Isaiya 33 - Ngudradreadrekadhane Ka Sisiu 魯凱語聖經

Kiatubi ku akipalribulane ka inulri

¹ Ku badhata lri kipadradresengenga ku amatikurwane! Kwi lalasu tararavaravase ku palrapalrane, ai kaiyana kiaravase ki umawmase; kwi lalasu watavuvulrucu ki umawmase, ai kaiyana kiatavuvulrucu ki umawmase. Ai lu kelanga ku kaika adulrwanenga lini ravase tavuvulrucu, kwi lalasu lri ki bilringa kiravase kitavuvulrucu ki palrapalra.

² Tamatama, kiatubi nai muswane kakalitha naiane. Piakainga nai muswane ku sasiadradrama nai. Kiatubi nai muswane palribula naiane lukakaiyaiyaiya, lu ikai nai ki matiaukuludru palribula naiane.

³ Lu pasikaisu naiane kikaruburu, kai sanaka kuni yakai ki magagiringane mawbebere.

⁴ Kwi lalasu ikai ki tamakakaruburane ku ravase lini ku lawbubulu kiaribici ki badha patuelre, mia ki lataleke ka kiakane eleme ki walribate ka apapawku.

⁵ Ku Tamatama saniangelringa! Amanini ka wadrangalrungalru ki sanaka maneemane. Amanini ka paswaete Yerusalrime ku dringelresane si aparamaramavane.

⁶ Si la pakapapedrenge ki kuni. La palralrawthu palribulu ki kawkawluini, la baai liniane ku lrigilane si thingalane. Ku ausakenane mukuludru ki Tamatama yai amani ku madraadrawnga ka tacekecekelane.

⁷ Ku garagarange ka kwapingi kiatubi ku akiparalubane; ku tarakisikawlu ku akarathudane avavaga ki sakwalrialri ku kidremedreme.

⁸ Matiaukuludru ku kadadalranane, kadrwa ku umawmase ku walreme mubabadhane. Ku samakaketeketane twakakadrwanga, ku nimapapalraingane kadrwanga ku paluludane; ku laumawmase kai maka kasalrusalrunga.

⁹ Ku kadaengane aubulanenga; ku angatungatu Lebanungu marudame; ku valrwalru lregelrege Sarungu matiasepele; ka Basane si lregelrege Karemele ku lavasau ki angatu mwarurunga patuelre.

Ku Tamatama pakiapapawlringau ki badha

¹⁰ Ku Tamatama amia kai ki sanaka kuni, “Kikai lri pwalrimanga naku. Lri padrelaku numiane ku pukuli ala ka madrau turamuru.

¹¹ Ku nau pia iyaiya numi kadrwa ku paluludane; ku tapiane numi ngivelevele kadrwa ku vai. Ku Rili lri mia ki apwi amudu numiane.

¹² Lri mia numi ki lrenege kilama ki apwi, si aabu, mia ki cecenekane ka angatu ka kiakete si ikai ki apwi lama, la aabu.

¹³ Swa adaaili ka laumawmase, lri drele numi ku piali patuelre; kunumi ka swa adeethe ka laumawmase, lri pasudalepe numi ku pukuli.”

¹⁴ Ku yakai Ziyungu ku pasalrisalriu ku umawmase lri mukuludru manugiligili. Kwi lalasu amia kai, “Ku saibange ki Twaumase mia ki apwi kai kaedredrepe palralrawthu, lri dulruta twalai kai ki apwi mubere?”

¹⁵ Sana ulecege kwi kakwakudhane numi, kapatengatengane ku taavavagane, lri dulru numi panianiake. Madha tusinalremelreme dredrepete ki matiakukuru ka umawmase; madha malramalra ku pavangalre; madha kipaelrelre madrekadrekase ku apapacadhane ki umawmase; madha piapia ku ngialisiane.

¹⁶ Lukamiyaiya kai, lri dulru numi kipasavidhi, mia ki yakaai adringi ki makecenge ka kepale sutelrai. Lri kai numi kathekelrenga ku akaneane si awngulane.

Lukabibilrili ka lrigu

¹⁷ Lri dreleana numi ku tangeea ku talialalai kulri arakai ku kilibakane rathudu ki madrau ka kuni.

¹⁸ Kudra nanimukulukuludrane ku taramalramalra ku padulru ka maelane ka kuni si taralrilriu lri ngilribatenga.

¹⁹ Lri kai numi drelenga kudra tarangikalrilrilrigu kudra maelane ka kuni ka umawmase lu ikai numiane kawrivariva ku kaika thingale numi kilalra ku vaga.

²⁰ Kunumi drela Ziyungu, amani ku tulrisisisita ku saniange ka lrisi ka cekele. Kunumi drela Yerusalrime, lu ikaita adringi swatelraita! Lri mia ki balrawbau ka daane ka kai lri ngivelevele palralrawthu; ku sakedrekedreini kai lri tuluthunga palralrawthu, ku calrisi kai lri retegenga palralrawthu.

²¹ Ku Tamatama lri padrelane ku lriguini. Lri ikaita ki swadrau ki thili ki vaalru; ku varukuru ki badha lri kai ikainga kwini masasawlriwlri.

^22-23 Adravane ikai ku varukuru ki badha ku mwadaane ki tawbilabilane ki lavarukuru, ku saerecane ku calrisi lri kalruka, ku balrawbau ki varukuru kai lri maka ngipaipai; ku yabelenge ku lalawbubulu lri aniravasanenga mitane ka lawbubulu, adravane ka mapiapilai ka kai maka wadulru dadavace lri ikaai ku drulru lini. Ku Tamatama amani ku tarasaibaibange mitane, ku tarakelrekelrete ku hulriceta, ku talialalaita; ku Twaumase lri palribulu mitane.

²⁴ Ku yakai ki kadaengane ki kunita ku umawmase kadrwanga ku caemane ku akiangeangane, ku pasalrivane ki yakai kai ki cekele lai lri mialri kipacepe makanaelre.