Isaiya 16 - Ngudradreadrekadhane Ka Sisiu 魯凱語聖經

Sulriane ki swa Muabe

¹ Ku lamwabere ki swa Muabe ku laumawmase twalai calragulragu ka cekele Sila kainganai baai ku saceacebe ku vaeva ka tikiyane ka kiu ki amani ku maerece Yerusalrime.

² Kikai lamwabere ka laumawmase yakai babiabila vaalru Arenunge ukalavalava, si masasawlriwlriwlri kai thingale ku apapiane, mia ki adhadhame ka kiapakatwase twalai ki lisisuku.

³ Kwi lalasu kiavaga ki swa Yuda, “Ala bulrua naiane, lri tumane nai? Ala palribula naiane, mia ki madrau ka angatu ikai ki tailebe ki madralrangedrange ka vai palrilri naiane; la nai dulru isadra ikai ki lrilriane. Kunai amani nai kudra mwabebere ka laumawmase, alra naiane sekete; ani kai kidringai naiane ku umawmase.

⁴ Ala tarumara naiane ka kadrwaku tasalikaiyane ku daane ka laumawmase, ku lrika aikaiyane numiane. Ala palribula naiane, lanai dulru kidaili ki alrima ki taraamwamudu.” (Ku wadrepete si wamudu lri tara alikaai; ku kiakaruburu si mucekele lri tara kamudu.

⁵ Ala lri ikai ku tangeea ku agagane ki Davidi kulri atalialalai; kwi lasu lri arakai ku patengatengane kai lri akabalrithi ku sakialibake rathudu ki laumawmase. Kwi lasu lri kisilape ku aparamaramavane, si kipuawngane arakai ku dringelresane.)

⁶ Ku laumawmase ki swa Yuda amia kai, “Kialalra nai ku ngiakalrilrigu turamuru ku laumawmase ki swa Muabe amia. Kwini lalasu ngiapaparamuru ngitatwadrau, ai kwi lalasu lu ngikalrilrigu kadrwa ku paluludane patuelre.”

⁷ Ku swa Muabe lri pasikai ku takipadradresengane lini ku amatikurwane si tubi. Lu ngulrialringau saikai cekele Kire Hirise sangulwalwalwadhane ku lamalimeme ku laakaneane, watubi makanaelre, si kiangeange ku kidremedreme kasulringa makanaelre.

⁸ Ku takauawngane ki Hesebunge si babududu ki Sibema mamudu patuelre. Kwini lababududu ku tubava lini napakabusukunga ki maerece ki lakuni. Yakainga sakamani Kwidra, ku cebe ki budu lini watilulai papia dradha si daruru kavai Yazere, papia talrawane tilulai mwa calragulragu, papia tali sapakalriwgu tilulai mwa kavai balrealreanane ki Titimwane ka laveke;

⁹ Kaiasasane lri pasikaiyaku ki cebe ka budu ki Sibema tubi, mia ku tatubianeli ki swa Yazere. Ku lreseli ki Hesebunge si Ilriale mia ki udale, asi lwiyane ikai kwini kadrwanga ku manemane ku akitalekane si pakiraragai ki laumawmase.

¹⁰ Kadrwanga kulri pasikai ki malrange ka umawma si kiraragai; laka kadrwanga kulri pasikai ki babududu kiraragai senai; laka kadrwanga ku umawmase kulri ikai ki tapepeane ki budu si pepe. Ku kiarararagai ku lingau kadrwanga.

¹¹ Ngwalai kikai, kai kidremedremeli pasiakai ki swa Muabe tubi, pasiakai ki Kire Hirise katelrege.

¹² Kai laumawmase ki swa Muabe kai watelrai mwa lregelrege ki biu si wamwa sanaka biu kitubi, pakeela ki kiadulru sicaemane, ai kadrwa ku tangimiane.

¹³ Palikainga kai amani ku pelaela ki Tamatama pangukai ki swa Muabe ka vaga.

¹⁴ Kikai ku Tamatama amia kai, “Lri tara tulrunga ka caili, ku tacekecekelane ki swa Muabe lri sakawlrau patuelre, lri tabeekelenga ku umawmase ku asuru; kwini lalasu lai ka taturawramuru turamuru.”