Isaiya 26 - Ngudradreadrekadhane Ka Sisiu 魯凱語聖經

Ku Tamatama paakaci ki mapapangaleini

¹ Kwini ki vai, ku umawmase lri ikai ki kadaengane ki swa Yuda senai kikai senai: Makecenge turamuru kai balingibingi ki cekele nai! Ku Twaumase ngiakakamani ka wadrangalru kai ki cekele!

² Mueleba kwi lrawlawdru ki cekele! La pamudaane ki madringelrese ka kuni! La pamudaane ki patengatengane ku kidremedreme ka laumawmase!

³ Tamatama, patarumara baai ku kiatulrepenge ku sulivatane ki sapukwane ku takidremedremane, patarumara baai ki satalu muswane ka laumawmase.

⁴ Palralrawtha kasalru sudralru ki Tamatama; ku Tamatama lrika tapalakeebane mitane.

⁵ Ku Tamatama lri pangitatwalebe ki mangikalrilrigu ka umawmase; ku Tamatama wasuburu ki makecenge ka cekele, la acinilriane ku makecenge ka cekele.

⁶ Ku kiadredredrepete ku laumawmase lri dadavace ikai kwini ki cinilriane; ku matiakukuru ku umawmase lri kabebetethenga kwini ki mwakadrulu ka balingibingi ki cekele.

⁷ Madringelrese ka Tamatama, pangwakakaisu ku masadrarate ku kadalranane ki aparamaramau ka umawmase; pangwakaisu ki madrau ka kadalranane ki madringelrese ka umawmase.

⁸ Tamatama, mwakalava nai muswane, tupapalra ki takidremedremanesu; ku naganesu si takimatikaikaiyanesu amani ku sidramadrama ki kidremedreme nai.

⁹ Luka maungu, lri kitubiaku muswane, pakaeelre kai kidremedremeli akuli muswane. Lu saibangesu kai kawmasane, sanaka umawmase ala lri thingale ka manemane kudra dringelresane.

¹⁰ Adravane kilibakesu kudra ki manganga ka umawmase, kwini lalasu kai wathingathingale pia ku mathariri. Adravane ka kadaengane ki madringelrese ki umawmase kikai, kwi lalasu twathadaalrane piapia ku malisi; kwi lalasu kai twasaniange muswane.

¹¹ Tamatama, ku badhasu kai wathingale ala ka lri pathavungusu liniane. Kwi lalasu ani ngwalai ku tadrelane ala ka kialibakesu turamuru ki kawkawlusu si kainu; ani kipadradresenge kudra napasikaikaaisu liniane padulru ku akipathavungane.

¹² Tamatama, kiatubi nai muswane ala pangiradhekana naiane; patuelre kudra ngimia nai kai ngiesadhane twalai muswane.

¹³ Tamatama ka Twaumase nai, nakiaruthuku nai ki umawmase; ai kathanesu ku Tamatama nai.

¹⁴ Kwi lalasu wapacainga, kai lri siwlringa panianiake, asi lwiyane pathavungusu liniane, wamudungasu liniane.

¹⁵ Tamatama, pangiaradhekanesu ki kuni nai, la aru swadrau kai kadaengane nai; ku naganesu madrau ku takilrigwane, kadrwa ku talikaiyane.

¹⁶ Tamatama, napathavungusu ki kawkawlusu; ikai ki sakwalrialri kwi lalasu kiatubi muswane.

¹⁷ Tamatama, pakaralealesu naiane, mia ki twalalalake ka ababai ka ngiabawbawbangulu dadange, ikai ki sakwalrialri karaleale.

¹⁸ Nayakai nai ki sakwalrialri ki atulalakane, ai kai twalalake. Kai nai pasiakaiyana ki kuni kikaruburu si pamalebe; kai nai pakaesaiyana ki yakawmasane.

¹⁹ Ai kudra wapacainga ku sakacekele nai lri sielane panianiake; ku kinawmasane lini lri ikaiyana ku niake. Kudra wapece ikai tadralredralrekane ku umawmase lri pacunu, si senai akwadradradrau; mia ki lamu ki kadaengane mailuku ku apanianiakane, ku Tamatama lri pasiwlriwlriane papanianiake ki wapacainga ka umawmase.

Asaibangane si angiradhekanane

²⁰ Lasakacekeleli, mudaana mwa ki daane numi! Si elebe kwi lrawlrawdru, kilepengana padaalru, pakeela ku akasarwatane ku lisiane ki Twaumase.

²¹ Ku Tamatama lri twalai subelebelenge ki taikaiyaneini mulebe, si pathavungu ku pasalrivane ki umawmase kawmasane. Ku mapapacapacadhane kawmasane lri utaluvaivai patuelre; kai kadaengane lri kai dralrekenga ku kinawmasane ki kiapapacai ka umawmase.