Isaiya 20 - Ngudradreadrekadhane Ka Sisiu 魯凱語聖經

Vialralrakane ngukekece ka Yuginsia

¹ Ku Saregunge ka tinuhika ki swa Asiria wadrekase ki abebeelengenga ki kwapingini pakikaruburu ki swa Pelisitine ka cekele Asedude.

² Salri tara tulrunga ka caili ala ngimia kikai, Ku Tamatama nawadrekase ki Isaiya ka lalake ki Amuse pamwalra ku silaimaini ku kaimadhane si sikeceini. Kwi lasu kialalra pasalaladha ku vaga ki Tamatama, la vilralrakane, ngukekece dadadavace mwa kidruanga.

³ Sa kipamaki ku swa Asedu, ku Tamatama amia kai, “Kwi sasiakawluli ka Isaiya vialralrakanenga, laka ngukekece si dadadavace tara tulrunga ka caili; kikai yai nisakaladhane kalri ngimia ikai Izipiti si Kuse.

⁴ Ku tinuhika ki swa Asiria lri patwalai kai ki drusa ka kuni ravase ki laumawmase, lai lri mulaimai liniane patuelre; lu kamani kwidra, adravane ka tarudrawdrange ka lavavalake, lri vilralrakane makanaelre, si ka ngukekece, lai lri kiarubwane ku swa Izipiti.

⁵ Kudra lasatalutalu ki swa Kuse si satalu ki swa Izipiti ku umawmase lri amalremenga si kasulri.

⁶ Lukamaninga kwidra, kudra yakaikai Pelisitine ki ngwababiabila ki laveke ku laumawmase lri iya kai, ‘Drela, kudra satalutaluta, kalri paralubu mitane kiecebe ki umawmase ki tinuhika ki swa Asiria anika paramiakai! Lri maka dulruta tumane mubere?’ ”