Isaiya 34 - Ngudradreadrekadhane Ka Sisiu 魯凱語聖經

Ku Twaumase lri pathavungu ki badha

¹ Sanaka umawmase ki lakuni, kainganadha makanaelre! Kunumi bwala kilalalra makanaelre. Kunumi ka kiacaebe ki belenge ka laumawmase bwala makanaelre mwa kai cucubunguli si kilalalra.

² Ku Tamatama malisi papia ki lakuni si lakwapingi ki lakuni. Ku Twaumase twapasalrivanenga liniane, si pakitulrepenge amudu liniane.

³ Ku wapacai ka kinawmasane lini yalatadre italuvaivai, si sangubalre kaburaburau; erainga lregelrege si ubulane palraelre.

⁴ Ku vai, dramare, si latariau masuburu athuvugu. Kai subelebelenge lri kawlrau, mia ki kiabalrulu ka hungu; ku latariau mwalebe tuverevere, mia ki icizike ka angatu si cebe ki budu lu ururu ku vasau.

⁵ Ku Tamatama yakai belenge twadreadreme ku dramu; lri papacai kudra tupasalrivanengaini ka lri kamudu ka swa Idume.

⁶ Ku dramuini lri suete ku erai si lamace lini, mia ki sarakaiyane patarumara ka erai ki tikiane ka kiu si kisisi, si pede ki balase ka kiu. Ku Tamatama lri ikai cekele Buzera patarumara, lri ikai Idume papacai ki laumawmase.

⁷ Ku laumawmase lri mia ki yaubulane ka lwange si lrulai ka lwange mararaamau tubakebake pacai; ku kadaengane lini lri suete ku erai, ki ubulane lai lri kabungu ku sima.

⁸ Kikai yai tapalribulane ki Tamatama ki swa Ziyungu, si tapapiane ki badha bilri ka vai.

⁹ Ku kadravane ki swa Idume lri akabalrithi akurutange, ku kadaengane lri akabalrithi athilaru; ku kuni palraelre mia ki kwadaladalai ka kurutange,

¹⁰ lukavaiyane lukamaungu kwadaladalai, ku ebelre la papubebebelenge, palralrawthu kai idrengedrengere. Ki kikai kadaengane lri pakela ki mwabaibalrithi ka tamatisepeelane, lri kai ikainga ku umawmase kulri ngukakai lribate.

¹¹ Kikwini kathane ku ngwadradrakerale ka adhadhame, tuceceneke ku ubale ka tila, kwici, si talralreba ka yakaikai. Ku Tamatama lri pakakadrwa sanaka maneemane, mia sakaiyana bekace kai kawmasane.

¹² Kadrwa ku talialalai, la mialri ka kadrwa ku tabebelenge ku warathudu kai ki kadaengane.

¹³ Ku daane ki talialalai si balingibingi ki cekele swaete cebecebe ku cecenekane ka angatu, bala ka ubulu, kathane ku tawpungu ubulane si tuniau ka yakai kwini adredrelane.

¹⁴ Ku tawpungu ubulane, kisisi, si drumane ka waudriwdripi ka yakai kwini dadadavace; la kawkawkau ku matiaukukuludru, si matubaebaebalre; lukamaungu ku lagalrale kaiyanganai silasilape ku aikaiyane.

¹⁵ Ku kwici yakai kwini tulisisuku, la tulalake, kubu, si lapu ki kiakiau. Ku lasegese tarwa drwadrwadrusa ngipalai, si yelrelre ikai kwini.

¹⁶ Kunumi lu katwasa si drele ku hungu ki Tamatama, la drele luka tumana amia ku hungu. Kikai lawaudriwdripi kadrwa ku kiapawcilri, kwini lawaudriwdripi yakai kwini lri karededele si masilasilape ku palra. Kikai yai Tamatama ka ngiakakamani cunu; ku Twaumase lri alra sarubu payelrelre liniane,

¹⁷ Ngiakakamani ka apatudrudrulru kikai kadaengane, ku lrika aikaiyane ku drulru lini makanaelre, si pakela ki mwabaibalrithi ikaikai kwini. Kikai kadaengane lrika palralrawthunga ka liniane.