Isaiya 13 - Ngudradreadrekadhane Ka Sisiu 魯凱語聖經

Ku Twaumase lri pathavungu ki Babilunia

¹ Kikai yai lalake ki Amuse ka Isaiya patwalai ki Twaumase tarumara ku patharwakai ki Babilunia ku vaga.

² Ikaiya ki kadrwa ku ubulu ka lrelrelrege cegecege ku sakikaruburane ka kalralradha. Papia ki tarakikaruburu tawtau drekase, cidinga kwi alrima, tusapatuthingalane ku akikaruburane ki kwini ki ngiakalrilrigu ka cekele.

³ Ku Tamatama wasarubunga si asipi kwini ki laswaete ku salrwane ka lagaragarange, lri katwase kikaruburu; lri pathavungu kwidra ki lapakagirimucu iniane ku lakuni.

⁴ Kilalra ka mangariangiangi ikai lregelrege; kavai yai tathathatha ka laumawmase ka wagirigiringi, ka takaalra ka lakuni ka yaelrelre karalealeale. Ku Tamatama ka abebeelengenga ki sanaka kwapingi wavelevelenga ki lakwapingi, padulrudulru ka lri kikaruburunga.

⁵ Kwini lalasu twalai ki talikaiyane kavai ki kadaengane, singi adaili ka kuni kainganai. Ku Tamatama lri ikai ki twaebebelre ka lisiane swape mwalra ki sakatukuniane.

⁶ Karaleala tubi! Ku vai ki Tamatama wakelanga; ku apakamudane ki wadulru sanaka manemane ka Twaumase wadethenga.

⁷ Masalregesege ku tabalangane ki laumawmase makanaelre; ku garangane ki laumawmase maulrawnga patuelre!

⁸ Kwi lalasu makiwcu turamuru; kwi lalasu kiangeange turamuru, mia ki takiangeangane ki twalalake ku takiangeangane. Kwi lalasu lu madredrele ku sakwalrialri lini, arwa driimalringa ku matikiwcane; kwi lringau lini ngwalai ki inwane si kaculu.

⁹ Ku vai ki Tamatama wakelanga! Kwidra matiangeange, ka swaete ku lisiane ki dringelresane ka vai anika wakeela! Kai kawmasane palraelre lri aubulane; sanaka pasalriu ka umawmase lri kamudu makanaelre.

¹⁰ Kai tariau patuelre lri kai maka ledranga; kai vai sana lrau mubelenge lri kadradrimiti, kai dramare lai lri kakadrwa ku ledra.

¹¹ Ku Tamatama amia kai, “Lri pathavungaku kai ki kawmasane, la pathavungu ku ngangane ki manganga ka umawmase. Lri palikaiyaku ku ngikalrilrigwane ki tarangikalrilrilrigu ka umawmase, si pulebe ki ngiatatwadradrau ngikarakacane ka umawmase.

¹² Ku maka ngialribate kai ki takipalalavane thalethale ku umawmase lrika bebekelane ki kakingiane.

¹³ Lri pamanugiligilaku subelebelenge, la palingilingi ki kadaengane; asi lwiyane kikai yai amaniaku ka Tamatama, ka abebeelengenga ki sanaka kwapingi ka padrelane ku lisianeli ngukai ki dringelresane, si putaluvaivai ku lisiane ka vai.”

¹⁴ “Ku yakai Babilunia ku maelane ka kuni ku umawmase lri mubere mwa ki cekeleini, lri sarau mawbebere, mia ki lasalawngane ka kiakurikurisi ki walwalupu, mia ki lakiu ka kadrwa ku taraagwagu ku makalithi.

¹⁵ Sanaka kiakidringai lri kipapacai makanaelre; sanaka kiapwalra ku umawmase lri kiara lrabu pacai makanaelre.

¹⁶ Ku ladaini lini lri icucubungu liniane kivathale papacai; ku daane lini lri kiburuku; ku taelrelre lini lri kikabebetethe.”

¹⁷ Ku Tamatama amia kai, “Lri pakagirimucaku ki swa Media si pakatwase kikaruburu ki swa Babilunia. Ku swa Media kai marau ku lrawlrapungu ku gingi, kai madalame ki kingi.

¹⁸ Kwi lalasu lri arakai ku lraili si lraili ki layacengecenge; kwi lalasu kai makalithi ki lalrulai, la kai taulra ki lavavalake.

¹⁹ Kai Babilunia nangiaradhekane turamuru ka kuni, ka lrigu ki laumawmaseini. Ai kwaku ka Tamatama lri balreaku iniane, mararaamau ku nataamudaneli ki Sudume si Gumura.

²⁰ Kadrwanga ku umawmase kulri ikaikai kwini; kadrwanga ku swa Arabia ku lri ikai kwini sulai, lai ka kadrwanga ku taraagwagu ku lri ikai kwini pagwagu ki lakiu.

²¹ Kwini talikaiyane kwini lrika waudriwdripinga ka yakaikai; ku kwici lri ikai kwini tulisisuku, ku tuniau lri ikaikai kwini, ku kisisi lri ikai ki lakinaburukane ka daane si ititituku,

²² Ku tawpungu ubulane lri ikai ki nadaane ki talialalai alealeale, ku la tawpungu lai lri ikai ki taswadradrau ki daane alealeale. Ku amatikurwane ki Babilunia wadethenga! Kai lri tarathainunga ku vaini!”