; lri palribulu liniane.

¹¹ Ku Twaumase lri mia ki taraagwagu ka umawmase lapu ki lakiu; lri sarubu ki lrulai ka kiu, si malra ibibi liniane; lri ara sulrapelane ililuku ki latina ka kiu.

Kadrwa ku apakiramavane ka Twaumase

¹² Aneane kulri maka dulru arakai ku alrima lekete ki laveke? Aneane kulri maka dulru arakai ku satapai lekete ku abelengane subelebelenge? Aneane kulri maka dulru arakai ku sabungubungane bungubungu ki kadaengane? Aneane kulri maka dulru arakai ku tintingi si tintingi ki lalregelrege?

¹³ Aneane kulri maka dulru thingale ku kidremedreme ki Tamatama? Aneane kulri maka dulru bulru iniane, ililuku iniane?

¹⁴ Ku Twaumase lri murikai ku akibulrwane kiarake ki umawmase ala lri dulru thingale ki pacengecenge ki ngialisiane? Ala lri tarumara ku thingalane? Ala lri dulru apapapilri ku pacengecenge si pasalriu?

¹⁵ Lu drele ku Tamatama, kai lakuni amani kudra kingivavaale adidi ka acilai ikai ki bakicu, amani kudra yakai belenge ki tintingi ka vaeva ka enai; kai yakai kabicelrakane ki laveke ku kadaengane thuvugu ikai belenge ki tintingi

¹⁶ Ku angatungatu Lebanungu kai makakelrete arakai twapwi ki sapatarumarane; ku yakai kwini ku lawaudriwdripi kai makakelrete tu Lama ka lrisi.

¹⁷ Ikai ki lasu kai lakuni, kaika apasiasipane, maru kadruanga ku tikianane, tikiane ka kaika sapatumatumane.

¹⁸ Aneane kulri dulru kiramau ki Twaumase? Ku Twaumase ngiamia ki manemane, si lri dulru numi arakai ku manemane pakiramau ku tangimiamianeini?

¹⁹ Ku Twaumase kai ngiamia ki tusamiamiange ki taradarepe, kai taradarepe ki kingi ara kingi cabu, kai taradarepe ki gingi la ara gingi tutaneneane ki nituumawmasane.

²⁰ Kudra kai maka walangai ku kingi ku gingi ku umawmase arakai ku kai maburaburau ku angatu. La silape ku tangeea ku ngiathingale kimatikaikai ka daikusange, la darepe tuvaeva ku kai lri mukadrulu ku samiamiange.

²¹ Kai numi wathingale? Kai numi kialalra? Kai ka yakai ku umawmase ku peaelaelaanga numiane? Kai numi wathingale kai kawmasane ku tangimiane sapathagili?

²² Ku Twaumase wanene ikai belenge kai ki takalrimetekane ki kadaengane; kai belenge ki kadaengane kai umawmase lu drelane mia ki ababungu. Ku Twaumase wamalra subelebelenge mia ki make muelebe, mia ki wapaipai ku taikaiyane ki umawmase ka balrawbau.

²³ Ku Twaumase wamudu ki yakai ku puku ki latalialalai, la pakawlrau kai kawmasane ki tarasangililuku.

²⁴ Kwi lalasu mia ki tatitiki ka lawacebecebe, ka tau balabalace si thiwlru. Ku Tamatama sana ipi, la karudame; sana kela ku alrilrawgu, kwi lalasu mia ki sangukimugiane kipalai apasawvagavagai.

²⁵ Aneane kulri dulru kiramau ki sanianiangenga ka Twaumase? Kai kawmasane yakai ku umawmase ku ngimiyaiya iniane?

²⁶ Kunumi paswabelenga! Aneane ku wabekace ki latariau? Amani ku Twaumase; wasangililuku liniane mia ki wasangililuku ki lakwapingi. Ku Twaumase wathingale ku takathanane lini; ngwavavaeva sunagane kawriva. Ku pukuini madrau turamuru, kadrwa ku navaevanga ku tariau ku wathuru nau kai kela iya.

²⁷ Iseraylri, asu kalisilisiana, kai wathingale ku Tamatama ku sakwalrialrisu iyaiya? Lu kidremedremesu ku Twaumase kai makalithi ku takivuthanesu kitupasalriu?

²⁸ Kaisu wathingale? Kaisu kialalra? Ku Tamatama palralrawthu ka Twaumase! Ku Twaumase wabekace kawmasane. Ku Twaumase kai kiadulrudulru, la kai sicaecaemane; ku lrigilaneini kadrwa ku umawmase ku maka wathingale.

²⁹ Ku Twaumase patarwamara baai ku puku ki kiadulru ku umawmase; Ku Twaumase patarwamara baai ku puku ki siacaemane ku umawmase.

³⁰ Ku yacengecenge mialri ka lri kidulru, ku ngiacaeme ku tacebeane ku langukathabarane la mialri sicaemane;

³¹ ai ku satalu ki Tamatama ku umawmase, ku puku kai maelaela. Kwi lalasu lri mia ki takanga paipai ku sapakepake; kwi lalasu lu lailai kai kiadulrudulru; kwi lalasu lu dadavace kai siacaecaemane.