Isaiya 22 - Ngudradreadrekadhane Ka Sisiu 魯凱語聖經

Ngwakai ki Yerusalrime ka vaga

¹ Kai lebenga vaga ki ngwakai ki Tangimiamiane ka Valrwalru. Manemane ku tangimiane? Kai laumawmase ani ikaai talrugulrugane kirararagai?

² Kai kinauacekelane mangariangiangi, ikai kidruanga kapeapeaperau ki sakiararagai. Ku pacai ki sakacekele numi kaika wapacai ikai ki tamakakaruburane.

³ Kwi tarasangililuku numiane kaiyana akavaeva ku lraili si kiravase; kudra lamwabere ku kiakaruburu mialri kisaladha si kipasiwlri.

⁴ Kaiasasane madha thethengete nakwane, patubiyananaili! Madha kelakela sasa nakwane, asi lwiyane wapacainga makanaelre ku sakacekeleli.

⁵ Ikai ki Tangimiamiane ka Valrwalru, amaninga kudra makiwcu, kiapamalebe, malrithavulu; kikai yai drimanga baai mitane ki abebeelengenga ka Tamatama ka abebeelengenga ki sanaka kwapingi. Kai sadringidringi ka kepale kiaburukunga, ku lingau ki kiatubitubi waelraelrange ikai valrwalru.

⁶ Ku tarangurigirigi ka kwapingi ki swa Ilame wakelanga, ku lraili paswaete ki talrailane. Ku ngwalalebe ka kwapingi ki swa Kire wakelanga, padulrwa ku akikaruburane.

⁷ Kudra malrange ka valrwalru ki swa Yuda swaetenga kwi sakikaruburuburane ka palridingi; ku tara ngurigi ka lakwapingi matilibi ikai cucubungu ki lrawlrawdru ki cekele Yerusalrime.

⁸ Ku satelengane ki Yuda maburukunga. Sakamani kwidra, patwalai numi ki tapikaikaiyane ku la sakikaruburane malra ku adreme.

^9-10 Patarathingale numi ka talukalrale ku takaburukane ku raedre ki cekele ki Davidi, ka mwakalavalava ku akatwasane numi mwa celrepe. Wadadavace numi drele sanaka daane kai ki cekele, si buruku ku drumane, la malra numi kudra sanguburukane ku lrenege si cakupu ki takaburukane. Pakai ku apasueteane si makakelrete ku acilai,

¹¹ Kunumi lri ikai numi ki sipusale ki kadalranane kabicelrakane ki raedre ki cekele lruku ku taciladhane, kwini acilai ki supilri ki taciladhane la swalru papia kwini. Kikai patuelre yai, ku Twaumase ka wabekace ka Tamatama marasikaiinga ku apangimiane; ai kai numi kialalra ku vagaini.

¹² Lukamaninga kwidra, ku abebeelengenga ka Tamatama ka abebeelengenga ki sanaka kwapingi lri patubi numiane si karaleale, la kiriti ku isiu ki awlru, si silaimai ku kaimadhane.

¹³ Ai, mwalralralrakaiyana numi, kirararagai. Waculu numi ku lwange si kiu, si kanekane ungungulu. Amia numi kai, “Maesaesai lu kanekaaneta si ungungungulu, kulri tara paacaita lwiya.”

¹⁴ Kialalraku ki Tamatama ka abebeelengenga ki sanaka kwapingi ku tapelaelane nakwane, “Lu makavale panianiake, lri maka vaalaku kai pacepe ku pasalrivane lini. Abebeelengengaku ka Tamatama ka abebeelengenga ki sanaka kwapingi amiaku kai.”

Pakiapapawlringau ki Sebena

¹⁵ Abebeelengenga ka Tamatama ka abebeelengenga ki sanaka kwapingi wacunu nakwane mwa kikawriva ki mabelenge ikai ki daane ki talialalai ka Sebena, si pakipapawlringau iniane,

¹⁶ “Aneanesu, sikathuruanengasu ikai thili lregelrege ki alrisapesape ngilralruku ku tadralredralrekane?

¹⁷ Ngiatatumakucingalresu ka umawmase; ai ku Tamatama lri malra siludu muswane,

¹⁸ Lri malra thalre muswane, si cilri muswane pwa ki vaeva ka madrau ka kuni. Lri pacaisu ikai kwini, lri pacaisu ikai thili ki ngilralrigulrigusu ka sakikaruburuburane ka palridingi. Pakiarubwanesu ki daane ki talialalai!

¹⁹ Ku Tamatama kai palraingi pabelenge muswane, lri malra pulebe muswane.”

²⁰ Ku Tamatama amia kai ki Sebena, “Lukamaninga kwidra, lri dawlaku ki sasiakawluli ka Iliakime ka lalake ki Hilekia

²¹ Lri malraku ku sapakabelenganesu si baai pasilaimai iniane, la malra kwi laketesu si pasilakete iniane; lri baadhaku iniane patuelre ku pukusu. Kwi lasu lri mia ki tama sirapale ki swa Yerusalrime si swa Yuda.

²² Lri malraku ku sukusuku ki ngwakai ki Davidi ka latalialalai si baai iniane. Ku muelebeini, kadrwa ku umawmase ku lri dulru elebe; ku elebeini, kadrwa ku umawmase ku lri dulru muelebe.

²³ Lri malraku ki lasu pikai ki takapapedrengane, mia ki arakai ku sakedrekedre kedrekedre pakakecenge; ku lawacekecekeleini makanaelre lri ngukai iniane kilrigu.

²⁴ “Ai, ku lawacekecekeleini si laretesaneini lri kaamece iniane. Kwi lalasu lri kelrai pikai ki kinawmasaneini, mia ki palungu si sakirikirikirane kelrai pikai ki sakedrekedre ikai ki angatu!

²⁵ Lri ikai ku minaka vaalane, kudra makecenge ikai ki angatu ka sakedrekedre lri kicalrigi, si mucilri mulebe. Kudra nikelradhane pikai ki sakedrekedre ku lamanemane lri mucilri si kacacwake patuelre.” Ku Tamatama ka abebeelengenga ki sanaka kwapingi amia kikai pelaela.