Isaiya 23 - Ngudradreadrekadhane Ka Sisiu 魯凱語聖經

Ngwakai ki swa Puiniciane ka vaga

¹ Kai lebenga yai ngwakai ki swa Tayre ka vaga. Kunumi ka yakai belenge ki laveke ka lataratukakange, tubia, ku cekele numi ka swa Tayre ka tamakakaikaiyane ki varukuru kiamudunga, ku ladaane si taisadrasadrane ki varukuru la mialri kikabebetethenga. Ku lavarukuru numi lu twalalai ka Saipuruse pasiwlri, lri kilalra ku ngwakai kikai ku vaga.

² Ku swakai babiabila ki laveke ka laumawmase, tarathathathakai ka swa Sidune ka laumawmase, tubia!

³ Talwabalre numi ki laveke katwase thathakai, la malra numi ku taleke ki swa Izipiti si kilangai ki lamaelane ka kuni.

⁴ Cekele Sidune, kiarubwanengasu; kai madrau ka laveke kai wathingale muswane, la iya kai, “Kai nau wailukwana ki lalake, la kainaku tulalakeana ku sawvalai si ababai.”

⁵ Adravane ka swa Izipiti sa kilalra ku takipamakiane ki swa Tayre mialri ngituluku.

⁶ Swa Puinicia, tubia, pasana mubebereana numi mu Taresise!

⁷ Kikai yai amani kwidra maulainga ku lrikisi, ngiaradheradhekane ka cekele Tayre? Ka nawasatedre ki umawmase mwa ki maelane ka kuni tucekele?

⁸ Kai swa Tayre yai tangadrane ka cekele; ku tarathathathakai liniane ku laumawmase kiamatikaikai ki laswainunga. Aneane ku pakiapadradresenge liniane kikai miyaiya kai ku mulisiane?

⁹ Kikai yai apiane ki Tamatama ka abebeelengenga ki sanaka kwapingi; kai Twaumase lri palikainga ku dradraranane lini ka kadrwa ku ngiraruthuruthuku, lri pangitatwalebe ki ngiakalrilrigu ka umawmase.

¹⁰ Ku waiziu mwa ka Taresise ka laumawmase, lu kaunga tuumawma! Kadrwanga ku umawmase kulri kela palakebe numiane.

¹¹ Ku Tamatama watalenga ku alrima lribate ki laveke, si lrumai talikaiyane kwini ki lakuni. Ku Twaumase wadrekase ku amudane ki tangadrane ki tathathathakadhane Puiniciane.

¹² Cekele Sidune, ku mathariri ku vaisu ngialribatenga. Ku laumawmasesu kiadrepete, kwi lalasu adravane mubere mu Saipuruse, lri kai sutelrai.

¹³ (Kudra twaredededele kainganai mailuku ku waudriwdripi lri kane ki swa Tayre, swa Babilunia, kaika swa Asiria. Ku swa Babilunia kiakaruburu si buruku ku raedre ka kepale ki cekele ki swa Tayre, kwini cekele la atawlrakavanenga.)

¹⁴ Tubia, ka yabelenge ki laveke ka lataratukakange, kudra satalutalu numi ku cekele maamudunga.

¹⁵ Ku akikarimurane ki cekele ki swa Tayre ku vai lri padaalrunga si kela; lri kikarimuru taramapitulu ka caili, kwini yai mamamwa ki caili ki tangea ka talialalai. Lu tara mapitulunga ka caili, kwi swa Tayre lri mia ki amani kudra nimatikaiyane ikai ki senai ka pairairange:

¹⁶ Kusu ka kiakarimuru ka pairairange, malra kwi patungutungusu, la mwa ki cekele katwatwatwase; patungutunga, si senai ku senaisu! Alau lri keelana siwlriwlri ku lalasiasilanganesu.

¹⁷ Lu tara mapitulunga ka caili, ku Tamatama lri pasiwlriwlriane ku tathathathakadhane ki swa Tayre. Lai takaalra ku lakuni kulri kisalru ku varukuruini.

¹⁸ Kwi cekele lri patarumara baai ki Tamatama ku sialribate ku malraini ki tathathakadhane. Kai Tayre kai lri ngipapudringainga ku paisu, lri malra ku paisu si baai ki wasukusukubu ki Tamatama ka laumawmase, ku lrika asalaimadhanane makakelrete ku akaneane lini.