Isaiya 15 - Ngudradreadrekadhane Ka Sisiu 魯凱語聖經

Ku Twaumase lri amudu ki Muabe

¹ Kikai lebenga ngwakai ki Muabe ka vaga. Ku cekele Are si Kire lri imauawngane kamudu. Ku babitingane lri kabungu ki kadaengane Muabe.

² Ku laumawmase Dibune wakapa mulregelrege, si ikai ki daane ki samiamiange lini tubitubi; ku swa Muabe ngwalai ki cekele ki Nibu si Midiba si tubi turamuru; kwi lalasu satubitubi wakiriti patuelre ku isiu, la kiriti ku ngisingisi.

³ Ku wadadadavace ikai kadalranane ki cekele ku laumawmase sialaimai ku kaimadhane makanaelre; ikai tairuburubwane ki cekele si cavalri yakaai ku laumawmase ku karalealeale tubitubi makanaelre.

⁴ Ku laumawmase ki Hesebunge si Ilriale watubitubi makanaelre; ku tubi lini adravane ka yakaai ka Yahaze kialalra. Lakamani ku lakwapingi mialri kakiwcu makanaelre, ku garangane lini maulrawnga.

⁵ Kai kidremedremeli ngwaladhaku ki Muabe kipakwalri! Kwini swakai kwini ku laumawmase mwaberenga mwa ka Zuare si Igelathe Selisiya. Yakai ku laumawmase ku mwa dradha mu Luhithe, si takumubebere, takutubitubi; yakaai ku laumawmase ku mwabere mu Hurunaime, la akwadradrau tubi.

⁶ Ku vaalru Nimerime kadrwa ku acilai, ku ngwavavalru ku laubulu marudame, ku lawacebecebe la pacainga, kaidu maka wadrelenga ku masalese.

⁷ Ngwalai kikai, kwi lalasu mailuku ku ruburubu lini ku lawbubulu, si mubere ngukakai lribate vaalru Yanagi.

⁸ Ikai Muabe, lu katwase mwinu la kilalra ku lingau ku watubitubi, adravane ka yakaai Igelaime si Bire Ilime ku laumawmase kialalra makanaelre.

⁹ Ku acilai drakerale ki cekele Dimune erai patuelre; ku Twaumase lri papia ki yakai Dimune ka laumawmase pulebe ku maadradrau ku amatikurwane. Ku twalai Muabe kainganai mubere ku laumawmase lri kipapacai ki raiyungu makanaelre.