Isaiya 32 - Ngudradreadrekadhane Ka Sisiu 魯凱語聖經

Aparamaramau ka talialalai

¹ Lri ikai ku vai, lri utaluvaivai ku arakai ku dringelresane gemegeme ku puku ku talialalai si arakai ku aparamaramavane rathudu ki kuni ku latarasangililuku.

² Kwi lalasu makanaelre lri mia ki tamwamwane kipalribulu ki varukuru lu valrivalrigi, tamwamwane mulrilri lu udaudale ka tarugutugu, mia ki berai ikai ki aenaenai, ikai calragulragu ubulane ka takulrilrilriane ka madradrau ka lrenege.

³ Ku calringa lini maca lini lri papia ki mapapangale paipai.

⁴ Kwi lalasu kai lri taupungunga ki laumawmase, lri arakai ku kalithane ku kidremedreme twatumane, lu kawriva lai lri kai ukakangenga.

⁵ Kadrwanga ku umawmase kulri tumalrigili ulecege ki makulrungu ka umawmase, lai lri ka kadrwanga ku twamalrigili kapapedrenge ki kaika nibulrubulrwane ka umawmase.

⁶ Ku makulrungu ku umawmase lu kawriva kadrwa ku paluludane, kiadredredreme ku apiane ku malisi sikakathane; kwi lasu ku taavavagane tangivelevelaneini twasinalremelreeme ki Tamatama sikakathane. Kwi lasu kai wapakapakane ki masilrau ka umawmase, kai paungungulu ki makadhame ka umawmase.

⁷ Ku taralrilrilrigili ku umawmase paiyaiya ku ngialisiane sikakathane; kwi lasu arakai ku tavuvulrucane ribici ki matiakukuru ka umawmase, kwi lasu watavuvulrucu, ku matiakukuru ku umawmase la kai maka malra ku naika amalraneini ku kindri.

⁸ Ai ku malrigili ulecege ku umawmase lri pia ku ngiaesadhane ku awngane; kwi lasu paraluraalubu sikakathane ku ngiaesadhane kapapedrenge ku awngane.

Saibange si angiradhekanane

⁹ Kadrwa ku thekelrane, ka masulivaliivate ku tacekecekelane ka lalabaibai, kiraraketa kilalra kai vagali.

¹⁰ Kaiasasane alau ngwalwalwaadhane numi, ai luicaili kikai, lri kasulringa numi, asi lwiyane kadrwanga ku amalrane numi ku budu.

¹¹ Amani numi kudra kadrwa ku thekelrane, ngulwalwalwadhane ku tacekecekelane; kikainga lri kathathiburunga numi. Lri mwalranga numi ku laimai, si arakai ku puripurici ku makalrilau silakete.

¹² Lri ngitatatuku numi si tubi, asi lwiyane mamudunga kudra malrange ka takauawngane si mawivaivai.

¹³ Ikai ki kadaengane ki kawkawluli, lri cebenga suete ku cecenekane ka angatu si bala ka ubulu. Kunumi pasikaiya tubi kudra ki twalai ki nakiarararagai ku tacekecekelane si ngiaradheradhekane ka cekele.

¹⁴ Lrika cinilrianenga ku daane ki talialalai, ku matiapeaperau ka cekele lrika kadrwanga ku twaebebebelre ku daane. Ku tasakaikaiyane kikaruburu si kepale ki cekele lri abarungulunga ki waudriwdripi. Ku yaubulane ka ruba lri ikai kwini kivavavange, ku lakiu yakai kwini kanekane ku ubulu.

¹⁵ Ai ku Twaumase lri pelana sikawlu ki Rini kainganai mwa mitane kai. Ku kadrwa ku manemane ka kadaengane lri kalrangenga ka umawma; ku malrange ka umawma lri aangatungatu.

¹⁶ Yakai kidruanga ku dringelresane, yakai ku aparamaramavane.

¹⁷ Asi lwiyane ku tangivelevelane ki sanaka umawmase mwaleecege; kwi lalasu lrika palralrawthunga kasulivaliivate ikai kwini.

¹⁸ Ku daane ki kawkawlu ki Twaumase lri sutelrai kasulivaliivate, ka kadrwa ku thekelrane.

¹⁹ (Ai ku kananu lri mulebe ikai ki angatungatu, ku cekele lri kikabebetethe.)

²⁰ Kudra yakai babiabila ki acilai kauawngu, si kaswalreke ku kidremedreme pikai ki ububulane pakapakane ki lalwange si laruba ka umawmase matharirilriinga!