Isaiya 17 - Ngudradreadrekadhane Ka Sisiu 魯凱語聖經

Ku Twaumase lri pathavungu ki swa Siria si swa Iseraylri

¹ Kai lebenga yai ngwakai ki swa Damasekuse ka vaga. Ku Tamatama amia kai, “Kai swa Damasekuse kai lrika vaevanga ka cekele; lri ka ububulanenga suete ku dae.

² Ku lacekele ki swa Siria lrika palralrawthunga aubulane, ataikaikaiyanenga ki lalwange si kiu, kadrwa ku umawmase ku lri dulru pakatwase liniane.

³ Kai swa Iseraylri lri sakacilri ku sadringidringi; kai swa Damasekuse lri kai maka ngikakamani acegecege. Kwidra abalu ku umawmase ki swa Siria lri mia ki swa Iseraylri kitusinalrelrelremenga. Tamatamaku ka abebeelengenga ki sanaka kwapingi; ka peaelaela kikai.”

⁴ Ku Tamatama amia kai, “Ku vai lri padaalrunga si kela, lai alikai ku lrigu ki swa Iseraylri; lri twalai ki maesaesaesai si amatiakukuru.

⁵ Kai swa Iseraylri lri mia ki vaeva ka umawma ka takitalekanenga, kadrwa ku namanemanenga mia ki tau maka kitaletaleke ka umawma kavai valrwalru Ripaime.

⁶ Ikai ki swa Iseraylri tabeekele ku umawmase kulri panianiake; kwi lalasu mararamau ki kialabutunga ka ulrive ka angatu, ringaringau ki cebe ka angatu drwadrusanga tutulrunga ku tedrane ku ulrive, ku ricingi lebe laka swasupatenga lrialrimanga ku tedrane. Tamatamaku ka Twaumase ki swa Iseraylri; amiaku kikai pelaela.”

⁷ Sana kela kwini ki vai, ku umawmase lri ngibangulu papia ki wabekace liniane ka Tamatama, la papia ki saniange ka Twaumase ki swa Iseraylri kitubi.

⁸ Kwi lalasu kai lri satalunga kudra ara alrima lini pia ku tapatarumaramarane, lai kai maka sudralru kudra ngipapia lini, ka amani kudra ulrudru ka Asera ka ababai ka twaumase si tapatarumaramarane lama ku sangwalreme.

⁹ Sana kela kwini ki vai, kwini makecenge ku satelengane ki badha ka cekele lri kicilri, si akinaburukane, mia ki swa Hiviti si swa Amuriti ikai cucubungu ki swa Iseraylri cilri ku cekele si thirakupu mawbebere.

¹⁰ Swa Iseraylri, marimurunga numi kwidra palribulu numiane ka Twaumase, ku Twaumase miyaiya ki makecenge ka alrisapesape palakebe numiane, la ngwalailringa numi ku asukubane ki samiamiange ki maelane ka kuni, si pia ku babengelradhane si tusaniange.

¹¹ Kwini lredreke numi adravane ka yavaivaai rigarigi si ngipaipai, kai lri dulrwana ka samalramalra. Lri kwalri kwi kidremedreme numi si kasulri lakakathane.

Ku kuni ki badha lri kipamalebe

¹² Ku latagagarange ku kuni ngiavelevelevelenga, mia ki siange ki bikabiki, mia ki madrau ka bikabiki ka wabikabikabiki.

¹³ Ku tagagarange ka kuni lu kikaruburu mia ki bikabiki; ai ku Twaumase lri telenge liniane, lai lri aru theredre kwi lalasu, mia ki thuvugu ka yakai ki valrigi lregelrege valrwalru, mia ki sangukimugiane ka kiapalai ki alrilrawgu.

¹⁴ Luka maungu kwi lalasu lri paukuludru ki laumawmase, lukakaiyane ki mialrealre lai ka kadrwa kawlrau. Kikai yai angimiane kipadradresenge ki mabebetethe ravase naiane ka umawmase!