Isaiya 27 - Ngudradreadrekadhane Ka Sisiu 魯凱語聖經

¹ Kwini ki vai, ku Tamatama lri arakai ku makecenge marangisi ka dramu pathavungu ki baralebale, ka amani kudra tara apapiyaiya padaalru akabalrithi ka sidrumane ka sulrau, lai lri papacai kudra tumaelaelane ka waudriwdripi ikai laveke.

² Kwini ki vai, ku Tamatama lri matikai kudra kadalameini ku babududu, iya kai,

³ “Wadrangalrwaku iniane, si kai telrai pwacilai; luka vaiane lukamaungu wadrangalrwaku iniane, kadrwa ku umawmase kulri kabebetethe iniane.

⁴ Kainaku lri kalisinga ki babududuli. Alaiyasi ikai ki babududu ku cecenekane ka angatu si bala ka ubulu, lri tara lamaku liniane patuelre.

⁵ Ku badha ki kawkawluli alaiyasi ani palakebe iya nakwane, lri paswalana kikadalru nakwane. Unu, kwi lalasu lri paswalana kikadalru nakwane.”

⁶ Lukabibilrili ku vai, ku mwabaibalrithi ki Yakubu, ka mapapangale ki swa Iseraylri, lri mia ki angatu balace; kwi lalasu lri rigarigi, pumadru, lri salraelre suete ku madru.

⁷ Ku Tamatama lu pathavungu ki swa Iseraylri kai lri mia lu pathavungu ki badha lini ku pakilringavane. Lu papacai ki swa Iseraylri, kai lri mia lu amudu ki badha lini ku kalrane.

⁸ Ku Tamatama pakialringau pathavungu ki kawkawluini, si pakatwase liniane; ku Twaumase twalai talrawane pavalrigi, si malra liniane ililuku.

⁹ Kai swa Iseraylri lu suburu kudra pasikai lini ki twaumase ki sakamaelanane tutapatarumaramarane, la kadrulu ku ulrudru ki Asera ka twaumase ka ababai si tapatarumaramarane ku sangwalreme, ku pasalrivane lini kai lri maka kipacepe.

¹⁰ Kudra niravadrane ka cekele masuburunga, kadrwanga ku namaneemanenga, mararamau ki calragulragu; ku lwange yakai kwini apece kanekane ku ubulu.

¹¹ Ku laricingi ki angatu macacelra patuelre, ku labaibai la mwa siludu tuangatu. Asi lwiyane ku laumawmase makulrungu ka kadrwa ku thingale, ku Twaumase lini kai lri kilibakenga liniane, ku wabekace ka Tamatama lini kai lri kakalithinga liniane.

¹² Laumawmase ki swa Iseraylri, lu kelanga kwini ki vai, ku Tamatama lri twalai kadravane ka Yuparati mwa ka pagisane Izipiti nguvavaeeva alra sarubu numiane, mia lu malra apauvagai ki mugi si lrapi.

¹³ Kwini vai sana kela, kudra lingau ki rapa, lri dawlu pakainganai makanaelre ki acaicali ikai Asiria si Izipiti ka la swa Iseraylri. Kwi lalasu lri ikai Yerusalrime ka lregelrege ki Tamatama sukubu iniane.