Isaiya 36 - Ngudradreadrekadhane Ka Sisiu 魯凱語聖經

Ku swa Asiria wakukuludru ki swa Yerusalrime

¹ Satara 14 ka caili ku taatalialaladhane ki Hezekia, ku tinuhika ki swa Asiria ka Sinakeribe kiakaruburu ki yakaai ku kepale ka cekele ki swa Yuda, si drikisi malra.

² Kwi lasu la drekase ki abebeelengenga ki kwapingini ililuku ku tarwathathatha ka kwapingi twalai ka Lakise mwa Yerusalrime, si tilibi ikai sadradradha ki baibaiyu thili valrwalru, ikai ki papia ki tasinasinavane ki makalrilau ka kadalranane, si kusanga iya ki Hezekia.

³ Ku tatulru ku wadaihiu ki swa Yuda matwase kikawriva, kwi lalasu yai amani ku: Lalake ki Hilekia ka abebeelengenga ki taradrangalrungalru ki daane ki talialalai ka Iliakime, laka tarapacapacase ikai ki daane ki talialalai ka Sebena, laka lalake ki Asape ka taramarasikai ki lrikisi ki kuni ka Yua.

⁴ Ku abebeelengenga ki kwapingi ki swa Asiria kiavaga, “Ku tinuhika ki swa Asiria pasana thingathingale ki Hezekia luka satalu ki manemane si ikai ku miyaiya kai ku galremegemane.

⁵ Kwi lasu nau ara vaaga si dulru patukamani ki rukudru ki kwapingi si tengatengane ka puku amiasu? Kwi lasu satalu ku puku ki aneane si nau baebalre iya nakwane?

⁶ Kwi lasu kiadremedreme ku akelane ki swa Izipiti paralubu, kwini kadrwa ku paluludane, maru siaukudrunga ku peraperake ka tirivu mukadalranane dadavace, lri pakusulusu ki alrimaini! Ku talialalai ki swa Izipiti lri tungimiyaiya kikai ki la satalutalu iniane ka laumawmase.”

⁷ Ku abebeelengenga ki kwapingi ki swa Asiria la pacungulu iya kai, “Alau lri iya numi kikai, ku satalutalu numi yai Tamatama ka Twaumase numi, ai, ku Hezekia kaika mabebetethe ku daaneini ikai lrelrelrege si tapatarumaramarane? Kwi lasu kaika wacunu ki laumawmase ki swa Yuda si swa Yerusalrime ikai ki tapatarumaramarane kavai Yerusalrime sukubu ki Tamatama sikakathane?

⁸ Kaiasasane lri sakaiyaku ku nagane ki tinuhika kiketekete numiane: Ku Hezekia alaiyasi dulru silape ku ta 2,000 ku ngwarigirigi ka kwapingi, lri baadhaku iniane ku 2,000 ku sakikaruburuburane ka rigi!

⁹ Ku patengatengane, kwi lasu adravane ka titikianenga ki kiacapili ki kwapingi ki swa Asiria kai maka kiaramawana, kwi lasu la kidredredremeana lri satedre ku swa Izipiti ku sakikaruburane ka palridingi si tarangurigi ka lakwapingi kela paralubu iya!

¹⁰ Kwi lasu kadrwa ku taparalubane nakwane ki Tamatama la kela kikaruburu iniane, amudu ki kunini? Ku Tamatama ngiakakamani cunu nakwane kainganai kikaruburu iniane, si amudu kai ki kuni.”

¹¹ Ala, ku Iliakime, Sebena, si Yua la iya kai kwini ki abelenge ki kwapingi, “Sinsi, arakaiya ku vaga ki swa Arame kawriva naiane, wathingale nai kilalra. Madha arakai ku vaga ki swa Hiburu, asi lwiyane kai yabelenge ki cekele kai laumawmase kialalalalra makanaelre.”

¹² Ku mabelenge ki kwapingi la iya kai, “Lu kidremedreme numi ku tinuhika pakawriva nakwane numiane si talialalai numi sikakathane amia numi? Ini, mialriaku kawriva papia kudra ki lawanene ikai belenge ki cekele ka laumawmase; kwi lalasu mararaamau numiane, kalri ngikakane ku caki lini makanaelre, ngiaungulu ku luru lini.”

¹³ Kwi lasu ala acegecege, si arakai ku vaga ki swa Hiburu akwadrau tawtau, “Kunumi kilalra kai pacase ka vaga ki tinuhika ki swa Asiria.

¹⁴ Kwi lasu pakiapapawlringalringau numiane: Madha kitavuvuvulrucu ki Hezekia; ku Hezekia kai lri dulru palribulu numiane.

¹⁵ Madha pasalalaladha iniane si katwase satalu ki Tamatama. Lri tara palribulu ku Tamatama numiane madha iyaiya; ku kwapingi ki swa Asiria kai lri dulru kikaruburu mwa ki cekele numi madha iyaiya.

¹⁶ Madha kilalralalra ku vaga ki Hezekia! Ku tinuhika ki swa Asiria wadrekase numiane bwala kusanga iya. Lu mia kwini, lri dulru numi ngimia ku tapiapiane numi ngikakanekane ku budu si icizike ka madru, ungungulu ku acilai numi ikai ki dralremedreme.

¹⁷ Pakeela ku tapaiziwane numiane ki tinuhika mwa ki maelane ka kadaengane, ka mararamau ki kadaengane numi, yakai ku lataleke, budu, pange, mathariri ka bava.

¹⁸ Madha patavuvuvulrucu ki Hezekia numiane, si lri kela ku Tamatama palribulu numiane iya. Wadrelenga numi lu ikai ku latwaumase ki vaeva ka kuni ku palribulu ki kuni lini si kalrabuthu ki alrima ki tinuhika ki swa Asiria?

¹⁹ Ku latwaumase ki swa Hamathe, latwaumase ki swa Arepade, latwaumase ki swa Separevaime, mwa inunga makanaelre? Aneanenga ku palribulu ki swa Samaria kalrabuthu ki alrimali?

²⁰ Yakainga ku latwaumase ku patwalai ki alrima ki tinuhika nai palribulu ki kuni lini? Arakai numi ku manemane kasalru ki Tamatama numi kalri palribulu Yerusalrime?”

²¹ Ku laumawmase kadrwa ku avavaga makanaelre; kwi lalasu pasalaladha ku drekase ki talialalai ka Hezekia, kadrwa ku avavaga, la kai tubalre kwini vagaini.

²² Ku abebeelengenga ki taramarasikaikai ki daane ki talialalai ka Iliakime, tarapacapacase ikai ki daane ki talialalai ka Sebena, si abelenge ka taramarasikai ki lrikisi ki kuni ka Yua la tubi turamuru ku kidremedreme si thurilace ku laimai lini, la siwlri mucekele si pelaela ki talialalai ka Hezekia ku taiyane ku vaga ki mabelenge ki kwapingi ki swa Asiria.