Isaiya 19 - Ngudradreadrekadhane Ka Sisiu 魯凱語聖經

Ku Twaumase lri pathavungu ki swa Izipiti

¹ Kai lebenga ngwakai ki swa Izipiti ka vaga. Ku Tamatama ngwakai ki mariaridare ka ememe kela mwa Izipiti. Ku samiamiange ki swa Izipiti ikai cucubungu iniane manwagiligili; ku laumawmase ki swa Izipiti maulrau ku garangane.

² Ku Tamatama amia kai, “Lri apakaruruburaku ki swa Izipiti, lai makakaruburu ku mababitake, lri makakaruburu ku mapapasiagisi, ku tara cekele lri makakaruburu, ku tara talialalai lri mararibici ku puku.

³ Lri pakaulravaku ku nau pia iyaiya ki swa Izipiti, ku galremegemane ki laumawmase masuburu. Kwi lalasu lri papianga ki samiamiange kitubi sikakathane, lri papia kitubi ki taraivigi, ki tarahandange, si aidridringane.

⁴ Lri malraku ki swa Izipiti si baai ki tangeea ka ngikararakacane ka talialalai, ka kadrwa ku ulalengane ku ngikarakacanane ka talialalai, kwi lasu lri rathudu liniane. Amaniaku ku abebeelengenga ka Tamatama ki abebeelengenga ki sanaka kwapingi amiaku kikai.”

⁵ Arwa ka tikiane ku acilai kadravane Nile, madrekarenga ku tamwalwaludrane.

⁶ Ku kadravane ngwalai ku takadrekarane si sangumia, ku tirivu si ubulu ki vaalru lri kalraici;

⁷ Ku lataleke ki takauawngane maecebe ki kadravane Nile wapacai karudame, si kipalai ki valrigi.

⁸ Kudra yakaikai satalutalu cekecekele kai ki kadravane Nile tukakange ku laumawmase lri tubi makanaelre; ku salrakwikwilane si arai lini kadrwanga ku paluludane.

⁹ Ku tara tinitinunu ki lrekelreke si pelrece ku umawmase lri kasulri makanaelre;

¹⁰ Kudra taratinitinunu ku umawmase si drumane ka ladaikusange lri kasuburu ku awngane lini makanaelre.

¹¹ Ku tarasangililuku ki cekele Zuane makulrungu turamuru! Ku malrilrigilinga ki swa Izipiti mialri ka kadrwa ku mathariri ku nau pia kwini iyaiya! Kwi lalasu lri tumane thuru ikai cucubungu ki talialalai ngipapasudalepe ka amani ku mwacungulu ki sidrumane ka lamalrigili ka umawmase si latalialalai?

¹² Talialalai ki swa Izipiti, kudra latalrilrigili ka latakivagane mwainu? Kwi lalasu alau lri dulru pelaela muswane, luka manemane ku nau pia kwini ki swa Izipiti iyaiya ki Tamatama ka abebeelengenga ki sanaka kwapingi.

¹³ Ku abebeelengenga ki tarasangililuku ki swa Zuane si Mimepise makulrungu turamuru makanaelre, kwi lalasu naika wasangililuku ki kuni, ai kwi lalasu pamama ku kadalranane ku taililukane lini.

¹⁴ 14 Ku Tamatama pakangalradangade ku tapia kwini iyaiya lini, kai swa Izipiti la pasalriu patuelre ku piapia lini; ku kuni la kai maka kapapedrenge, la mia ki mabusuku ka umawmase, ka wathulridri ngwadreke ikai ki putaini.

¹⁵ Ikai Izipiti, adravane ka satacekecekelane, ka matiakukuru, ka saniange, ka talelebe, kadrwa ku natangeeanga ku sapatumatumane.

Kai swa Izipiti lubibilrili lri sukubu ki Tamatama

¹⁶ Lu kelanga kwidra, ku sawvalai ki swa Izipiti lri mukuludru mia ki ababai. Kwi lalasu lu drele ki Tamatama ka abebeelengenga ki sanaka kwapingi lu cidingi ku alrima ka lri pathavungu liniane, lri ukuludru manugiligili makanaelre.

¹⁷ Ku swa Izipiti sana ngulringau ki Tamatama ka abebeelengenga ki sanaka kwapingi ku tapangimiane ngisasingikaai ku angimiane lini, mwakuludru makanaelre ki swa Yuda.

¹⁸ Sana kela kudra vai, ku tailrimane ka tadradrau ka cekele ki swa Izipiti lri arakainga ku vaga ki Hiburu. Ku laumawmase lri pangukai ku nagane ki Tamatama ka abebeelengenga ki sanaka kwapingi kiketekete. Ikai kwini vaeva ku cekele kulri kipasi “Vai ka cekele”.

¹⁹ Sana kela kudra vai, ikai Izipiti lri ikai ku vaeva ku nipasikaiyane ki Tamatama tutapatarumaramarane; ku pagisane ki swa Izipiti lai lri ikai ku nipasikaiyane ki Tamatama cegecege ku sadringidringi ka lrenege.

²⁰ Kilakikai sapelaelane patuelre ku Tamatama ka abebeelengenga ki sanaka kwapingi ka yakai ki swa Izipiti. Kwi lalasu lu kipadradresenge kidredredrepete, la papia ki Tamatama kitubi, ku Tamatama lri sikawlu kulri palribulu, tangeea ku tarapalribulribulu kulri kainganai palribulu liniane.

²¹ Ku Tamatama lri papia ki swa Izipiti padrele, lai thingale iniane ku swa Izipiti, si sukubu iniane, lai patarumara ku waudriwdripi si baai ku lawbubulu iniane. Kwi lalasu lri ikai cucubungu iniane pangimia ku kiketekete lini.

²² Ku Tamatama lri pathavungu liniane, lai lri sulrau pawdringai liniane. Kwi lalasu lri ngibangulu si siwlriwlri, si aswakaainga iniane. Ku Tamatama lri kilalra ku inulri lini, lai lri sulrau pawdringai liniane.

²³ Sana kela kwidra vai, kai swa Izipiti si swa Asiria lri sudalrane mamamwa ku madrau ku kadalranane. Ku laumawmase kai ki drusa ka kuni lai lri mamamwa mubabadhane; kwi lalasu lri mararaamawnga sukusukubu ki Tamatama.

²⁴ Sana kela kwidra vai, kai swa Iseraylri si swa Izipiti si swa Asiria lri maramaramawnga; kikai taitulru ka madrau ka kuni lri pakisubulrubulru ki umawmase kai kawmasane.

²⁵ Ku Tamatama ka abebeelengenga ki sanaka kwapingi lri subulrubulru liniane iya kai, “Izipiti, ka kawkawluli; Asiria, ka bekaceli; Iseraylri, ka pilrili ka umawmase; lri patarumaraku baai numiane ku akaesadhane!”