Isaiya 25 - Ngudradreadrekadhane Ka Sisiu 魯凱語聖經

Sadrengedrengerane ka senai

¹ Tamatama, amanisu ku Twaumaseli; lri usakenaku muswane, lri drengedrengeraku ku naganesu. Paiyasu ku pinangu Twaumasane ka puku matisamaimali; pangiamiangasu kudra nikelretaneenga ka apiane.

² Pakamudusu ki cekele; waburukusu ku kepale ki cekele lini. Ku tucekele ki badha atawlrakavanenga, lrika palralrawthunga kai dulru tupela tucekele.

³ Lakamani, ku magarange ka laumawmase lri drengedrengere muswane; ku cekele ki magarange ka kuni lri mukuludru muswane.

⁴ Ku vaevaeva matikukuru ka kadrwa ku tasatalwane lri satalu muswane, lu kwalrialri lri patwalai muswane kipasutelrai. Wabaaisu liniane ku amwane kipalakebe ki valrigi, lai lri ikai ku tamwane kipalrilri ki vai. Ku takikaruburane ki malilisi ka umawmase mia ki valrigi ki kalakecelrane,

⁵ mia ki dralrangedrangane ki aenaenai. Ai, Tamatama, watamengesu ku ngudwi ki badha; la paidrengeresu ku ngariangiane ki latalilisi, mia ki vaeva ka ememe ka pakawlrau ki dralrangedrangane.

Ku Tamatama padulru ku angiakaneanane

⁶ Ikai Ziyungu lregelrege, ku Tamatama ka abebeelengenga ki sanaka kwapingi lri pasikai kai kawmasane sanaka kuni padulru ku angiakaneanane, makalra ku akaneane, mathariri ka nipakawladhanenga ka bava.

⁷ Ikai kai ki lregelrege, ku abebeelengenga ka Tamatama lri alra mwalra ku sangitatamengane ka atubiane ki sanaka umawmase, lai lri mwalra ku atubiane ku yakai taibelenge ki awlru ki lakuni.

⁸ Ku Twaumase lri kapalralrawthunga mwalra ku apacadhane; ku Twaumase lri sakidri meale ku lrese lini makanaelre, si mwalra ku takiarubwanane ki kawkawluini ikai ki lakuni. Ku Tamatama amia kikai pelaela.

⁹ Lukamani kwidra, sanaka umawmase lri iya kai, “Ku Twaumase tengatengane ka Twaumaseta, sakwa kasaalruta iniane; ku Twaumase palribulunga mitane. Amani ku Tamatama, ka sakwa kasaalruta iniane. Lri kiraragaita, asi lwiyane ku Twaumase palribulunga mitane.”

Ku Tamatama lri pathavungu ki swa Muabe

¹⁰ Ku Tamatama lri palakebe ka Ziyungu lregelrege, ai ku swa Muabe lri kikabebetethe, mia ki mugi kidredredre ikai ki lriduku.

¹¹ Kwi lalasu lri tale ku alrima, mia ki lri lrededepe; ai ku Twaumase lri tusinalrelreme liniane, ku lrika apulebeane kwi ngikalrilrigwane ki alrima lini.

¹² Ku Twaumase lri buruku ku kepale ki swa Muabe, suburu ku balingibingi ki cekele, paadratane, athuvugu.