Isaiya 29 - Ngudradreadrekadhane Ka Sisiu 魯凱語聖經

Ku angimiane ki Yerusalrime

¹ Adravane ka tapatarumaramarane ki Twaumase, ka amani kai Yerusalrime, lri mialri kipadradresenge ku amatikurwane! Ku tasalikaiyane ki kwapingi ki Davidi ku cekele lri kipadradresenge ku amatikurwane! Adravane ngilribalribate ki caicaili, ku kalalrilrisiane kai lri akabalrithi, lu ngilribatenga lri kela pathagili,

² Ku Twaumase lri tuthadalrane papia kikai ki kiapasi “Tapatarumaramarane ki Twaumase” Ka cekele pulebe ku amatikurwane. Lri ikai ku lingau ku wadadange tubitubi karalealeale; ki kinauacekelane lri akabalrithi aeraeradhane ka madrau ka tapatarumaramarane.

³ Ku Twaumase lri thalringulu kai ki cekele, lai lringulu iniane, si kikaruburu iniane.

⁴ Ku swa Yerusalrime makiwcu avavaga, la kucucu icakena, si drepete ki lrulrungu kawriva, mia ki aidridringane ka twalai swadriadringi kawriva.

⁵ Yerusalrime, ku kiakaruburu muswane ku badha makanaelre lri mia ki thuvugu kipalai masawvagavagai; kudra matiukuludrane ku kwapingi lini lri mia ki lrapi kipalai ki valrigi. Lri pangitutuluku, pakasamaimaali,

⁶ Ku Tamatama ka abebeelengenga ki sanaka kwapingi lri arakai ku pakialringau ku dreredrere si lingilingi, lri sikawlu ki kwadrau ka lingau, maadrau ka valrigi, si kelrabe ka apwi kainganai palribulu muswane.

⁷ Ala, lri amakinga kudra lakwapingi ki lakuni kudra kaiyanganai kikaruburu ki tapatarumaramarane ki Twaumase; ku adreme lini si lasarakaiyane kikaruburu ku lamanemane lri mia ki sipi, mararaamau ki sipi lukamaungu kawlrau.

⁸ Kudra lakwapingi ki lakuni ku kaiyanganai kikaruburu Yerusalrime lri mia ki wapacapaacainga ki silravane ka umawmase ka yakai ki sipi taetaetalre, lu pacununga masilrawana; kwi lalasu mia ki amani kudra wapacapaacainga ki kadhamane ka umawmase ka yakai ki sipi ungungulu, lu pacununga thadaalraneana kakadhame.

Kadrwa ku umawmase ku kialalra ku nipakipapawlringavane

⁹ Pacungula piapia ku langiakulrungane! Pacungula kamukimukici! Twabakebakenga numi ki busukane lu kainu ungulwana, lu kainu tunipiana ku bava la lridrawdrawdrawnga numi!

¹⁰ Ku Tamatama pakasipepelrenge numiane; pamemecane numiane. Kai yuginsia naika maca ki mapapangale, ai ku Twaumase watamenge ki maca lini.

¹¹ Sanaka maburusi ku pacugane wasekete numiane patuelre, mia ki nicaebane ka nibalrubalrulane ka hungu. Lu malra numi kikai nibalrubalrulane ka hungu si pasilrigu ki malrigili, kwi lasu lri tara pelaela numiane, ka kai lri maka silrigu, asi lwiyane kikai nibalrubalrulane ka hungu nicaebane.

¹² Lu pasilrigu numi ki kadrwa ku thingale ka umawmase, kwi lasu lri pelaela numiane, ka kai wathingale silrigu.

¹³ Ku Tamatama amia kai, “Kikai lamapapangale wasukusukubu nai amia nakwane! Kwi lalasu arakai ku bibiane lini usakene nakwane, ai ku kidremedreme lini kiadailinga nakwane. Ku takisuswane lini kathanenga kudra lanitukakudhanane ikai ki umawmase wathingalenga kai dredrele lu silrigu.

¹⁴ Ngwalai kikai, lri pelaku arakai ku matiasamaimali lrumai liniane, lai lri ngituluku. Ikai liniane, ku malrigili ikai ki talrilrigili lri kakadrwanga ku paluludane; ku thingalane ngutatiki ki umawmase lri ka kadruanga ku sapatumatumane.”

Sasiadradrama lukabibilrili

¹⁵ Kudra la wasekete ki Tamatama ku madrekadrekadrekase lini ku umawmase lri kipadradresengenga ku amatikurwane! Kwi lalasu yatakadradridrimitane madrekadrekadrekase, kadrwa ku umawmase ku wadredredrele, kadrwa ku umawmase ku wathingale ku latatumatumanane lini la iyaiya.

¹⁶ Kwi lalasu wabalrenga ku pacengecenge si kai pacengecenge. Makuciacingalre kai taratudilrudilrungu, makuciacingalre kai ladilrungu? Ku tulawbubulu ki umawmase tumane dulru iya kai ki umawmase, “Kaisu wadarepe nakwane” Lulri iya kai iniane, “Kaisu wathingale luka watumatumanesu”.

¹⁷ Mia kudra la kilalralalrangata ku lavaga ku amia kai, “Kai lri tarathainunga, kai ubulane lri aumawmanga ka malrange; kai malrange ka umawma lai lri aubulane.”

¹⁸ Lu kelanga kwini ki vai, ku macele lri kilalranga ku sialrigilrigu ku lingau; kudra taikaiyane ki dradrimitane ka mukimukici lri manumacanga si drele.

¹⁹ Ku alebe ku takaumawmasane lri tarumara ku patarumara ki Tamatama ku sakiaragai; ku matiakukuru ku umawmase lri drengedrengere ki sanianiangenga ka Twaumase ki swa Iseraylri.

²⁰ Ku wadredredrepete ki umawmase lri kimwalra; ku pasalriu ki Twaumase lri kipathavungu; ku pasalrisalriu ka umawmase lri kiamudu.

²¹ Ku twalilisi ki palrapalra, la vangavange ki aparamaramau, tupasalrivane ki patengatengane ka umawmase, ku Twaumase lri amudu patuelre.

²² Kaiasasane, ku Twaumase ki swa Iseraylri, amani kwidra napalribulu ki Aberahame ka Tamatama amia kai, “Kawkawluli, kai numi lri kitusinalrelremenga, kwi lringau numi kai lri ngwalainga ki matikurwane si kadraselre.

²³ Lu drele numi ku patarumarali baai numiane ku lagagane, lri pasudalepe numi nakwane ala ka sanianiangenga naku ka Twaumase ki swa Iseraylri. Lri usakene numi nakwane, lri mukuludru numi nakwane.

²⁴ Ku makulrungu ku umawmase lri kicawcakwane si kalrigili; kudra takalisilisiane kaelaelaela ku umawmase lri mubangalrenga kibulru.”