Isaiya 37 - Ngudradreadrekadhane Ka Sisiu 魯凱語聖經

Ku talialalai kiavaga ki Isaiya

¹ Ku Hezekia ka talialalai sa kilalra ku tapelaelane lini, malisi turamuru; kwi lasu la thurilace ku laimai, si sipalimemelre ku kaimadhane, la mudaane ki daane ki Tamatama.

² Kwi lasu la sikawlu ki abebeelengenga ki taradrangalrungalru ki daane ki talialalai ka Iliakime, tarapacapacase ikai ki daane ki talialalai ka Sebena, si latarudrawdrange ka barakalai katwase kikawriva ki yuginsia ka Isaiya ka lalake ki Amuse; kwi lalasu la mialri silaimai ku kaimadhane makanaelre.

³ Ku Hezekia ka talialalai wacunu liniane pelaela ki Isaiya, iya kai, “Kaikameane takwalriane ki kuni ka vai; yakaita makanaelre ki akitusinalremeane si akipathavungane. Miata ki tangeea ka twalalalake ka ababai, ngwalai ki turamurane ki kinawmasane la kipakwalri tulalake.

⁴ Ku tinuhika ki swa Asiria siakawlu ki mabelenge ki kwapingini kainganai tusinalrelreme ki palralrawthu panianiake ka Twaumase. Ku Tamatama ka Twaumasesu lu kilalra kikai tinudreadrekasane ka lavaga, ani pathavungunga ku amia kikai. Kitubia pelaela ki Tamatama ka Twaumasesu, lani kainganai sirapale mitane ka laabalu ka laumawmase.”

⁵ Ku Isaiya sa kilalra kilakikai vaga ki Hezekia ka talialalai,

⁶ wadawlu ki umawmase pakatwase tubalre ki talialalai, iya kai, “Ku Tamatama amia kai: Kunumi madha ngwalalai ku takawrivane tusinalrelreme ki swa Asiria si kathathiburu mukuludru.

⁷ Ku Tamatama lri pakilalra si kasalru ki tinuhika ki swa Asiria ku nipasasaravane ku vaga, lai karaacange siwlri mubalriu lai lri ikai ki kadaenganeini kipapacai.”

Ku swa Asiria wakeelanga ngusela kukuludru

⁸ Ku mabelenge ki kwapingi ki swa Asiria wathingale ki tinuhika ka matwasenga kavai Lakise, si katwase kikaruburu ki adeethe ka cekele Libena, la katwase mwa kwini kivaga iniane.

⁹ Ikai kwini ki swa Asiria la ikai ku vaga ku waililuku ki kwapingi ki swa Igipitiane ku Tirehaka ka talialalai ki swa Kuse kaiyangananganai lri kikaruburu liniane amia. Ku tinuhika ki swa Asiria sa kilalra kikai vaga, la sikawlu baai ku tigami ki talialalai ki swa Yuda ka Hezekia,

¹⁰ amia kai, “Kudra satalutalusu ka Twaumase peaelaela muswane, kaisu lri kipamaki nakwane; ai, madha kitavuvuvulrucu.

¹¹ Wathingalesu ki tinuhika ki swa Asiria ku sanaka nawamudu iyaini ku kuni, ku lrika angimiane? Lu kidremedremesu lri dulrusu udripi?

¹² Ku cucungulaneli nakiakaruburunga ki Guzange, Harange, si Rezepe, la amudu ki yakai Telasare ka swa Bithe Idingi ka laumawmase; ku latwaumase lini wadulru palribulu liniane?

¹³ Kaiasasane, ku latalialalai ki swa Hamathe, swa Arepade, swa Separevaime, swa Hina, si swa Iva yainu?”

¹⁴ Ku Hezekia wamalra patwalai ki wabaai ku tigami kwini tigami, sa silrigunga la mwa ki daane ki Twaumase, ikai cucubungu ki Tamatama paipai kwini tigami,

¹⁵ kwini lasu la papia ki Tamatama inulri iya kai,

¹⁶ “Tamatama ka abebeelengenga ki sanaka kwapingi, ka wanene ikai belenge ki taetalane ka Kirubime ka Twaumase ki swa Iseraylri, vaevasu ka Twaumase. Marasiakaisu kai kawmasane ki sanaka kuni; wabekacesu belenge kawmasane.

¹⁷ Tamatama, kilalra kai inulri nai. Tamatama, sirapala naiane! Kilalalra ku taiyane ki Sinakeribe, vaga ka twasinalrelrelreme muswane ka palralrawthu panianiake ka Twaumase.

¹⁸ Tamatama, wathingale nai, ku macucungulu ka latinuhika ki swa Asiria wamalra sadrarate padratane ki takaalra ka kuni,

¹⁹ la lama ki latwaumase ki lakuni, ku patengatengane ki lakikwini kaika latwaumase, umawmase ka arakai ku angatu, lrenege, tusamiamiange.

²⁰ Tamatama ka Twaumase nai, patwaladha ki alrima ki swa Asiria palribulu naiane; luka miyaiya kikai, kai kawmasane kai lakuni lri thingale ala ka vaevasu ka Tamatama.”

