Isaiya 35 - Ngudradreadrekadhane Ka Sisiu 魯凱語聖經

Mabwabulanga ka kadalranane

¹ Ku aenaenai lri kiraragai; ku bengelrai ubulane ngiapaipaipai.

² Ku thaliagumu ki aenaenai madirele, kiarararagai senasenai. Lri mia ka Lebanungu ku adravane tharirane, mia ka Karemele si Sarungu ku takalrangeane. Sanaka umawmase lri drele ku lrigu ki Tamatama, lri drele ku matiukuludrane usakene ki Twaumaseta.

³ Lri pasapukwane numi kwini ki mabalrebalre kwi alrima, pacegecege pakadringelrese kwi manwagiligiligili kwi drapale.

⁴ Pelaela ki masulrisulri ka umawmase: Kakecenga, madha mukuludru! Ku Twaumase lri kela palribulu numiane; ku Twaumase lri bilri ki badha numi.

⁵ Lukamaninga kwidra, ku mamukici lri dulrunga drele, ku macele lri dulrunga kilalra,

⁶ Ku pilapilai lri dulrunga mia ki salawngane itituku, ku menemenene lri dulrunga senai. Ku calragulragu lri berai ku madrau ku acilai; ku ubulane ka enaenai lri mwalwalwaludru ku acilai.

⁷ Ku culwane ki aenaenai lri akabalrithi abaibaiyu; ku meameale ku kadaengane lri ikainga ku tacebeane ki acilai. Ku taikaikaiyane ki tawpungu ubulane lri cebe ku ubulu kasalese si latirivu.

⁸ Lri ikai ku madrau ku kadalranane, lri kipasi “Mabwabulanga ka kadalranane”. Ku pasalrisalriu ku umawmase kai lri maka dadavace ngukakai kikai ki kadalranane; ku makulrungu ku umawmase kai lri maka ikai kikai ki kadalranane masasawlri.

⁹ Ikai kwini kadrwa ku laraiyungu, laka kadrwa ku lawaudriwdripi. Kathane ku palribulu ki Tamatama ku umawmase, ku lri ngukai kikai ki kadalranane mubalriu.

¹⁰ Ku kiapalribulu ki Tamatama ku umawmase lri siwlri kainganai, kirararagai kela mu Yerusalrime, senasenai ki sakiararagai, si akwadrau tawtau. Kwi lalasu lri kiraragai turamuru palralrawthu, kai lri kathekelrenga tubitubi.