Isaiya 2 - Ngudradreadrekadhane Ka Sisiu 魯凱語聖經

Palralrawthu ka rathudane

¹ Kai lebenga yai vaga ki Twaumase ka ngwakai ki swa Yuda si Yerusalrime la baai ki Isaiya ka lalake ki Amuse.

² Luka bibilrili ka vai, ku taikaiyane ki daane ki Tamatama ka lrelrelrege lri acegecege ikai belenge ki lalregelrege, lri kipubelenge, lri lriibate ki laabelenge ka lregelrege. Sanaka kuni lai lri kalrungulrungu kainganai.

³ Takaalra ku laminzuku kulri kainganai yelrelre irubu, si iya kai, “Bwala, takaredele mwa ki lregelrege ki Tamatama, si karededele papia ki daane ki Twaumase ki swa Iseraylri. Lri arake ku angukaiyaneta ku kadalranane; lri ikaita kai ki kadalranane dadavace. Ku sabulrwane ki Tamatama twalai Yerusalrime katwase sarau; ku vagaini lri twalai Ziyungu pelaela.”

⁴ Ku Tamatama lri marasikai rathudu ku rivwane ki lakuni, turingaringau ku makalilisiane ki laminzuku. Kwini lalasu lri darepe tuawlru ki pavilringi ku lalrabu, lai lri tutakawkau ku laidiri. Ki lakuni kai lri ikainga ku makaruruburu, lai lri kai tukwapinginga si kikaruburu.

⁵ Lamwabaibalrithi ki Yakubu! Bwala, tasingikai ku patarumara ki Tamatama ku ledra dadavace!

Ku ngiakalrilrigu lri tara sipai

⁶ Twaumase, wacilringasu ki kawkawlusu ka mwabaibalrithi ki Yakubu. Ikai kai ki kuni yakai kidruanga kai twalai tali talrawane si swa Pelisitine ka umawmase ka tara tulrisilrisi; kai laumawmase la tupapapalranga ki kakudhane ki maelane ka zuku.

⁷ Ku kuni lini swaete ku kingi gingi, kaika asiasipane ku takuciacingalre ku lawbubulu; ikai ki talikaikai lini makalra ku rigi, la ikaiyana ku kaika amaka asiasipane ku sakikaruburuburane ku palridingi.

⁸ Ikai ki kadaengane lini swaete ku samiamiange; kai lalasu wasukusukubu ki arakai lini ku alrima papacase ku lamanemane.

⁹ Kiaragai ku akangangane, kiaragai ku aru kangangane ngilisiane. Tamatama, madha paceacepe liniane!

¹⁰ Kwini lalasu lri kilepenge mulregelrege ki barungulu, mwadringi ikai ki valrwalru, kisanu mubebere ki elathane ki Tamatama, si mubere kidaili ku puku si lrigu ki Twaumase.

¹¹ Lri kelanga ku vai, ku ngikalrilrigwane ki umawmase lri kiruthuku paidrengere, ku ngitatwadravane ki umawmase lri kamudu; kathane ku Tamatama kulri kiusakene.

¹² Kwini ki vai, Ku Tamatama ka abebeelengenga ki sanaka kwapingi lri parwalebe ki sapukwane, ki ngiakalrilrigu ngitatwadrau ka umawmase.

¹³ Lri akucu mwalra ki tadradrau ka cedare ka laangatu ki swa Lebanungu, lai kabebetethe amudu ku tharialupu ka angatu ki swa Basane.

¹⁴ Kwi lasu lri alra sadrarate ki latadradrau si latatitiki ka lregelrege,

¹⁵ lai lri kadrulu ki palralramathane si makecenge ka alradre ki cekele.

¹⁶ Kwi lasu lri thene ki madrau si kathariri turamuru ka varukuru ki swa Taresise.

^17-18 Lu kela kwini vai, ku ngikalrilrigwane ki umawmase lri kiruthuku paidrengere, ku ngitatwadravane ki umawmase lri kiamudu, ku samiamiange lri kitatithiri; kathane ku Tamatama kulri kiusakene.

¹⁹ Ku Tamatama lu velevele ki karwalai ki kadaengane, ku umawmase lri kilepenge mwa ki barungulu lregelrege, si kibalai ikai ki valrwalru, kiasanu ubebere ki elathane ki Tamatama, si ubere kalrabuthu ki puku si lrigu ki Twaumase.

²⁰ Lu kela kwini vai, kwi lalasu lri tara ciilri ku ngidadarepe lini ka gingi kingi ka samiamiange, lri cilri baai ki tila si ababirau.

²¹ Lu velevele ku Tamatama ki karwalai ki kadaengane, ku umawmase lri kilepenge ikai ki barungulu lregelrege, si tamauvagadhane ki alrisapesape, kisanu ubere ki elathane ki Tamatama, si ubere kalrabuthu ki puku si lrigu ki Twaumase.

²² Madha kasalrunga ki lri tara paacai ka umawmase! Manemane ku vai lini?