Tigami ki Isaiya si baai ki talialalai

²¹ Ku Isaiya ka lalake ki Amuse wasatedre ku tigami baai ki talialalai ka Hezekia, pelaela iniane, “Ku Tamatama ka Twaumase ki swa Iseraylri kialalranga ku inulrisu kukusu ki Sinakeribe ka tinuhika ki swa Asiria.

²² Ku Tamatama amia kai, ‘Sinaciribe, kai cekele Yerusalrime mwalralralrakai muswane, sidreadrekase muswane, la papia muswane si veteevete ku awlru.

²³ Wathingalesu ka aneane kwi tusinalrelrelremesu? Ka aneane kwi ulralrakaisu pakiangeangeange? Twatikiyanesu nakwane ka saniange ki swa Iseraylri ka Twaumase.

²⁴ Siakawlusu ki umawmasesu papia nakwane dradradrarane, nawasadrarate paadratane ki lregelrege kai sakikaruburane kai palridingili, adravane ku abebeelengenga ka lregelrege Lebanungu waelrelrenga naku amiasu. Ngiadradrengedrengeresu, ku taikaiyanesu kwini pulebe ku maelrelrengenga ku cedare ka angatu si mathaithaariringa ka alrenge ka angatu, la mwadringi angatungatu mwa ki adaidaailinga.

²⁵ Ngiadradrengedrengeresu, ka nawalruku ku dralremedreme si ungulu ku acilai, ku kwapingisu la drekare ku tadredreane ki kadravane ki Izipiti.

²⁶ “ ‘Bekacesu kai kilalranga ala ka paswalanga naku ngidradrekase ku apiane kilakikai patuelre? Kikainga lri pianga naku pangimia. Lri baadhaku muswane ku puku kwini makecenge ka yakai ku kepale ka cekele lai lri akinaburukane ka nisarubwane.

²⁷ Kwini ki yakaikai kwini ka laumawmase lri pamukuludraku liniane si lri kai thingale ku atumanane. Kwi lalasu lri mia ki yaubulane si yabelenge ki talrugulrugane ka laubulu, ka kiavalrigi ki twalai talrawane ka maculu ka valrigi si karudame patuelre.

²⁸ “ ‘Ku tatumananesu, ku mwainusu, wathiingalaku patuelre. La thingalaku ka malisilisisu nakwane.

²⁹ Kialalranga naku ka ngiakalrilrilrigusu, ka malisilisisu nakwane. Kaiasasane lri arakaiyaku kai sakakaili kaili ki ngungwanesu, la malra ku satametamengane ki ngudwi si tamenge ki ngudwisu; ku tangukaiyanesu ku kadalranane kainganai, lri patwaladhaku kwini ki kadalranane bilibili muswane pasiwlri.’ ”

³⁰ Pacungulu, ku Isaiya peaelaela ki talialalai ka Hezekia iya kai, “Kaiasasane lri sakaladhaku muswane ku vaeva. Kaiasane luicaili, kathanenga kai wacebecebe ikai ubulane kai ubulu ku akaneanesu. Luka sakatulrunga ka caili, lri dulrungasu sabulu ku sapaivai si kitaleke; la dulru lredreke ku budu, si kane ku twalai ki babududu ku budu.

³¹ Ku abalu ki kiaravase ku umawmase ki swa Yuda kuni lri miana ki wacebecebe papulelebe mwadringi balace, la papubebelenge pumadru.

³² Ikai Yerusalrime, ikai Ziyungu lregelrege, thadaalrane ikai ku abalu ki kiaravase ku laumawmase ku yakaikai, asi lwiyane ku Tamatama ka abebeelengenga ki sanaka kwapingi malrithethenga kalri tara pangimia kilakikai.

³³ “Ki ngwakai ki tinuhika ki swa Asiria, ku Tamatama amia kai, ‘Kwi lasu kai lri maka mudaane kai ki cekele, lai kai lri dulru papia kai ki cekele lraili ku navaevanga. Ku waecenge ku alathare ku lakwapingi kai lri maka mwadeethe kai ki cekele, lai kai maka ikai ki ngwadadethe thalringulu raedre ku tasalikaiyane kikaruburu.

³⁴ Kwi lasu luka ngwakainu ki kadalranane kainganai, lri ngukakaai kwini ki kadalranane katwase; kwi lasu kai lri maka mudaane ki cekele. Amaniaku ka Tamatama ka amia kikai pelaela.

³⁵ Ngwalai ki lriguli, laka ngwalai ku apangimianeli ku tapukawnanengali ki sasiakawluli ka Davidi, lri ngikakamaniaku drangalru kai ki cekele, palakebe kai ki cekele.’ ”

³⁶ Ku sasiakawlu ki Tamatama wamwa ki tasulasuladhane ki lakwapingi ki swa Asiria, la papacai ku ta 185,000 ku kwapingi. Sakakaiyane ki mialrealre, la ngisarade ku wapacai ikai cakena.

³⁷ Ku tinuhika ki swa Asiria ka Sinakeribe la katwasenga siwlri, mwa ka Ninivi.

³⁸ Yakai saka minakavalane, kwi lasu sa ikai ki biu sukusukubu ki twaumaseini ka Niseruke, ku tadrusa ka lalakeini, Aderemeleke si Sarizire, la papacai iniane, si mubere mu Ararate; ku tangeea ku lalake ka Isaradune la mucungulu atinuhika.