Isaiya 28 - Ngudradreadrekadhane Ka Sisiu 魯凱語聖經

Pakiapapawlringau ki swa tali dradha ka kuni

¹ Ku kuni ki swa Iseraylri lri kipadradresenge ku amatikurwane! Kudra lriguini maulrau, mia kudra siatawpu ku bengelrai ka lamabusuku ka tarasangililuku. Kwini lalasu paralikiliki ku sangwalreme pwa kwini belenge ki awlru ki ngiakalrilrigu, ai matiataulra kwi lalasu mabusukunga turamuru, si tubakebake ikai cakena.

² Ku Tamatama padulrunga kudra sapukwane ka umawmase kulri kainganai kikaruburu liniane. Kwini lasu lu kela, lri mia ki valrigi, lri mia ki umuku, lri mia ki lriau salraelre sanaka kadaengane.

³ Kwidra lamabusuku ku tarasangililuku kiadredre pikai ki tailebe ki drapale makanaelre;

⁴ Kwi lalasu kudra akabalrithinga ka namatiadadalame ka lrigu lai lri mialri kakadrwanga, mia lu tau ka kaladralrangedrangane ka tau pumadrumadru ka icizike, sana kalreme kialabutu ki umawmase si kane.

⁵ Ikai kwini ki vai, ku Tamatama ka abebeelengenga ki sanaka kwapingi lri mia ki mathariri ka bengelrai ka tawpu, ka piakai ki awlru ki abalu panianiake ka laumawmase.

⁶ Ku Twaumase lri patarumara ku aparamaramavane ku kidremedreme ki tarasaibaibange, patarumara ku garangane ki taradrangalrungalru ki lrawlrawdru ki cekele, si watelenge ki magarange ka badha.

Isaiya si mabusuku ka yuginsia ki swa Yuda

⁷ Ku layuginsia si labarakalai mialri kabusuku lridrawdrawdrau; kwi lalasu pingiadrau turamuru ungulu ku bava. Laka ngalradangadangade. Ku layuginsia mabusukunga turamuru, kai thingale ku baai ki Twaumase ku maburusi, ku labarakalai la mialri ku taungulane kai thingalenga drele ku pacengecenge si kai pacengecenge.

⁸ Ku yacukudhane ka lakupu lausara malrithaavulu, ka sanguputane.

⁹ La makitu kalisilisi nakwane iya kai, “Kikai yuginsia manemane kai bulrubulru? Aneane kulri kilalra iniane? Kathane ku tau isadrasadra ki thuthu ku lrulai ku adulrwaneini kawriva pakilalalra!

¹⁰ Kai lasu la kisanu bulrubulrwana naiane patuelre nguvavaeva ki pacase!”

¹¹ Alaiyasi kai numi kilalra kai vagali, ku Twaumase lri sikawlu ki maelane ka kuni, lai lri arakai ku maelaelaane ku vaga bulru numiane.

¹² Ku Twaumase wabaai numiane paisaselebane pasutelrai, la pasiwlriwlringa numi kai kilalra pasalaladha iniane.

¹³ Kikai asasane ku Tamatama lri bulrunga numiane patuelre nguvavaeva ki pacase. Lukamaninga kwidra, lri dadavace numi takuvale, la ngwadreke; lri ngwadreke numi kadula, si kiravase.

Karwalai ka lrenege ki Ziyungu

¹⁴ Kaiasasane, kunumi ka la yakai Yerusalrime rathurathudu ki laumawmase ka ngiakalrilrilrigu ka tarasangililuku, kilalra ku takawrivane numiane ki Tamatama!

¹⁵ Lu kidremedreme numi makaketeketenga nai ki apacadhane, si mapapalrainginga nai ki swa swadriadringi, adravane ikai ku amatikurwane kaita lri pacai amia numi; lri arakai nai ku draedrangelrane ka vaga si tavuvulrucane la dulru kasulivaliivate amia numi.

¹⁶ Kaiasasane ku abebeelengenga ka Tamatama lri iya kai numiane, “Yakaiyaku Ziyungu cegecegenga ku makecenge ku tapatalwane, ikai kwini la pikai ku tinukucingalrane ka karwalai, ikai belenge la papacase, iya kai, ‘Ku yakai ku salrwane lri tara kapapedrenge kai talula’.

¹⁷ Ikai belenge kai ki tangadrane, lri arakaiyaku ku dringelresane tutangadrane, la arakai ku kapatengatenganane tutasingikaiyane.” Ku kananu lri baburau ki satalutalu numi ka draedrangelrane; ku lriau lri lrenepe ki audripane numi.

¹⁸ Ku tamakaketeketane numi ki apacadhane lri kamudu, ku tamapapalraingane numi ki swa swadriadringi lri tukakadrwa. Lu kelanga ku amatikurwane, lri kisaalrunga numi.

¹⁹ Kikai amatikurwane lri apapelaela mwa numiane, lri pivai numi pimaungu kwalrialrialri. Lu baai ku Twaumase numiane ku vaga, lri mailuku ku bavane ka aukuludrane!

²⁰ Lri mia numi kudra ki sidrumane ku vaga ku taiyane kai, “Edrekane ku tapeapecane, la kai maka sege ku drapale; tikiane ku cawbu, la kai maka cawbu palraelre ki kinawmasane.”

²¹ Ku Tamatama lri mia sakikarubu ikai lregelrege Pirazime si valrwalru Gibiungu, ngiadrakale si pangimia ku awnganeini; kikai yai kaika amaka pakelane madu pulringau. Ku Twaumase lri tara pangimia kudra kaika amaka thingalane madu ka awnganeini.

²² Ngwalai kikai, lu pakipapawlringavaku numiane, madha ulralralrakai. Amani luka makuciacingalre ku auberane numi kai ki amatikurwane. Kialalranga naku, ku abebeelengenga ka Tamatama ka abebeelengenga ki sanaka kwapingi malrithethenga ku lrika amudane patuelre kwini ki kuni.

Lrigilane ki Twaumase

²³ Kunumi kiraraketa kilalra kai vagali, si kipapawlringau ku pelaelali numiane.

²⁴ Ku tarakawaungu lu kauawngu bekace pavilringi mamelre ki dae lakakathane?

²⁵ Kwi lasu sana pavilringinga ku dae, wasabulu ku eape, si lredreke ku madradrau ka lalikange kumenge si titikiane ka kumenge. Kwi lasu lri tuluru si lredreke ku titikiane ka mugi si madradrau ka mugi, si lai lri pangu babiabila ki umawma lredreke ku drumane ka taleke.

²⁶ Ku tarakawaungu wathingale ku apangimiane kaungu, asi lwiyane ku Twaumase wabulru iniane.

²⁷ Kwi lasu kai lri arakai ku mabitulru ku ukudru sititi ki madradrau ka lalikange si titikiane ka kumenge; ku arakai ki lasu ku ukudru takekelreetane ku adravane ku tikianane.

²⁸ Kwi lasu lai kai isadra kai arakai ku niara valrigane palrivaevange, si kabebetethe ki mugi. Kwi lasu wathingale arakai kwini palridingi, si pangiabaalai palrici, ku amauvagadhane ki mugi si lrapi, ku kaika apakalisiane ki mugi.

²⁹ Kikai miyaiya kaika lrigilane patuelre patarumara ki Tamatama ka abebeelengenga ki sanaka kwapingi iniane. Ku nau pia iyaiya ki Twaumase matiasamali turamuru; ku lrigilane ki Twaumase madrau turamuru.