Isaiya 18 - Ngudradreadrekadhane Ka Sisiu 魯凱語聖經

Ku Twaumase lri pathavungu ki Kuse

¹ Yakai ku vaeva ku kadaengane talikai kavai kadravane Kuse, ikai kwini kialaalra madu ku lingau lu ngivelevele ku sapakepake.

² Ku tarakisikawlu ki talialalai mwa ki maelane ka kuni wanene ikai ki niaratirivwane tuvarukuru, si twalai kwini siluludu kadravane Nile mulrawdru. Lu kirarimwa siwlri mwa ki daane numi, kunumi ka ngiathingalenga ka tarakisikawlu mwa ki maelane ka kuni! Iluka kwi tigami si siwlri mwa ki taikaiyane numi, ka amani kudra kia paudrusa ki kadravane ku taikaiyane, ka magarange maadrau ka kuni, ka kiaukuludru ki yakawmasane, la kaelrenge kadrau ngicaeme ka laumawmase.

³ Kilalra, ka yakaai ki kadaengane ka laumawmase! Kiraraketa kudra kalralradha ku nicegecegane pikai lregelrege! La kicacaliigiri ku lingau ki rapa!

⁴ Ku Tamatama amia kai nakwane, “Lri kababiitingaku twalai belenge paswalebe drele, mia ki lamu luka kalakitalekane, si ledra ki vai luka kaladralrangedrangane.

⁵ Lu kaiyana ka sakibududu, ka yacengeecenge murururu ku tangipaipadhane, ka lri padaalrunga kalreme ku budu, ku badha lri kabebetethe ki Kuse, mia ki marangisi ka adreme ka wakete ki cebe ki budu ku dwadhane.

⁶ Ku wapacai ka kinawmasane ki kwapingi lini yakai latadre, kikanekane ki laadhadhame si waudriwdripi; luka kaladralrangedrangane yakai ku adhadhame ku wakela daisi si kane, luka kalakecelrane yakai ku waudriwdripi ku wakela kane.”

⁷ Lri padaalrunga si kela ku vai, kudra kia paudrusa ku kadaengane ki kadravane, kudra ukulukuludru ki swa kawmasane, ka magarange ka madrau ka kuni, la kaelrenge ngicaeme ka laumawmase, lri papia ki Tamatama ka abebeelengenga ki sanaka kwapingi patarumara. Kwi lalasu lri mwa Ziyungu lregelrege sukubu ki Tamatama ka abebeelengenga ki sanaka kwapingi.