Isaiya 11 - Ngudradreadrekadhane Ka Sisiu 魯凱語聖經

Bavane ka talialalai si marathudu ka kuni

¹ Lri rigarigi twalai ki Yesi ka tapulebeane ka tangadrane ki angatu; yakai ku tangea ka bavane ka talialalai lri twalai ki mwabaibalrithi iniane ngiradhekane.

² Ku Ri ki Tamatama lri mulebe ikai ki kinawmasaneini, si patarumara baai iniane ku thingalane si lrigilane, lri patarumara baai iniane ku thingalane kikake si puku, lri patarumara baai iniane ku tathingalane si usakenane ukuludrane ki Tamatama ku kidremedreme.

³ Ku ausakenane ukuludru ki Tamatama amani ku kiragaini; kwi lasu kai singiakai ku tatulringalringavane ki umawmasane si saibange; kwi lasu kai singiakaikai ki languvavaga si turingaringau tu pasalrivane.

⁴ Kwi lasu lri arakai ku aparamaramavane palakebe ki matiakukuru;. Kwi lasu lri palakebe ku akaesadhane ki kwalrialrialri ka kadrwa ku paralubu. Kwi lasu lri drekase pathavungu ki pasalriu ka umawmase; kwi lasu lri pathavungu si papacai ki manganga ka umawmase.

⁵ Kwi lasu lri arakai ku dringelresane rathudu; kwi lasu lri arakai ku kapatengatenganane kaungu ki kunkwane.

⁶ Ku tawpungu ubulane si lrulai ka nikiubawbalane ka kiu lri karawrathudu taelre; ku lrikulau si lrulai ka kiu lri taelre apeapeapece; ku lrulai ka lwange si lrulai ka raiyungu lri taelre thuthuthu; ku lavavalake lri kamaninga ku wadrangalrungalru liniane.

⁷ Ku tina ka lwange si tina ka cumai lri taelre kanekane ungungulu; ku lrulai ka lwange si lrulai ka cumai lri taelre apeapeapece. Ku raiyungu lri mianga ki lwange kane ku ubulu.

⁸ Ku lrulai lri ikai ki lrawlrawdru ki siduduku ka sulrau kivavavange. Ku piasadranga ki thuthu ka lavavalake lu apeape ki barungulu ki yakai ku duku ka sulrau kailri kipakadula.

⁹ Ikai Ziyungu ka saniange ka lregelrege ki Tamatama, kadrwa ku asutatwatumanane, laka kadrwa ku ngialisiane; mia ki laveke suete ku acilai, kai kadaengane lri suete ku athingalane lini ki Tamatama.

Lri ubalriwnga kudra acaicaicali ku laumawmase

¹⁰ Kudra vai kwini lu kelanga, twalai ki mwabaibalrithi ki Yesi lri ngiradhekane ku tangeea ku bavane ka talialalai. Kwi lasu lri akalralradha ki lakuni; sanaka umawmase lri papia iniane tuswalupu; ku cekeleini lri suete ku lrigu.

¹¹ Ikai kwini ki vai, ku Tamatama lri pelana arakai ku pukuini pamubalriu ki laacaicaicali ka laumawmase; kwini lalasu lri twalai Asiria si Izipiti, lri twalai Patheruse, Kuse, Ilame, Babilunia, Hamathe si ngwababiabila ki laveke ka lakuni, si la twalai ki yakabicelrakane ki laveke ka kadaengane kainganai siwlri mubalriu.

¹² Ku Tamatama lri pubelenge ku kalralradha, ku lakuni lai lri thingale ala ka wasarubunga ki yakai kidruanga ki swa Iseraylri si swa Yuda, si ililuku liniane siwlri mubalriu.

¹³ Ku swa Iseraylri lri kai pathalranga ki swa Yuda; ku swa Yuda lalri kai tubadhanga ki swa Iseraylri.

¹⁴ Kwi lalasu lri ngielrenga, si kiecebe ki yakai tali sapakalriwgu ka swa Pelisitine lai kikaruburu ki yakai tali talrawane ka laumawmase. Kwi lalasu lri pamalebe ki Idume si Muabe; ku swa Amune lri pasalaladha liniane.

¹⁵ Ku Tamatama lri ipi si pakameale ki laveke kavai Suze; ku Twaumase lri arakai ku culwane ka valrigi ipi si pakameale kadravane Yuparati, pipitunga ka tatitiki ka vaalru ku niputedrane, ka lri dulru talubalre sanaka umawmase.

¹⁶ Lu bibilrili lri ikai ku vaeva ku masadrarate ka maadrau ku kadalranane ka apangukaiyane siwlri kwidra laabalu panianiake si ikai Asiria ka swa Iseraylri, mararaamau ki cucungulane ki swa Iseraylri sa twalai Izipiti kainganai.