Isaiya 14 - Ngudradreadrekadhane Ka Sisiu 魯凱語聖經

Ku swa Iseraylri twalai ki taacaicaliane kainganai siwlri

¹ Ku Tamatama lri peelana pathingalane ku sakialibakeini ki lakawkawluini ki swa Iseraylri, lri pilri liniane ka inianenga, lai lri ikaikai ki kadaengane lini; takaalra ku maelane ka zuku lri taelre liniane, si lrika swakaainga liniane.

² Takaalra ku kuni kulri kainganai paralubu liniane, lri iluku liniane siwlri mwa kudra patarumara ki Tamatama ku kadaengane, si lai lri aduri liniane, si kauawngu pasikai liniane. Kunadruma kwidra nawaravase ki swa Iseraylri, kaiasasanenga ngiabalrenga si aduri ki swa Iseraylri; ku swa Iseraylri lri rathudu kwidra ki nawalrumalrumai liniane ku laumawmase.

Ku talialalai ki swa Babilunia mwalebe muswadriadringi

³ Ku Tamatama lri mwalra ku tubi ki kidremedreme si sakwalrialri ki swa Iseraylri; kadrwanga ku umawmase kulri vutha liniane pakwalri kaungu.

⁴ Ku Tamatama lu pangimianga kilakikai patuelre, kwi lalasu lri mulralrakai ki talialalai ki swa Babilunia iya kai, “Mwakadrulunga kwi ngikararakacane ka talialalai! Kwi lasu kai lri dredrepetenga ki umawmase!

⁵ Ku Tamatama paliakainga ku puku ki ngialisiane ka tararathurathudu.

⁶ Kikai laumawmase kathane ku atuduriane ki laumawmase ku thingale, si kai telrai tulisi ki kiapamaki ka lakuni.

⁷ Kai kawmasane tau ikaai ku babitingane si rathudane; sanaka umawmase kiarararagai senasenai.

⁸ Ku alrenge si cedare ka angatu ikai Lebanungu lri ngwalai ku takamudane ki talialalai si kiraragai, asi lwiyane kwini lasu kiasalrunga, kadrwanga ku umawmase kulri kela si pulebe liniane.

⁹ “Ku swa swadriadringi padulrunga ku akidredresengane ki talialalai ki swa Babilunia. Ikai kai kawmasane kudra abake ki nasaniange ka laumawmase malrithavulu makanaelre; ikai kai kawmasane kudra abake ki lanaatalialalainga ngiadrakale twalai ki taetalane makanaelre.

¹⁰ Kwini lalasu amia kai iniane makanaelre, ‘Kikainga miasu naiane turamuru, amaningasu naiane ka vaeva!

¹¹ Kunadruma yakai ku lingau ki lebere ku wadrengedrengedrengere ku takasanianganesu, kaiasasane la mialrisu kelanga kai swadriadringi! Ku tapeapecanesu yai lubalubai; ku cawbusu yai ekai.’

¹² “Talialalai ki swa Babilunia, kusu ka malealedra ka sapakataleare ka tariau, twalaingasu subelebelenge tuverevere mulebe. Napamalebengasu ki lakuni, kikai la kivereveresu pulebe.

¹³ Kingivalesu kidredreme ku amubelenganesu mwa ka subelebelenge, si pikai belenge ki latariau ki Twaumase ku taetalanesu; kiasanu nenesu ikai belenge lregelrege tapalikaiyane tali dradha, ka taikaiyane yelrelre ki latwaumase.

¹⁴ Amiasu kai, lri kapasu mubelenge ki talikaiyane ki ememe, si ikai kwini makakalrumale ki Twaumase ku Abebeelengenga.

¹⁵ Aneane ku wathingale sa tubakebakesu malradaalrungasu muswadriadringi, si tuverevere mulrubangane ka mwaadringi turamuru.

¹⁶ “Ku wapacai ka umawmase lri manumaca si papia muswane drele; kwini lalasu lai lri kivaga, ‘Amani kai umawmase kai kudra pangiavelevele ki kadaengane, kudra pamanwagiligili ki sanaka kuni?

¹⁷ Amani kai umawmase kai kudra wamudu ki takaalra ka cekele, si paubulane kai kawmasane? Amani kai umawmase kai kudra kai mwabangalre pakatwase ki niravasane, kai pawabangalre liniane pasiwlri putavanane?’

