Isaiya 24 - Ngudradreadrekadhane Ka Sisiu 魯凱語聖經

Ku Tamatama lri pathavungu kai kawmasane

¹ Ku Tamatama lri amudu kai kawmasane, lai matiseepelenga. Ku Tamatama lri balrutai kai kadaengane, si pasarau ki laumawmase.

² Adravane ka labarakalai, ka laumawmase, ka laduri si latawki, ka lawalangalangai si kialangalangai, ka laakiame si lakiaakiame, lamatiakukuru si lamaesaesaesai, lri kipadradresenge makanaelre ku thadaalrane ku angimiane.

³ Ku kadaengane aubulane, kadrwa ku natalekenga. Ku Tamatama amia kai pelaela.

⁴ Ku kadaengane mameale arabaraba; twaramurunga kai kawmasane patuelre; kadrwanga ku manemane kai belenge kai lebe.

⁵ Kai umawmase kawmasane kai paluludu ki hulrice, wabaebalrenga kudra cegecege ki Twaumase ka palralrawthu ka samakaketeketane, wakudrulrunga ki taikaiyane lini ka kadaengane.

⁶ Ngwalai kikai, ku Twaumase wapusu kai ki kadaengane, la paturamuru. Ku laumawmase lri balrithi ku tapiane lini. Ku panianiake ku umawmase lri aru tabekebeekelenga.

⁷ Ku cebe ki budu marudame, la aru kabekelanenga ku bava. Ku kiarararagai ku umawmase watubitubinga makanaelre;

⁸ Ku lapatungutungu bangebange yadrengerenga, laka kadrwanga ku lingau ku kiarararagai.

⁹ Kadrwanga ku waungungungulu kapeaperau, kadrwanga ku umawmase ku maka waungulu ku malimeme ka bava.

¹⁰ Ikai kai ki cekele malrithaavulunga, wakedrekedrenga sanaka daane, makiwcu lu mudaane ki lrawlrawdru ku umawmase.

¹¹ Yakai ku yakadadalranane ki cekele ku umawmase ku marariariau kulri ungulu ku bava; maulrawnga ku kiarararagai, kadrwanga ku akiragadhane kawmasane.

¹² Ku raedre ki cekele mwakadrulu, ku lrawlrawdru ki cekele macacwake.

¹³ Kai kawmasane sanaka kuni lrika thadaalrane ku akipadradresengane, mia ki paliakaikainga ku akitalekane, ku angatu ki ulrive kadrwa ku ulrive, ku cebe ki budu kadrwa ku budu.

¹⁴ Ku abalu ki matikurwane ku umawmase lri senai kiraragai. Ku swa tali dradha ku laumawmase lri pasalraelre pelaela ku saniangane ki Tamatama;

¹⁵ ku swa talrawane ku laumawmase lri drengedrengere iniane; ku yakaikai babiabila ki laveke ku laumawmase lri drengedrengere ki Tamatama ka Twaumase ki swa Iseraylri.

¹⁶ Kialalra nai ku lingau ka senai ku twalai ki adaidaailinga kai kawmasane sanaka inunga ku wadrengedrengedrengere ki madringelrese ka kuni Iseraylri. Ai kiapadradresengaku ki amatikurwane, kadrwanga naku! Kadrwanga naku! Ku madraedrangelre ku umawmase pacungucungulu draedrangelre; ku kakwakudhane lini kadrwa ku miyaiya ku matiukuludrane.

¹⁷ Yakai kawmasane ka laumawmase, yakai ku matiaukuludru ku lrubange ku arai ka mwakalavalava numiane.

¹⁸ Ku mwabere ki matiaukuludru ku umawmase lri mulrubangane; ku wakapa ki lrubange ku umawmase lri kipuaradhane. Lu udale releleke, kai tangadrane ki kadaengane lri ngivelevele.

¹⁹ Lri aegacane kai kadaengane, si ngiderenau, ngutukadre.

²⁰ Kai kadaengane lri lingilingi, mia ki mabusuku lridrawdrawdrau, mia ki talawbu ngivelevelevele ku takuvalrigane. Kai kawmasane lri ngwalai ki pasalrivane si turamuraamurunga, kasuburu, kacacwake, si palralraawthunga kai dulru acegecege.

²¹ Ku apathavungane ki Tamatama wakelanga. Lri pathavungu ki magagemegeme ki ngwakai ki belenge si maerece kai ki kadaengane.

²² Kwi lasu lri malra ki latalialalai sarubu mia ki lapasaalriu, si pwa ki barungulu adringi ki kadaengane. Kwi lasu lri emenge liniane pikai kwini, si ukalavalava ku akelane ku akipathavungane ka vai.

²³ Ku dramare lri kadradrimiti, ku vai lai lri kakadrwa ku ledra. Asi lwiyane ku Tamatama ka abebeelengenga ki sanaka kwapingi lri ikai Yerusalrime, lri ikai Ziyungu lregelrege magagemegeme ku puku; ku la tarasangililuku ki cekele lri drele makanaelre ku lriguini.