Isaiya 38 - Ngudradreadrekadhane Ka Sisiu 魯凱語聖經

Takacaemane si tamudringadhane ki talialalai ka Hezekia

¹ Sakamani kai kwidra, ku talialalai ka Hezekia macaeme, kisanu pacapaacainga. Ku Isaiya ka lalake ki Amuse la mwa kikawriva ki talialalai, si iya kai iniane, “Ku Tamatama amia kai, ‘Kusu marasikaiya kwini ki kaiyana ka nitulrepengane ka laawngane, asi lwiyane kaisu lri dulrunga mudringai; ngipapadulruanga ku apacadhanesu.’ ”

² Ku Hezekia la ngibangulu ku lringau papia ki balingibingi, si inulri iya kai,

³ “Tamatama, ngulringava kai saliakavaevaku kai kaelaela kai kidremedremeli pasikaikai muswane, pia kwini lu iyasu nakwane ku manemane, paiyaku ku manemane.” Kwi lasu sa kai beserenga la tungawngau tubi.

⁴ Ku Tamatama ala drekase ki Isaiya

⁵ pasiwlri mwa ki Hezekia, si pelaela iniane, “Kwaku ka Tamatama, ka Twaumase ki cucungulanesu ka Davidi amiaku kikai: Kialalranga naku ku inulrisu, la drelenga naku kwi lresesu; lri papanianiakeana naku muswane ku nitara mangealane si lrima ka caili.

⁶ Lri patwaladhaku ki alrima ki tinuhika ki swa Asiria palribulu muswane si Yerusalrime, si ngikakamani palakebe kai ki cekele.”

⁷ Ku Isaiya la tubalre, “Ku Tamatama lri baai muswane ku vaeva ku sasakaladhane, sapelaelane kalri tara pangimia ku puvagangaini.

⁸ Ku tapiane tutataetaetale saka talialalai ku Ahaze, ku Tamatama lri pasiwlri ki alalingu ki vai ku nitaku mangealane pudrapale.” Ala ka tengatengane, ki tataetaetale ku alalingu ki vai siaulriwlri ku nitaku mangealane pudrapale.

⁹ Sa udringainga ku Hezekia, wapacase ku vaeva ku sadrengedrengerane ka senai:

¹⁰ Mathekelraku, amani lu pacadhaku lu icengecengaku ngiesaesadhane, si mwa swadriadringi, la kai kisupilringa ikai ki tapanianianiakane.

¹¹ Makiwcaku ikai kai kawmasane si kai maka drelenga ki Tamatama, la kai maka drelenga ki sanaka panianianiake ka umawmase.

¹² Kai balace ki niakeli kiaretege, mia ki daane ka balrawbau ka kiaburuku, mia ki makalrilau ka kiaretege patwalai ki satinutinunane. Lu kidremedremaku ku Tamatama lri palikainga kai niakeli.

¹³ Watalearaku kipakwalri tubitubi tungawngaungau, mia ki raiyungu ka wakace retege ki culraleli. Lu kidremedremaku ku Twaumase lri palikainga kai niakeli.

¹⁴ Akwatiikinga ka kadrwa ku puku kai lingauli, mia ki tavagu ka wadadange. Kai macali ngwalai ku tapaswabeleenganeli si kidulru. Tamatama, mwalra kai amatikurwaneli.

¹⁵ Kikai yai tapiane ki Tamatama; lri dulrwana naku tumanaiya? Kwalri kai kidremedremeli, kai dulru kasipelrenge.

¹⁶ Tamatama, lri pasikaiyaku muswane panianiake, kathanesu ku apasikaiyaneli panianiake; sulravaili pawdringai, la nau panianiakeana!

¹⁷ Kai sakwalrialri ki kidremedremeli lri akabalrithi isaseleebanenga sutelrai. Palribulusu ki niakeli, pakidaili ki apacadhane patuelre. Pacepesu ki tapasalrivaneli patuelre.

¹⁸ Ikai swadriadringi kadrwa ku umawmase kulri drengedrengere muswane; ku wapacainga ku umawmase kai lri thingale drengedrengere muswane; ku mwa swadriadringinga ku umawmase kai lri thingale sudralru ku takapatengatengananesu.

¹⁹ Kathane ku panianianiake ku umawmase kulri drengedrengere muswane, mia kai tadrengedrengedrengeraneli muswane kaiasasane. Ku tama lri pelaela ki lalalake, amanisu ku patengatengane!

²⁰ Tamatama, pawadringaingasu nakwane. Lri patungutungu nai, senai drengedrengere muswane; ikai ki tapanianianiakane, lri ikai nai ki daanesu drengedrengere muswane.

²¹ Ku Isaiya wacunu ki sasiakawlu ki talialalai, malra ku lawlau ka icizike si dupilri pikai ki dula ki talialalai, ku talialalai lri mudringai.

²² Ku Hezekia ka talialalai la kivaga, “Manemane ku sasakaladhane si dulru pelaela ala ka lri dulrwana naku mwa ki daane ki Tamatama sukubu?”