Isaiya 21 - Ngudradreadrekadhane Ka Sisiu 魯凱語聖經

Ku kaamudu ki swa Babilunia

¹ Kai lebenga vaga ka ngwakai ki swa Babilunia. Mararamau ki alrilrawgu ka ngwakaikai ki aenaenai ka kadaengane, ku amatikurwane lri twalai ki tamatiwkuludrane kainganai.

² Wadrelaku ku waedede ku matiangeange ku tangimiane, ku watavuvuvulrucu sakamiya tavuvuvulrucu; ku mabebebetethe la pacungucungulu kabebetethe. Kwapingi ki swa Ilame, aswala kikaruburu! Kwapingi ki Media, ucekela! Ku Twaumase lri palikainga ki swa Babilunia ku tapakwalrialriane ki umawmase.

³ Sa drelaku kikai tangimiamiane, la kilalra kikai vaga, kiarimwaku mukuludru si kwalri, mia ki twalalalake ka ababai kiangeangeange. Kainaku maka wadrelenga ki thathiburane, la kainaku maka kilalranga ki kiwcane.

⁴ Malringace kai awlruli; manwagiligilaku ki kiwcane. Mwakalavaku ku akamiauawbane, ai kai miauawbu pakakiuculringa nakwane.

⁵ Ikai ki tangimiamiane, wadrelaku ku nipadulrwanenga ku angiakaneanane, la ka nipadulrwanenga pasikai ki badhabadha sapa cakena; kwini lalasu yacengeecenge kanekane ungungulu. Ala pangitutuluku, kela ku nidrekasane, “Kunumi ka latabebelenge ki kwapingi! Padulrwa ku akidresengane kikaruburu!”

⁶ Sakamani kwidra, ku Tamatama amia kai nakwane, “Lu katwasa, la sikawlu ki umawmase padrangalru, si cunu iniane kudra dreleini pelaelaela iya.

⁷ Kwi lasu alaiyasi drele ku ngwarigirigi ku kwapingi la tarudradrusadrusa kainganai, la ikaiyana ku umawmase ku ngwarigirigi ki ruba si lrakeda, kiararakete madu drele paswalralrau”.

⁸ Ku taradrangalrungalru lu tawtau, “Tamatama! Yakaiyaku kai lukavaiyane lukamaungu drangalrungalru.”

⁹ Ala kirimu, ikai ku ngwarigirigi ku kwapingi tarudradrusadrusa kainganai; ku taradrangalrungalru la pelaela iya kai, “Ku swa Babilunia mwakadrulunga! Kudra sukusukubu lini ku samiamiange kiacacwakenga pikai cakena patuelre.”

¹⁰ Sakacekeleli ka swa Iseraylri! Kunumi takangimiyaiyane numi ki yakai ki balraku ka kiataputapusu ka mugi; ai kikaiasasane peaelaelanga naku numiane kikai vaeva ka mathariri ka vaga, ka kilalrali patwalai ki Tamatama ka abebeelengenga ki sanaka kwapingi, ka Twaumase ki swa Iseraylri.

Ngwakai ki swa Idume ka vaga

¹¹ Kai lebenga ngwakai ki swa Idume ka vaga. Yakai ku umawmase ku twalai Idume kivaga nakwane, “Tara drangalrungalru lukamaungu, ngialribalribatenga kai dradrimitane? Ngialribalribatenga kai dradrimitane?”

¹² La tubalreaku, “Lri padaalrunga si kaliare, ai ku dradrimitane lri peelana kela. Alaiyasi lri kivaganasu, siwlriwlriana la kivaga pela.”

Ngwakai ki swa Arabia ka vaga

¹³ Kai lebenga patharwakai ki swa Arabe ka vaga. Swa Didane ka laumawmase, kunumi ka yakai ki aenaenai ka kadaengane Arabia si tudaane ku balrawbau ka tarasiwbawbai ka sakaredele!

¹⁴ Lu ikai ku makadhame ku umawmase la kela mucucubungu numiane, malra ku acilai la paungulu liniane! Ku yakai Tima ka laumawmase, lu kela ku mwabebere ku laumawmase, kunumi pakana liniane!

¹⁵ Kilakikai umawmase mwabere ki lrabu makanaelre, mwabere ki lraili, ka twalai ki tamakakaruburuburane mubere ka laumawmase.

¹⁶ Ku Tamatama la iya kai nakwane, “Ikai kai ki nitara cailane, mia ki tara kauawngu ka wakelanga ku takiketeketane, kudra lacekele ki swa Kidare ku tangiradhekanane lini lri palikainga.

¹⁷ Ku garagarange ka tara lrailraili ki swa Kidare; kwini lalasu lri mialri aru tabekele, kai lri tapianga ku tedrane. Tamatamaku ka Twaumase ki swa Iseraylri; ka amiaku kikai pelaela.”