Isaiya 3 - Ngudradreadrekadhane Ka Sisiu 魯凱語聖經

Takalrithavulane ki swa Yerusalrime

¹ Ku abebeelengenga ka Tamatama ka abebeelengenga ki sanaka kwapingi lri malranga patuelre ku urikaikai lukavaivai ki laumawmase ki swa Yerusalrime si swa Yuda; lri mwalra ku akaneane si acilai lini.

² Kwi lasu lri amudu ki garagarange lini si tarakikaruburu ka kwapingi lini, la tarasaibaibange si layuginsia, la tarayugiwgingi si laciwru,

³ Latara marasikai ki ngwakai ki kwapingi si latarasangililuku ki cekele, la swa kunkwane si lataratulrisilrisi ka umawmase.

⁴ Ku Tamatama lri arakai ki kadrwana ku thingale ka layacengecenge marasikai rathudu liniane.

⁵ Sanaka umawmase pasana lravelraveke ki palrapalra; ku yacengecenge twadrekase ki latarudrawdrange; ku lamatiakukuru twasinalreme ki lamaesaesaesai.

⁶ Lu kelanga kwidra ki vai, yakai ku umawmase kulri ikai ki wacekecekeleini pilri ku tangea, si iya kai, “Ikai kai ki akwalriane ka vai, yakaiyana kwi asilaimadhaneanasu kwi vaeva ka sapakabelebelengane, bwala ka amania ku tarasangililuku naiane!”

⁷ Kwini umawmase lri tubalre iya kai, “Madha pilripilri nakwane ka amani ku tarasangililuku; kainaku lri dulru paralubu muswane. Kadrwa ku akaneaneli, laka kadrwa ku asilaimadhane.”

⁸ Unu, lri kaburukunga kai Yerusalrime! Lri kikabebetethenga kai swa Yuda! Ku takawrivane ki lalasu, ku tapiane patuelre kadrwa kuna vaevanga ku kaika tabaebalreane ki Tamatama; kwi lalasu piataluvaivai tusinalreme ki Twaumase.

⁹ Twalai ki tapangimiane ki lringau lini wadulru madu drele ku ngilisianane ki kidremedreme lini. Kwi lalasu mararamau ki swa Sudume, piataluvaivai pasalriu. Kwi lalasu lri kipadradresenge ku amatikurwane; kwi lalasu lri kipakiwbilrili ki kakwakudhaane lini.

¹⁰ Papia ki makalecege ka umawmase iya kai, kwi lalasu lri kasulialialivate ku tatwatumanane; kwi lalasu lri kisupilri ku takaungane lini.

¹¹ Ai ku manganganga ku umawmase lri kikela ku amatikurwane; kwi lalasu lri ngwalai ku pia lini ku ngialisiane si mucugu.

¹² Kunumi ka kawkawluli, lri kitusinalreme numi ki lavavalake, si kimarasikai ki labaibai. Kawkawluli, ku tarasangililuku numiane kai pwadriadringai sangiluku numiane, ala kamani ku kaika thingale numi ku apapiane katwase.

Ku Tamatama wasaibange ki kawkawluini

¹³ Ku Tamatama wadrelenga patuelre ku tangimiamiane; lri acegecege si pelaela ku tasaibanganeini ki kawkawluini.

¹⁴ Ku Tamatama lri patwalai ki kawkawluini dawlu ki laciwru si latarasangililuku, si pelaela ku pasalrivane lini, iya kai, “Mabebetethenga numi ki mawbududu ka umawma; swaetenga ki daane numi ku rubirubici numi patwalai ki matiakukuru ka umawmase.

¹⁵ Kadrwa ku kindri numi lrwalrumai ki kawkawluli! Tusinalrelreme lrilrigili ki matiakukuru ki umawmase! Amianga naku kikai peaelaela ka amani ka abebeelengenga ka Tamatama ka abebeelengenga ki sanaka kwapingi.”

Pakiapapawlringu ki labaibai ki swa Yerusalrime

¹⁶ Ku Tamatama amia kai, “Kunumi drela, kai labaibai ki swa Yerusalrime ngiakalrilrigu turamuru! Kwi lalisu lu dadavace watangeranane, papia subelebelenge. Kwi lalisu apapiyaiya kwi maca lini, lu dadavace waraanau apapiyaiya ku tangivelevelane lini, paswaete ki drapale sikerekere.

¹⁷ Lakamani, lri tara pathavungaku liniane; lri kiritaku ki isiu ki awlru lini, si pangwimadhane liniane.”

¹⁸ Ikai kwini ki vai, ku Tamatama lri malra iluku patuelre ku tukucingalre lini ku lawbubulu ki labaibai ki swa Yerusalrime, paelre ki sangiragelanane ki drapale, ki awlru, ki lre,

¹⁹ si tabalangane. Ku Twaumase lri mwalra ku sangikakabungane ki lalisu,

²⁰ ku talrupunu lini, sapangiragelanane ki tabatirikane si takilrisaisane,

²¹ tara ki alrima, lridingi ki ngungwane,

²² si takuciacingalre ka sangiragelanane ka laimai, sapakabelebelengane ka laimai, palimemelre, tapaiswane;

²³ la ikaiyana ku niara pelrecane tinunu ka talapu, niara lrekelrekane tinunu ka hankaci, yakaiyana ku salripungai si sakabungane ki lringau; kadrwanga ku navaevanga ku asuru!

²⁴ Kwi lalisu kai lri arakainga ku sapasangulrelremane, lai lri sangumia ku kinawmasane; kwi lalisu kai lri arakainga ku mathariri ku lakete, lri arakai ku kacalrisane bethebethe ki takilrisaisane lini; kwi lalisu kai lri kadaidapinga tuthariri ku isiu, lri ururu kalrungulrungu ku isiu; kwi lalisu lri kai silaimainga ku mathariri ku laimai, lri silaimai ku nicakucakucakupane ku laimai; ku tharirane lini lri akabalrithi si kiarubwane.

²⁵ Ikai ki cekele ku sawvalai ka amani kwidra ngicaecaemenga ku tacebeane, lri mialri pacai kai ki takikaruburane.

²⁶ Ku lrawlrawdru ki cekele lri karalealeale tubi; ku cekele lri mia ki ababai ka kiaulaimai patuelre, si nene ikai ki thuvugu ka dae.