¹⁸ Ku talialalai ki lakuni wapece makanaelre ikai adringi ki mathaithaithariri ka tadralredralrekane.

¹⁹ Ai kadrwa ku takidralrekanesu, kiacilrisu pikai ubulane; ikai belenge muswane mabate kwi laculrale ki kiakaruburu si pacai ka lakwapingi, marededele mucilri mwa ki mwaadringi ka valrulrange, si kidredredre ki umawmase.

²⁰ Kaisu ka miyaiya ki drumane ka talialalai, ka lu pacai yakai ku umawmase ku wadralreke; asi lwiyane wamudusu ki kunisu, la papacaisu ki umawmasesu. Kusu ka manganganga ka umawmase lri kaamudu numi makanaelre ka wacekecekele, kadrwa ku lri asuru ku natangeanga.

²¹ “Lu padulrwa ku apapacadhane numi ki lagaganeini! Kikai yai suru ki cucungulane lini ka pasalrivane ka kiame; ikai liniane kadrwanga kulri rathudu kai ki kawmasane, lai lri kai ikainga kai kawmasane tucekele.”

Ku Twaumase lri amudu ka Babilunia

²² Ku Tamatama ka abebeelengenga ki sanaka kwapingi amia kai, “Lri kikaruburaku ki swa Babilunia, si amudu iniane. Adravane ka ubulu kwini ki taikaiyane kadrwa ku lri asuru; kadrwa ku lalake, kadrwa ku mwabaibalrithi. Tamatamaku; ka amia kikai pelaela.

²³ Lri pabenekaku ki swa Babilunia, lri alisisuku ki kwici. Lri arakaiyaku ku swape mwalra ki swa Babilunia, si swape patuelre. Tamatamaku ka abebeelengenga ki sanaka kwapingi; amiaku kikai pelaela.”

Ku Twaumase lri amudu ki swa Asiria

²⁴ Ku Tamatama ka abebeelengenga ki sanaka kwapingi kiaketekete iya kai, “Ku nau pia iyaiyali lri tara ngimiya; ku lrika apianeli lri tara kalrepenge.

²⁵ Lri ikaiyaku ki kadaenganeli amudu ki swa Asiria, lai lri ikaiyaku ki lregelregeli dredre liniane. Lri lrabuthaku si pangilralraingi ki kawkawluli patwalai ki saruthukane ki swa Asiria, ku siamece lini ku matelrege lri sararenga.

²⁶ Kikai yai amani ku nau pia iyaiyali kai ki kawmasane; lri segaku kai alrima si kikaruburu ki lakuni.”

²⁷ Ku Tamatama ka abebeelengenga ki sanaka kwapingi malrithethenga ka lri tara piya kikai; wasegenga kwi alrima ka lri pathavungu; kadrwa ku umawmase ku lri dulru telenge.

Ku Twaumase lri amudu ki swa Pelisitine

²⁸ Saka tapacadhane ki talialalai ka Ahaze kwini ki caili, ku Twaumase peaelaela kilakikai matiakiragai ka vaga.

²⁹ Swa Pelisitine, kudra salrumadhane muswane ku ukudru mangetelenga, ai madha kiragai. Ku vaeva ka sulrau wapacainga, ai ku maelane ka vaeva ka siduduku ka sulrau yakai lrilrikudru mukalavalava; kwini batuku ki duku ka sulrau lri vwake ku wadulru ngipalai ka apwi ka sulrau!

³⁰ Ku Tamatama lri ataraagwagu ki matiakukuru ka umawmase, kwidra lavaevaeva kwalrialri ka kadrwa ku paralubu ku umawmase lai lri kasulivalivatenga ngilribalribate ki vai. Ai kwi lasu lri pakipadradresenge ku silravane ki swa Pelisitine; adravane ka abalu ku umawmase lri mialri pacai makanaelre.

³¹ Cekele ki swa Pelisitine, kunumi tungawngava karaleale tubi! Swa Pelisitine, naika manwagiligiligili numi! Yakai kwi makeceege ka ebelre twalalai tali dradha ipi si kaingananganainga, kwini yai maredededele ka garagarange ka tarakikaruburu ka badha.

³² Lri tumanaiya nai tubalre ki nisikawlane ki swa Pelisitine ka wakela kitubi ku akipalribulane? Lri pelaela nai liniane, iya kikai, ku Tamatama wacegecegenga Ziyungu; kwidra lakiapakwalrialri ku laumawmase lri ikai kwini si kipalakelakebenga.