Isaiya 31 - Ngudradreadrekadhane Ka Sisiu 魯凱語聖經

Ku Twaumase lri palakebe Yerusalrime

¹ Kudra lawamwa Izipiti kitubi ku akipalribulane ku umawmase lri kipadradresenge ku amatikurwane! Kwi lalasu satalu ki madrau sapukwane ki kwapingi ki swa Izipiti, sakikaruburuburane ka larigi, sakikaruburuburane ka palridingi, si ngwalalebe ka kwapingi, kwi lalasu kai satalu ki saniange ka Twaumase ki swa Iseraylri, la kai kitubi ku akiparalubane ki Tamatama.

² Ai, ku Twaumase yakai ku maadradrau ku lrigilane, ku Twaumase lri pathavungu ki manganganga si kwidra ki pwasakai palribulu liniane ka umawmase. Ku Twaumase malrithethe ku apulebeane ku amatikurwane, kai lri akabalrithi lutuumane.

³ Ku swa Izipiti kaika Twaumase; umawmase si ka kathane. Kwi rigi lini kaika twaumase ka rigi. Ku Tamatama sana sege ku alrima, ku ngiaradhekane ka kuni lri mialri kalri kasuburu, kudra paraluralubu lini ku twaramuru ka kuni lai lri mialri kaamudu; kikai taidrusa lri tara kaamudu.

⁴ Ku Tamatama amia kai nakwane, “Mararaamau ki raiyungu ki lrulai ka raiyungu lu pwalra ku vaeva ku waudriwdripi, adravane lu tumanaiyaiya karaleale ku taraagwagu ki kiu, kai lri ukuludru kai lri kathathiburu. Thadaalrane, kwaku ka Tamatama, ka abebeelengenga ki sanaka kwapingi lri palakebaku lregelrege Ziyungu; kadrwa ku umawmase kulri dulru ruthuku.

⁵ Mia ki adhadhame ka yakai ki lisisuku palakebe ki lalrulai ka adhadhame, kwaku ka Tamatama, ka abebeelengenga ki sanaka kwapingi lri mialri palakebe Yerusalrime, si drangalru iniane, palribulu iniane, ku kaika akitulisiane.”

⁶ Ku Tamatama amia kai, “Swa Iseraylri nawabaebalrenga numi nakwane. Kikainga bwala siwlria!

⁷ Wakelanga ku vai, naika wacilri numi kudra ngipapia numi arakai ku gingi kingi darepe kudra langialisiane ka samiamiange.

⁸ Ku swa Asiria lri ikai ki tamakakaruburane kikabebetethe, ai kaika ngwalai ki puku ki umawmase. Ku swa Asiria lri ikabiceacelrake mubere; ku yacengecenge lini lri kiravase si kituduri.

⁹ Ku tinuhika lini lri mukuludru si mubere; ku latabebelenge ki kwapingi mathathiburunga kai thingale ku apiane la arwalrikulriikudrunga, adravane ka kalralraadha waciilringa.” Ku Tamatama amia kai pelaela. Ku Tamatama lri ikai Yerusalrime pia ku tatwapwapudhane, si ikai Ziyungu lama ki badha.