Isaiya 4 - Ngudradreadrekadhane Ka Sisiu 魯凱語聖經

¹ Ikai kwini, ku tapitu ku labaibai lri ruthuku ki tangeangeea ki sawvalai, si iya kai, “Lri dulru nai ngikakane, ngipapasimai, sana dulrusu sitaelrelre naiane ku nagane sikakathane; luka miyaiya kikai, kai nai lri kitusinalrelreme kitucawcalrulu!”

Twapela tucekele Yerusalrime

² Lri padaalrunga si kela ku vai, ku Tamatama kai ki kadaengane ki laivai si la wacebecebe lri pakadrau pangiesadhane. Ku abalu ku umawmase ki swa Iseraylri lri ngwalai ku tatutalekane ki kadaengane lai lri dradrarane makanaelre, si lu kidremedreme akilrigwane.

³ Ku panianianiiakeana makanaelre, ku pilri ki Twaumase si asuru ikai Yerusalrime, lri kitualrivilrivi makanaelre.

⁴ Ku Tamatama lri singikai ki pukuini saibange kai ki kuni, ku lrika akabulane; ku Tamatama lri sinau ku pasalrivane ki swa Yerusalrime si kudra tatueraeradhane ikai kwini.

⁵ Lukamaninga kwidra, ku yakai belenge lregelrege Ziyungu, ku yakai ki tayelrelrelreane, ku Tamatama ikai ki vaiane lri arakai ku ememe kabungu liniane, ikai ki maungu, lri arakai ku apwi pathelare liniane. Ku lrigu ki Twaumase lri kabungu palakebe ki cekele palraelre;

⁶ Ku lriguini mia ki sakabungane cavalri ki balrawbau, lu paipadhane wadulru telenge ki dralrangedrangane luka vaiane, kikai cekele atakilakebanenga, ka tamwane mubere lu umuku.